شه‌پۆلی سه‌رما له‌ ئه‌وروپا ده‌یان كه‌سی كوشت

سه‌رمایه‌كی سه‌خت سه‌رانسه‌ری كیشوه‌ری ئه‌وروپای گرتووه‌ته‌وه‌ و كاریگه‌ریی خستووه‌ته‌ سه‌ر ژیانی خه‌ڵك له‌و كیشوه‌ره‌ به‌ تایبه‌تی له‌ رۆژهه‌ڵاته‌كه‌ی.

تا ئێسته‌ به‌هۆی ئه‌و سه‌رمایه‌ ٣٨ كه‌س گیانیان له‌ ده‌ست داوه‌ كه‌ به‌شی زۆریان په‌ناخواز و كه‌سی لێقه‌وماون. له‌ وڵاتی پۆڵۆنیا پله‌ی گه‌رمی گه‌یشتووه‌ته‌ ٢٠ پله‌ ژێر سفر و ١٠ كه‌س به‌هۆی سه‌رماوه‌ مردوون. هاوكات له‌ چیك سه‌رما بووه‌ته‌ هۆی مردنی شه‌ش كه‌س.

ناوچه‌ی به‌ڵقانیش پله‌كانی گه‌رمی تا ٢٨ پله‌ ژێر سفر دابه‌زیوه‌ و له‌ مه‌كه‌دۆنیا پله‌ی گه‌رمی ٢٨ پله‌ ژێر سفر و له‌ سربیاش ٣٣ پله‌ ژێر سفره‌. له‌ سۆفیای پایته‌ختی بولگاریاش بارینی به‌فر هۆكاره‌كانی گواستنه‌وه‌ی په‌ك خستووه‌.

هاوكات له‌ ئیتاڵیاش سه‌رمایه‌كی زۆر ده‌ستی پێ كردووه‌ و به‌هۆیه‌وه‌ حه‌وت كه‌س گیانیان له‌ ده‌ست داوه‌.

له‌ مۆسكۆش پله‌كانی گه‌رمی به‌ رێژه‌یه‌كی به‌رچاو دابه‌زیون و له‌ شاره‌كه‌ سه‌رووی ٣٣ پله‌ تۆمار كراوه‌. زۆرێك له‌ خه‌ڵك ئۆتۆمبێله‌كانیان له‌ ماڵه‌وه‌ راگرتووه‌ و به‌ هۆكاره‌كانی تری گواستنه‌وه‌ ده‌چنه‌ سه‌ر كاریان.

سه‌رچاوه‌/ یورونیوز
 



وشە - سلێمان تاشان


AM:11:38:10/01/2017




ئه‌م بابه‌ته 984 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