خانمێكی تەمەن 92 ساڵی دانیشتووی وڵاتی ژاپۆن، بووەتە مایەی سەرنجڕاكێشانی بەكارهێنەرانی تۆڕە كۆمەڵایەتییەكان، ئەمەش بە هۆی كارە دەستییەكانی كە بە سووف و داو دروستیان دەكات.
خانمە ژاپۆنییەكە، تا ئێستە زیاتر لە 500 تۆپی دەستكردنی لەو شێوەیەی دروست كردووە كە هەر یەكەیانی بە شێوەیەكی سەرنجڕاكێش و تایبەت دیزاین كردووە و وێنەی كارەكانیشی لەلایەن كچەزایەكییەوە بە ناوی نانا ئەكیوا، لە تۆڕە كۆمەڵایەتییەكان بڵاو كراونەتەوە.
بەگوێرەی زانیارییەكان، ئەو ژنە لە تەمەنی 60 ساڵییەوە دەستی داوەتە ئەو هونەرە و بۆ كارەكەشی تەنیا سووف و داو بەكار دەهێنێت و شێوەی تایبەتیان پێوە دروست دەكات، ناویشی لە هونەرەكەی ناوە "تیماری".
جێی ئاماژەیە، ئەو جۆرە كارە دەستییانە لەنێوان دانیشتووانی ژاپۆن بە گشتی و دانیشتووانی گوندەكان بە تایبەتی، دیاردەیەكی بەربڵاوە و زۆرجار كاری هونەریی دەستیی سەرنجڕاكێش بەرهەم دێنن.
سەرچاوە: سپوتنیك.