لە خانەقین جووتیارێک بە کوژراوی دۆزرایەوە

پاش نیوەڕۆی ئەمڕۆ لە نێوان ناوچەی ئیمام وەیسی شارەدێی سەعدیەی سەر بە خانەقین و شارۆكەی شارەبانی رۆژهەڵاتی پارێزگای دیالە جووتیارێك درایە بەر دەستڕێژ و گیانی لەدەست دا.

ئەمڕۆ یەکشەم 23ی حوزەیران، عەلی حەیدەر ئەفسەری هەواڵگری پۆلیسی دیالە بۆ "وشە" ئاشكرای كرد، پاش نیوەڕۆی ئەمڕۆ لەنێوان ناوچەكانی ئیمام وەیس و شارۆكەی شارەبان، تەرمی جووتیارێك کە دراوەتە بەر دەستڕێژ دۆزرایەوە.

زیاتر روونی دەکاتەوە، لەبەر ئەوەی تەرمەکە لەکاتی دۆزینەوەی لەلایەن پۆلیسەوە هەر خوێنی لەبەر رۆیشتووە، دەردەکەوێت کە جووتیارەکە تازە کوژراوە و لەو شوێنە تەرمەکەیان بەجێ هێشتووە.

عەلی حەیدەر ئاماژە بۆ ئەوە دەکات کە تا ئێستایش کەسوکاری قوربانییەکە دیار نین و هێزەکانی پۆلیس ناوچەکەیان گەمارۆ داوە و پەڕاوی لێکۆڵینەوە بۆ تاوانەکە کراوەتەوە.

ئەو ئەفسەرەی هەواڵگری پۆلیسی دیالە دووپات لەوە دەکاتەوە، هەفتەی رابردوو لە دیالە رووداوێکی هاوشێوە تۆمار کراوە و جووتیارێک لەلایەن چەکدارانی نەناسراوەوە کوژراوە و تەرمەکەیان لە دەرەوەی ئاوەدانی بەجێ هێشتبوو.

گەرمیان/ سەبری هۆرێنی