واشنتن: به‌ تێكه‌ڵكردنی میلیشیاكان..سوپای عێراقیش ده‌بێته‌ موڵكی ئێران

له‌ یه‌كی ته‌مووز/یۆلیۆ عادل عه‌بدولمه‌هدی سه‌رۆك وه‌زیرانی عێراق فه‌رمانێكی دیوانی سه‌رۆكایه‌تیی ئه‌نجوومه‌نی وه‌زیرانی ده‌ركرد، به‌ گوێره‌ی فه‌رمانه‌كه‌یش سه‌رجه‌م هێزه‌كانی ناو حه‌شدی شه‌عبی ده‌خرێنه‌ ناو هێزه‌ فه‌رمییه‌كانی عێراقه‌وه‌ و هێزێك به‌ ناوی حه‌شدی شه‌عبی نامێنێت، مۆڵه‌تی كۆتایی ئه‌و مانگه‌یشی به‌ هێزه‌كانی حه‌شدی شه‌عبی دا، پێگه‌ی "The Trumpet"ی ئه‌مه‌ریكیش دووپات له‌وه‌ ده‌كاته‌وه‌، كه‌ ئه‌و بڕیاره‌ی عه‌بدولمه‌هدی به‌ واتای تێكه‌ڵكردنی میلیشیا "تیرۆریسته‌كانی" سه‌ر به‌ ئێران دێ له‌گه‌ڵ سوپای عێراق كه‌ ئه‌مه‌ریكا به‌ دووباره‌ ڕێكخستنه‌وه‌ و مه‌شق پێكردنی پاره‌یه‌كی زۆری خه‌رج كرد.

له‌ ڕاپۆرته‌كه‌ی ئه‌و پێگه‌ ئه‌مه‌ریكییه‌ هاتووه‌، كه‌ تێكه‌ڵكردنی ته‌واوی گرووپه‌كانی حه‌شدی شه‌عبی و كاركردنیان وه‌ك به‌شێك له‌ ناو هێزه‌ جیا جیاكانی عێراق و وه‌رگرتنی مووچه‌ و ئیمتیاز له‌ حكوومه‌تی عێراق و كاركردنیان بۆ به‌رژه‌وه‌ندی ئێران مه‌ترسیدارترین كاره‌ بۆ به‌رژه‌وه‌ندییه‌كانی عێراق و ئه‌مه‌ریكایش به‌ تایبه‌تی، چونكه‌ به‌مشێوه‌یه‌ میلیشیاكان ده‌چنه‌ ژێر ماسكی سوپای عێراق و دژایه‌تی ئه‌مه‌ریكا ده‌كه‌ن، له‌ كاتێكدا ئێسته‌ ڕوون و دیارن و به‌شێكیشیان له‌لایه‌ن ئه‌مه‌ریكاوه‌ خراونه‌ته‌ لیستی تیرۆره‌وه‌.

هۆیه‌كی ده‌ركردنی ئه‌و بڕیاره‌ بۆ ئه‌وه‌ ده‌گه‌ڕێته‌وه‌، كه‌ سه‌ركرده‌كانی حه‌شدی شه‌عبی سه‌ركه‌وتن به‌سه‌ر شه‌ڕی داعش ده‌قۆزنه‌وه‌ و له‌ هه‌ڵبژاردن و گۆڕه‌پانی سیاسی عێراق بۆ به‌رژه‌وه‌ندی خۆیان به‌كاری ده‌هێنن، وه‌ك ئه‌وه‌ی له‌ هه‌ڵبژاردنی ڕابردووی عێراق ڕووی دا و لیستی فه‌تح كه‌ به‌ لیستی حه‌شدی شه‌عبی ناوده‌برا، توانی ڕیزبه‌ندی دووه‌م لیستی براوه‌ی هه‌ڵبژاردن بگرێ و 47 كورسی په‌رله‌مان به‌ده‌ست بهێنێت.

ڕه‌نگه‌ ئه‌وه‌ دیوه‌ باشه‌كه‌ی ئه‌و بڕیاره‌ بێ و بۆ لایه‌نه‌ سیاسییه‌كانی عێراق جێی دڵخۆشی بێت، به‌ڵام مه‌ترسی و دیوه‌ خراپه‌كه‌ی ئه‌و بڕیاره‌ ئه‌وه‌یه‌ كه‌ ئیتر میلیشیاكان به‌ ناوی سوپاوه‌ سته‌م له‌ خه‌ڵك ده‌كه‌ن و كرده‌ی ڕفاندن و كوشتن و لێدان له‌ به‌رژه‌وه‌ندی ئه‌مه‌ریكا ده‌كه‌نه‌ ئامانج، ئه‌و سوپایه‌ی كه‌ ئه‌مه‌ریكا دوای ئه‌وه‌ی له‌ 2014 تووشی هه‌ره‌س بوو، جارێكی تر له‌ ڕێی ڕاهێنه‌رانی ئه‌مه‌ریكا و وڵاتانی ناو هاوپه‌یمانی نێوده‌وڵه‌تی توانا و هه‌وڵ و پاره‌یه‌كی زۆری خسته‌گه‌ڕ، تا سه‌ر له‌ نوێ بكه‌وێته‌وه‌ سه‌ر پێ و بتوانێ پارێزگای له‌ ناوچه‌كانی عێراق بكات.

