ماوەیەكە یۆگا لە كوردستان گرنگی پێ دەدرێت كە گرنگترین كاریگەرییەكانی ئەوەیە بیر و هۆش و لەشی مرۆڤ چالاكتر دەكات. یۆگا بەرەو هاوسەنگی و ئارامی ناخت دەبات و وادەكات هێزە بەكارنەهاتووەكانی لەش و مێشك بكەونە كار،.
هەموو كەسێك دەتوانێ یۆگا بكات بە منداڵ و لاو و پیر و تەندروست و ناتەندروستیشەوە. لە سلێمانی كۆمەڵێك سەنتەری پێوەندیدار كراونەتەوە و زیاتریش ژنان روو لەو سەنتەرانە دەكەن.
سۆزان عوسمان محەمەد بەڕێوەبەری كۆمەڵەی یۆگا لە كوردستان، بە "وشە"ی ڕاگەیاند، یۆگا كار لەسەر هاوسەنگكردنەوەی هەرسێ لایەنی جەستەیی و دەروونی و مەعنەوی مرۆڤ دەكات، لە هاوسەنگیشدا مرۆڤ زیاتر هەست بە چێژی ژیان دەكات و ژیان بۆی دەبێتە لەزەتێك وەك لە بارگرانی.
بەگوتەی ئەو، زیاتر ئەو فێرخوازانەی كە بەشدار دەبن یان لایەنی جەستەیان یان لایەنی دەروونی و مەعنەوییان ناهاوسەنگیی هەیە، بەڵام خۆی بۆ هەموو كەسێك دەشێت.
سۆران دەڵێت "كێشە نییە كارەكەت هەرچییەك بێت، كاتێك تۆ یۆگا دەكەیت لە شوێنی كارەكەشتدا رەنگدانەوەی دەبێت, خۆشەویستیت بۆ كارەكەت زیاتر دەبێت, هەستی خۆشەویستیت بۆی زۆرتر و ماندوویەتیت كەمتر دەكاتەوە و خزمەتێكی باشتریش پێشكەش دەكەیت، گرنگە كاتێك كەسێك دەست دەكات بە یۆگا، لەسەر دەستی كەسێكی شارەزا لەو بوارەدا پێڕەوی ڕاهێنانەكانی یۆگا بكات تا خێراتر و باشتر سوودمەند بێت."
لە ساڵی ١٩٩٩وە كۆمەڵەی یۆگا لە كوردستان دامەزراوە و تا ئێستە نزیكەی 210 خول كراوەتەوە لەم كۆمەڵەیەدا, كەسانێكی زۆر پراكتیزەیان كردووە، ڕەنگە ئاسان نەبێت بڵێین تا ئێستە چەند كەس بەشدار بوون, بەڵام بەشێوەیەكی زۆر باش لە سلێمانی پێشوازی لە یۆگا دەكرێت لەچاو ساڵانی پێشتر, هۆكارگەلێكی باش هەیە بۆ ئەو پێشوازییە و بەشداریكردنی هاووڵاتییان. چاپكردن و بڵاوكردنەوەی كتێبگەلێكی باش لەبارەی یۆگا و گۆڤاری یۆگا یەكێك لەو هۆكارانەیە.
بەپێی ئامارێك كە دەستی "وشە" كەوتووە، لە سلێمانی بە هەزاران كەس لە ژن و كچ و پیاو و پیر یۆگا دەكەن، ئەمانەش رۆڵێكی باشیان هەبووە لە ناساندنی یۆگادا و جگە لەمانەش كردنەوەی چەند سەنتەر و ناوەندێكی تری یۆگا لە شارەکە هۆكارێكی تر بوون بۆ زیاتر ئاشنابوونی هاووڵاتییان بە یۆگا و ئەوانەی بەشدار دەبن بە تێگەیشتنێكی باشترەوە پێشوازی لێ دەكەن.
