عەبدولمەهدی دان بە مەترسیداری دۆخی عێراق دادەنێت


تا دێت دۆخی بەسڕە بەرەو گرژی و ئاڵۆزی زیاتر دەچێت، دوای سووتانی بارەگاكانی رەوتی حیكمە، مەترسی كودەتا و تێكچوونی دۆخی تەناهی بووەتە هەڕەشە لەسەر باشووری عێراق. عادل عەبدولمەهدی سەرۆك وەزیرانی عێراق لە نامەیەكی كراوەدا، مەترسی تێكچوونی دۆخەكە بە عەمار حەكیم سەرۆكی رەوتی حیكمە دەگەیەنێ و دەپرسێ، خۆپێشاندانەكان لەكوێ كۆتاییان دێت؟.

ئەمڕۆ شەموو 20ی حوزەیران، دەقی نامەیەكی عادل عەبدولمەهدی سەرۆك وەزیرانی عێراق بۆ عەمار حەكیم سەركردەی رەوتی حیكمەی ئۆپۆزسیۆن بڵاو كرایەوە.

عەبدولمەهدی هەوڵی داوە لە شەش خاڵ سەرنجەكانی لەسەر دۆخی ئۆپۆزسیۆن لە عێراق و پرسی حكوومەتی زۆرینە و رووداوەكانی وڵاتانی ناوچەكە بەتایبەت ئەزموونی لبنان بخاتەڕوو. ئەو راستەوخۆی بە پرسیار لە لایەنگیری و ئۆپۆزسیۆن دەست پێ دەكات و پێی وایە ئەو دوو چەمكە بۆ ئێستەی عێراق ناڕوونە و بەكارهێنانی بە هەڵە مەترسی گەورە لەسەر دۆخی عێراق دروست دەكات، لەوێوە باس لە ئەزموونی لبنان دەكات لە رابردوودا.

سەرۆك وەزیران لە نامە درێژەكەیدا مەترسی خزان دەخاتەڕوو، ئەوەش بەبیر حەكیم دەهێنێتەوە كە عێراق دەیەوێت سیستەمێكی دەستووری دیموكراسی بنیات بنێت كە تا ئێستە ئەوەی لە عێراق هەیە سیستەمێكی لاوازە و دەستوەردانی زۆریش دەكرێت، بەتایبەت لە پرسی پێكهێنانی حكوومەت لە پشك پشكێنە و تایفگەرایی و ململانێی كەسایەتییە سیاسییەكان بۆ دەستگرتن بەسەر جومگەكانی حكوومەت، پێی وایە ئەمە تەنیا بە رێككەوتن چارەسەر دەبێت، بۆیە دەڵێ، ئەگەر لەسەر بنەمای سیستەمی پشتگیری و ئۆپۆزسیۆن هەنگاو هەڵگرین ئەوا دووچاری هەڵە دەبین، بۆیە هەر زوو ئەو بیرۆكەیەمان رەت كردەوە.

لە خاڵی سێیەمی نامە درێژەكەیدا باس لە پەكخستنی حكوومەت لە لبنان دەكات، باس لەوەش دەكات هەندێك هێز هەیە دەیەوێت پێڕەوی لە دیموكراسی بكات، بەڵام دواجار خراپ دەخلیسكێ و دووچاری كردەی مەترسیدار دەبێتەوە كە تەواو دژ بە دیموكراسیەتە.

لە خاڵی پێنجەمدا باس لە ئۆپۆزسیۆن بوون دەكات و دەڵێ، دوو جۆر ئۆپۆزسیۆن هەیە، ئۆپۆزسیۆنی دژ بە دەوڵەت و ئۆپۆزسیۆنی دژ بە حكوومەت و سیاسەتەكەی، دەخوازێ ئەوەی حەكیم دەستی داوەتێ لەوەی یەكەم نەبێت، گوتی "ئۆپۆزسیۆنی دژ بە حكوومەت و سیاسەتەكەی، زەروورەتێكە دەبێت هەبێت بەڵام بە مەرج، بە مانای ئەوەی حكوومەت زۆرینەیە و كەمینەش دەیەوێت پێگەی ئۆپۆزسیۆن بگرێت". 

