خاوەن پشكێكی جاڤی لاند: بە نیازین دەست بە خۆپێشاندان بكەین


بەپرسانی پڕۆژەی گەشتیاری چاڤی لاند ڕای دەگەیەنن كە تەنیا ساڵی ڕابردوودا زیاتر لە ملیۆنێك و 600 هەزار گەشتیار هاتوونەتە ناو چاڤی لاند، خاوەن پشكەكانیش دەڵێن، داهاتی ئەو پرۆژەیە زۆرە و بە نیازین لە داهاتوودا دەست بە خۆپێشاندان بكەین.
 
ماوەی دوو ساڵە خاوەن پشكەكانی چاڤی لاند كێشەیان هەیە لە دابەش نەكردنی قازانج بەسەریاندا، ئەوان پێیان وایە كە داهاتی ئەو پڕۆژەیە زۆرە، بەڵام بەهۆی نا شەفافییەوە وەك خۆی دابەش ناكرێت.
 
جەمال حەمە ڕەشید، پارێزەری خاوەن پشكەكان بە "وشە"ی ڕاگەیاند، ئەو بڕە قازانجەی كە دابەش كراوە بەسەر خاوەن پشكەكان بۆ ساڵی 2016 لەگەڵ ئەو ژمارە زۆرەی كە ئەوان ڕایان گەیاندووە یەك ناگرێتەوە.
 
ئەوەشی گوت، ئەو ژمارەی كە خۆیان ویستوویانە ڕایان گەیاندووە، بە پێچەوانەوەی گوزارشت لە ئابووری ڕاستەقینەوە ئەو پرۆژەیە ناكات.
 
لای خۆیەوە دلاوەر محەمەد، خاوەن پشكی چاڤی لاند بە "وشە"ی ڕاگەیاند، خاوەن پشكەكان هیچ باڵێكیان لە ناو پرۆژەكەدا نییە، تا ئێستەش ڕێگەیان نەداوە خاوەن پشكەكان نوێنەریان هەبێت، ئێمەش دڵنیا نین لەو بڕە پارەیەی كە ئەوان باسی دەكەن.
 
زیاتر گوتی لە هەموو داهات و ژمارەكان كە ئەوان باسی دەكەن قسە و گومانمان هەیە، بۆیە بە نیازین لە داهاتوودا دەست بە خۆپێشاندان بكەین و سەردانی سەرجەم شوێنەكانیش دەكەین بۆ ئەوەی مافمان بۆ بگەڕێتەوە.
 
لای خۆیەوە هێمن ڕەسوڵ، خاوەنی پشك بە "وشە"ی گوت، راگەیاندنی قازانجی چاڤی لاند لە جاری یەكەم بە كۆنگرەی رۆژنامەوانی بوو كە راگەیەندرا چاڤی لاند بۆ ساڵی 2016 بە ڕێژەی (٪۸)قازانجی كردووە بە پێی سەرمایەی چاڤی لاند كە (۱۳۳) ملیار دینارە ئەو بڕە قازانجە دەكاتە (۱٠) ملیار و (٦٤٠) ملیۆن دینار، بەڵام وەك ئاماژەیاندا كە دابەش كردنەكە بە دوو جۆر دەبێت بڕی (٪٥) بە كاش وە (٪۳) بە كارتی چوونە ژوورەوە دوای ناڕەزایی خاوەن پشكەكان بەو دابەشكردنە شاسوار عەبدولواحید خاوەنی پڕۆژەكە رای گەیاند كە پڕۆژەكە (٪٥) قازانجی كردووە، واتە بڕی (٦) ملیار و (٦٥٠) ملیۆن دینار دەكات وە (٪۳) یان كردووە بە دیاری.
 
لەگەڵ ئەوەشدا خاوەن پشكەكان ناڕەزایەتی ئەوەن كە قازانجی ساڵی 2014 و 2015 بەسەریان دابەش نەكراوە.
 
بەپێی ئەو ئامارە بێت كە بەرپرسانی چاڤی لاند ئاشكرایان كردووە، كە 1 ملیۆن و 630 هەزار گەشتیار بۆ ساڵی 2016 سەردانی چاڤی لاندیان كردبێت و هەر گەشتیارێك تەنیا پارەی چوونە ژورەوەی خەرج كردبێت كە دەكاتە هەزار دینار، ئەوە داهاتی ملیارێك و 630 ملیۆن دینارە، خۆ ئەگەر گریمانە بكەین هەر گەشتیارێك 10 هەزار دیناری خەرج كردبێت كە پارەیەكی زۆر كەمە، ئەوا داهاتی پرۆژەكە دەكاتە 16 ملیار و 630 ملیۆن دینار.
 
وشە، زۆر هەوڵیدا قسە لەگەڵ هەر یەك لە دانا حەسەن، بەڕێوەبەری كارگێڕی چاڤی لاند و ئارام سەعید بەڕێوەبەری كۆمپانیاكە بكات، بەڵام ناوبراوان وەڵامی پێوەندییەكەیان نەدایەوە.
 
سلێمانی/ هۆشیار عەلی


وشە - مه‌حموود ئیسماعیل


PM:10:55:11/01/2017




ئه‌م بابه‌ته 1200 جار خوێنراوه‌ته‌وه‌‌