میلیشیاكان به‌ ڕوونی به‌رنامه‌ی سیاسی و ئامانجه‌كانی خۆیان له‌ سیسته‌می سیاسی عێراق ڕاگه‌یاندووه‌، ده‌بوو ئه‌مانه‌ قه‌ده‌غه‌ بكرێن و هه‌ڵبوه‌شێنرێنه‌وه‌، چونكه‌ به‌ گوێره‌ی یاسا و ده‌ستووری عێراق، هێزه‌ چه‌كداره‌كانی عێراق به‌ هه‌موو شێوه‌یه‌ك لێیان قه‌ده‌غه‌كراوه‌ كه‌ ده‌ست له‌ كاروباری سیاسی وه‌ربده‌ن، به‌ڵام زۆرێك له‌ گرووپه‌ میلیشیاكانی سه‌ر به‌ ئێران، ئامانجیان دروستكردنی سوپای پاسدارانی عێراق و دروستكردنی سیسته‌مێكی ئیسلامی هاوشێوه‌ی كۆماری ئیسلامی ئێرانه‌ بۆ  حوكمكردنی عێراق.

تێكه‌ڵكردنی حزبوڵا به‌ سوپای عێراق و چه‌ند میلیشیایه‌كی تر كه‌ له‌ لیستی تیرۆری ئه‌مه‌ریكان و تۆمه‌تباران به‌ ئه‌نجامدانی 14 هێرش بۆ سه‌ر بۆڕی نه‌وتی كۆمپانیای ئارامكۆ له‌ سعوودیه‌ و چه‌ندان تاوانی دژ به‌ مرۆڤایه‌تی به‌رانبه‌ر به‌ سوننه‌كان و مانه‌وه‌ی ئه‌بو مه‌هدی موهه‌ندیس كه‌ سه‌رۆكی حزبوڵای عێراقه‌ له‌ هه‌ڕه‌می هێزه‌ چه‌كداره‌كانی عێراق، كه‌ پێوه‌ندی تۆكمه‌ی له‌گه‌ڵ ئێران هه‌یه‌ و یه‌كێكه‌ له‌ فه‌رمانده‌كانی فه‌یله‌قی قودسی سوپای پاسداران، جێكردنه‌وه‌ی به‌ فه‌رمی له‌ وه‌زاره‌تی به‌رگری و هێزه‌كانی عێراق، ڕه‌نگه‌ گه‌وره‌ترین گورز بێ له‌ خودی عێراق خۆی و به‌رژه‌وه‌ندییه‌كانی ئه‌مه‌ریكا به‌ تایبه‌تی.

سوپای عێراق سه‌ره‌ڕای خه‌رجكردنی پاره‌یه‌كی زۆر له‌لایه‌ن ئه‌مه‌ریكاوه‌ بۆ ڕێكخستنه‌وه‌ی و ڕه‌وانه‌كردنی ژماره‌یه‌كی زۆری ڕاهێنه‌ری ئه‌مه‌ریكی بۆ مه‌شقپێكردنیان، كه‌چی تا ئێسته‌یش گه‌وره‌ جه‌نه‌راڵه‌كانی سوپا له‌سه‌ر بنه‌مای لایه‌نداری سیاسی داده‌نرێن و نه‌توانراوه‌ سوپایه‌كی بێلایه‌ن و پیشه‌یی و پێشكه‌وتوو دروست بكرێته‌وه‌، چوونی میلیشیاكانیش بۆ ڕیزی ئه‌و سوپایه‌، به‌ ته‌واوی ناوی سوپا به‌و مانایه‌ی له‌ زانستی سه‌ربازی هاتووه‌، له‌و هێزانه‌ی عێراق ده‌كاته‌وه‌، هاوكات ده‌بێته‌ هۆكارێك بۆ كۆمه‌ڵكوژكردنی كورد و سوننه‌ و كریستیانه‌كان و پێكهاته‌كانی تر هه‌ركات دژی به‌غدا و به‌رژه‌وه‌ندییه‌كانی تاران بیر بكه‌نه‌وه‌.

مایكل بریجنت پسپۆری كاروباری عێراق له‌ په‌یمانگای هێدسۆن له‌وباره‌وه‌ گوتی، حكوومه‌تی به‌غدا ناتوانێ  و میلیشیاكانیش ئه‌و كاره‌ ناكه‌ن، به‌ڵكوو به‌ ته‌واوی سه‌ربه‌خۆ ده‌یانه‌وێ بمێننه‌وه‌ و ڕاسته‌وخۆ فه‌رمان له‌ ئێران وه‌رده‌گرن و ده‌وڵه‌تیان له‌ ناو عێراق دروست كردووه‌ و بێ ئاگاداری حكوومه‌ت و دامه‌زراوه‌كان هه‌ڵمه‌ت و كرده‌ ئه‌نجام ده‌ده‌ن و هیچ لێكۆڵینه‌وه‌ و لێپێچینه‌وه‌یه‌كیشیان له‌گه‌ڵ ناكرێ، ئه‌وان له‌سه‌رووی یاساوه‌ن.

به‌ شێوازێكی ڕوونتر به‌ هاتنی میلیشیاكان بۆ ڕیزی سوپا، ئه‌و سوپایه‌ی كه‌ ئه‌مه‌ریكا خۆی پێوه‌ ماندوو كرد تا بیناتی بنێته‌وه‌، سه‌ركردایه‌تی و بیركردنه‌وه‌ی به‌ ته‌واوی بۆ به‌رژه‌وه‌ندی ئێران ده‌گۆڕێ، به‌وشێوه‌یه‌ ده‌بێته‌ سوپایه‌ك به‌ مه‌شق و ڕاهێنان و چه‌كی ئه‌مه‌ریكی پێشكه‌وتوو، به‌ڵام به‌ كاركردن بۆ به‌رژه‌وه‌ندییه‌كانی كۆماری ئیسلامی ئێران.


وشە - باز ئه‌حمه‌د


AM:07:11:09/07/2019




ئه‌م بابه‌ته 116 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