زیاتر گوتی "ئەو حكوومەتەی دروست بووە دەرئەنجامی شكستی هێزە براوەكانی هەڵبژاردن بووە لە گەیشتن بە زۆرینەی سیاسی، ئەمەش ئەوانی ناچار كردووە بە رێككەوتن، ناكرێت ئەو دۆخە هەر هەمووی بخرێتە ئەستۆی حكوومەت، بۆیە ئەو حكوومەتەی هەیە، حكوومەتی چارەسەری كێشەكانە، بۆیە ئاسانە دەستنیشانی كەموكوڕییەكانی بكرێت، هاوكات ئاسانیشە خۆتان لە بەرپرسیاریەتی بدزنەوە و بیخە ئەستۆی كەسانی تر و خۆتان بەرانبەر بە رای گشتی وەها نیشان بدەن كە ئێوە رەخنەگرن و ئۆپۆزسیۆنن".

عادل عەبدولمەهدی لە عەمار حەكیم دەپرسێت، خۆپێشاندانەكان لەكوێ كۆتایین دێت و مەبەست لەو خۆپێشاندانانە چیە، ئایا بە شكست پێهێنانی حكوومەت كۆتایی دێت، ئەی ئەگەر حكوومەت دەستلەكاركێشانەوەی خۆی پێشكەش كرد، دواتر چی دەكرێت؟، ئایا ئامانجتان پەكخستنی بەرژەوەندی گشتییە تا حكوومەت هەڵوێستی دیاریكراو وەرگرێت، یانیش دەتانەوێت لە نەرێنییەكاندا ئۆپۆزسیۆن بن و لە ئەرێنییەكانیشدا داوای پشكی خۆتان بكەن.


لە ناكەمەكەدا كە عەبدولمەهدی واژووی لەسەر كردووە نەك وەك سەرۆك وەزیران، بەڵكو وەك كەسێكی ئاسایی و نامەكەش هیچ لۆگۆیەكی حكوومەتی عێراقی لەسەر نییە، هیوای ئەوە دەخوازێت كە خۆپێشاندانەكان بەشێك بن لە دەربڕینی رای گشتی و بە ئاراستەی بارگرژی نەچن، ئامانجیشی پاڵ پێوەنانی پڕۆسەی سیاسی و ئابووری و تەناهی بێت بۆ پێشەوە نەك پەكخستنی بەرژەوەندی گشتی، ئەگەر وابێت ئەوا پێشوازی لە وەها خۆپیشاندانێك دەكەین.

لە كۆتا خاڵی نامە درێژەكەیدا كە ئێوارەی ئەمڕۆ بۆ رای گشتی ئاشكرا كرا، سەرۆك وەزیران باس لە پڕۆسەی سیاسی دەكات و دەڵێ، دیموكراسیەت سەرەڕای هەموو كێماسییەكانی ئەوا باشترین بژاردەیە لەبەردەستمان بۆ حوكمڕانی وڵات لە رێگەی هەڵبژاردن كە لە دەستووریشدا وەك بنەمای حوكم لە عێراق دەستنیشان كراوە و رێزیش لە پێكهاتەكان گیردراوە، وەك دەگوترێت دیموكراتییەت بێ دیموكراتی نییە و دەستووریش بێ دەستوور نییە، كاتێك ئەو بنەمایە دەستەبەر بوو لەسەر هەمووان پێویستە كاری لەسەر بكەن و كێماسییەكانی پڕ بكەنەوە لە رێگەی دەنگدان لە هەڵبژاردن وەك بنەمایەك بۆ پێكهێنانی حكوومەت نەك لەسەر بنەمای تاك و پشك پشكێنە و تایفەگەرایی، بەڵكو لەسەر بنەمای بەرنامە و هاوسەنگی نیشتمانی، لەوكاتەشدا خۆپیشاندانەكان و ئۆپۆزسیۆن مانای راستەقینەی خۆیان وەردەگرن و پێرەوی كردنی پرسێكی ئاسایی دەبێت، تەنانەت پێویستیشە بۆ دەربڕین لە رای جەماوەر بۆ پرسێكی مەشرووع نەك بۆ پرسێكی تر.




وشە - فه‌رمان سادق


PM:08:42:20/07/2019




ئه‌م بابه‌ته 238 جار خوێنراوه‌ته‌وه‌‌



زۆرترین خوێنراو‌
بابەتی پێوه‌ندار ‌