بەگوتەی ئەو بەڕێوەبەرە، ئەوانەی بەشداری خولەكانی یۆگا دەكەن زیاتر لە ڕەگەزی مێن, هەڵبەت هۆكار زۆرن، بەڵام ژنان بەشێوەیەكی گشتی خەمخۆرییان زۆرە لە بەرانبەر ئەرك و كارەكانی ژیانیان، ئەمەش وادەكات لێكدانەوەی فكریان زۆر بێت و لە رووی دەروونییەوە هەست بە ماندوویەتی زۆر بكەن, ئەمە هۆكارێكە كە زیاتر ژنان ڕوو لە یۆگا دەكەن.
بڕی كرێی ئەو خولانە دیاریكراو نییە و بەپێی چۆنێتی داڕشتنی پرۆگرامی ئەو خولە و هەندێك جاریش باری گوزەرانی هەندێك لە فێرخوازەكانیشیان لەبەرچاو گرتووە.
لەو سەنتەرە لە هەفتەیەكدا سێ ڕۆژ ڕاهێنان دەكرێت و فێرخوازیش دەبێت لە ماڵەوە گرنگی بە ڕاهێنانەكانی بدات.
وەك ئەم ڕاهێنەر و بەڕێوەبەرە باسی دەكات، كاتێك یۆگا دەكەیت ئاگایی و بیركردنەوەت بەرفراوان دەبێت, ئەم ئاگاییە بەسە كە تۆ كاری پێ بكەیت، دەكرێت ئەو وشەیە پشتڕاست بكەینەوە كە دەگوترێت وەرزشی یۆگایە، یۆگا وەرزش نییە، دەكرێ بگوترێت پراكتیزەی یۆگا لە جیاتی وەرزشی یۆگا، یۆگا قۆناغی هەیە، هەموو ئەم قۆناغانە بۆ زیاتر پەیبردنە بە ئاستەكانی هۆشیاری كە ئەم هۆشیارییە هەم ناوەكییە و هەم گەردوونی.
ئەو لەبارەی هۆكاری ڕووكردنە هاووڵاتییان بۆ یۆگا روونی كردەوە، هۆكارەكان زۆرن لە مرۆڤێكەوە بۆ مرۆڤێك جیاوازە، هەیە كێشەكەی جەستەییە، هەیە لەرووی دەروونییەوە هەست بە ناهاوسەنگی دەكات, كەسانێكیش هەن دەیانەوێ زیاتر لە ڕووی مەعنەوییەوە بەرەوپێش بڕۆن و پەی بە ماهیەتی خۆیان ببەن.
نەسرین ڕووناك یەكێك لەو كچانەیە كە یۆگا دەكات و بە "وشە"ی گوت، یۆگا ئارامت دەكاتەوە و وات لێ دەكات بە گرنگییەوە كارەكانت بكەیت، زیاتر هەست بە ئاسوودەیی دەكەیت و چێژ لە كارەكانی ڕۆژانە وەردەگریت، راستییەكەی یۆگا ئارامی و ئاسوودەییە.
هەندێك لەوانەش یۆگا دەكەن، لە ڕێی كتێب و فێركارییەوە لە ماڵەوە خەریك دەبن، بەسۆز محەمەد كە لە ڕێی كتێبەوە یۆگا دەكات، بۆ "وشە" ئەوەی خستەڕوو، یۆگا دەتباتە دنیایەكی تر و هەست بە ئارامی دەكەیت و ماندووبوونت لا كەم دەكاتەوە، بەگشتی یۆگا گرنگە بۆ كاری ڕۆژانە و پێویستی بەوە هەیە ڕۆژانە سەعاتێك بچیتە یۆگا و واز لە جووڵەكردن بهێنیت و ئارام بیتەوە.
*
یۆگا ئارامت دەكات و وات لێ دەكات بە گرنگییەوە كارەكانت بكەیت و زیاتر هەست بە ئاسوودەیی دەكەیت
وشە/ سلێمانی. هۆشیار عەلی