"کردنەوەی دەروازەی سنووری لە شنگال مەترسییەکی گەورە دروست دەکات"

سەرۆکی ئەنجوومەنیی قەزای شنگال ئاشکرای دەکات، حکوومەتی عێراق بەنیازە لە سنووری شنگال دەروازیەکی مەرزی لەگەڵ سوریا بکاتە، ئەمەش دەبێتە مەترسییەکی رژد بۆ سەر شنگال و ئێزدییەکان بێ ئومێد دەکات لە حکوومەتی عێراق، چونکە بە کردنەوەی ئەو دەروازەیە وادەکات پەکەکە و حەشدی شەعبی زیاتر لە شنگال بمیننەوە .

ئەمڕۆ پێنجشەم 18ی تەممووز، وەیس نایف سەرۆکی ئەنجوومەنیی قەزای شنگال بە "وشە"ی راگەیاند، حکوومەتی عێراق لەگەڵ پەکەکە رێککەوتووە لە ناوچەی خانەسۆری سەر بە شنگال دەروازەیەکی سنووری لە نێوان سووریا و عێراق بکاتەوە و لە ئێستادا گەیشتوونەتە رێککەوتن، حکوومەتی عێراق داوا دەکات لەو خاڵە سنوورییە ئاڵای سوریا ھەڵبدرێت و ھەموو رێکارەکانی تەواو بووە بۆ ئەوەی بکرێتەوە، ئێمەش وەک ئەنجوومەنی و ئیدارەی شەرعی شنگال بە فەرمیی داوامان کردووە ئەو دەروازە سنوورییە نەکرێتەوە، چونکە دەبێتە مەترسییەکی رژد بۆسەر شنگال و وادەکات پەکەکە و حەشدی شەعبی زیاتر لەو شارە بمینێنەوە، لەبەر ئەوەی داھاتەکەی بۆ ئەوان دەبێت .

سەرۆکی ئەنجسوومەنی قەزای شنگال دووپاتی دەکاتەوە، ماوەیەک پێش ئێستا ئەو خاڵە سنوورییە بەشێوەیەکی نە یاسایی کراوەتەوە و بەردەوام کەلوپەلی بەشێوەی قاچاغ لێ ھاوردە دەکرێت، بەڵام ماوەیەکە حکوومەتی عێراق دایخستووە و دەیانەوێت ئەو خاڵە سنوورییە بکەنە فەرمیی و حەشدی شەعبی و پەکەکە کاری بازرگانی لێ بکەن.

هەولێر/ بڵند ئیبڕاھیم