دوای 10 ساڵ لە سكاڵایەكی یاسایی نێوان بانكێكی ئێرانی و بەریتانیا، دواجار دۆسیەكە بەسترا و بڕیار درا بە بڕی ملیارێك و 600 ملیۆن دۆلار بانكێكی ئێرانی قەرەبوو بكرێتەوە.
وەزارەتی دارایی بەریتانیا لە ساڵی 2009 كۆمەڵێك سزای بەسەر بانكی "میلەت"ی ئێرانیدا سەپاند و رێی لەو بانكە گرت لە بەریتانیا درێژە بە پێوەندییە بازرگانییەكانی بدات. ئەوكات بانكەكە بەوە تۆمەتبار كرابوو یارمەتی دارایی پێشكەش بە بەرنامەی ئەتومیی ئێران كردووە.
بەگوێرەی "
یۆرۆنیوز" بانكەكە دواجار سكاڵای بۆ دادگای باڵای بەریتانیا بەرز كردەوە و لە ساڵی 2013 دادگاكە سزاكانی سەر بانكەكەی هەڵوەشاندەوە. دواتر بانكی "میلەت" سكاڵایەكی تری كرد و داوای كرد بە بڕی چوار ملیار دۆلار قەرەبوو بكرێتەوە.
دوو لایەنی ئەم كێشەیە بەر لەوەی دادگا بڕیار لەسەر دۆسیەكە بدات و لێكۆڵینەوە لە بڕی قەرەبووكردنەوەكە بكات، لەسەر بڕێكی دیاریكراو لە قەرەبووكردنەوەی بانكی ئێرانی رێككەوتن و وەزارەتی دارایی بەریتانیا رازی بوو ملیارێك و 600 ملیۆن دۆلار بە ئێران بدات.