ڕۆژی 23ی ئەم مانگە بە بەشداری نێردەی نەتەوە یەكگرتووەكان بۆ پرسی سووریا و لایەنەكانی ڕژێمی ئەسەد و ئۆپۆزسیۆنی سووریا و توركیا و ڕووسیا لە ئاستانەی پایتەختی كازاخستان، كۆنگرەیەك لەبارەی پرسی سووریا و چۆنیەتیی چارەسەكردنی گرفتەكان بەشێوەی ئاشتییانە دەبەسترێت، هاوكات ڕۆژی هەشتی مانگی داهاتوو شوبات/فێبرایەر، كۆنگرەیەكی تر لە جنێڤ بۆ گەیشتن بە ڕێككەوتن و كۆتاهێنان بە كێشەكانی سووریا دەبەسترێ، كورد لەو نێوەندەدا چ ڕۆڵێكی دەبێ و چارەنووسی كورد لە ڕۆژئاوای كوردستان چی بەسەر دێت، ئایا كۆنگرەكەی ئاستانە و جنێڤ چی بەسەر دۆخی سووریا دەهێنن و كورد لەو كۆنگرانەدا نوێنەری دەبێ و بەشداری دەكات.
ڕووسیا و توركیا دوای ماوەیەكی زۆر لە دانوستاندن و گفتوگۆ، لە كۆتادا گەیشتنە ڕێككەوتن و ڕۆژی 30 كانوونی یەكەم/دیسێمبەر، هەردوولا ئاگربەستیان ڕاگەیاند و گرووپەكانی ئۆپۆزسیۆن و بەشار ئەسەد بە فشاری ڕووسیا و توركیا لە حەلەب شەڕیان وەستاند و ئاگربەستەكە توانی بەردەوامی هەبێ، تا ئێستەش شەڕ لە حەلەب ڕووی نەداوەتەوە كە ماوەیەك بووبووە گۆڕەپانی گیان لە دەستدانی خەڵكی مەدەنی، بەهۆی بۆردمانی تۆپهاوێژ و فڕۆكەكان. بۆ لەیەك نزیككردنەوەی لایەنە ناكۆكەكانی سووریا ئەنكەرە و مۆسكۆ بڕیاریان دا لە ئاستانەی پایتەختی كازاخستان، كۆنگرەیەك بۆ لایەنە ناكۆكەكان لە ژێر سەرپەرشتی خۆیاندا ساز بكەن، بڕیارە كۆنگرەكەش لە 23ی ئەم مانگە دەست بەكارەكانی بكات.
ئەنەكەسە و لەشكری ڕۆژ بەشدار دەبن
لەبارەی بەشداری كورد لەو دوو كۆنگرەیە كە لە داهاتوویەكی نزیك ئەنجام دەدرێن، كاوە ئازیزی ئەندامی لیژنەی ناوەندی پارتی دیموكراتی سووریا بە "وشە"ی ڕاگەیاند، "لە كۆنگرەی جنێڤ لە چوارچێوەی هاوپەیمانی نیشتمانی سووریا كە هێزی سەرەكیی ئۆپۆزسیۆنی ڕژێمی ئەسەدە، ئەنجوومەنی نیشتمانی كورد لە سووریا بەشدار دەبێ و لە كۆنگرەی جنێڤ یەك و دووش بەشداریمان كردووە".
بۆ كۆنگرەی ئاستانەی كازاخستان، ناوبراو ئاماژەی دا كە لەلایەن ڕووسیا و توركیاوە داوا لە ئەنجوومەنی نیشتمانی كورد لە سووریا و لەشكری رۆژ/هێزی پێشمەرگەی ڕۆژئاوای كوردستان، كراوە كە بەشداری كۆنگرەكە بكەن و ئێستەش لە گفتوگۆدان لەگەڵ سەرپەرشتیكارانی كۆنگرەكە تا چۆنیەتیی بەشداریكردنەكە ڕێك بخرێت.
بەگوێرەی زانیارییەكانی "وشە"، لە كۆنگرەكەی جنێڤ و ئاستانەشدا پەیەدە و پەكەكە بەهیچ شێوەیەك ڕێگە بە بەشداریكردنیان نادرێت و توركیا بەشداری ئەوان قبووڵ ناكات. ئەمەریكا و نەتەوە یەكگرتووەكانیش پشتیوانی ئەو كۆنگرەیە دەكەن، چونكە ئامانجێكی بەستنی ئەو كۆنگرەیە ڕاگەیاندنی ئاگربەستێكی سەرتاسەرییە لەلایەن ئۆپۆزسیۆن و ڕژێمی ئەسەد لە تەواوی ناوچەكانی سووریادا.
فیدراڵیی ڕۆژئاوای كوردستان
كاریگەرییەكانی بەستی ئەو دوو كۆنگرەیە لەسەر داهاتووی سووریا و گەیشتن بە ڕێككەوتنی سیاسی و نەمانی شەڕ و ئاڵۆزی و داهاتووی كورد لە ڕۆژئاوای كوردستان، ڕوون و دیار نین. كاوە ئازیزی ئاماژەی دا كە جێگری وەزیری دەرەوەی ڕووسیا پێشتر گوتی پێویستە سووریایەكی فیدراڵ دروست ببێتەوە، بۆیە لە ڕۆژئاوای كوردستانیش فیدراڵیی بۆ كوردستان دروست دەبێ و ئێمەش پشتیوانی دەكەین و دەستمان كردووە بە نووسینی پڕۆژە دەستوورێك بۆ ڕۆژئاوای كوردستان. پەیەدەش لە كۆتادا شكست دێنێت، هەرچەند ئێمە ئامادەین بۆ یەكڕیزی و بەیەكەوەبوون، بەڵام ئەوان دان بە ئێمە نانێن و خۆشیان لە ئەنجامی سیاسەتی هەڵەیان تووشی شكست دەبن.
د. ساڵح عومەر پسپۆڕ لە زانستە سیاسییەكان بە "وشە"ی ڕاگەیاند، دەبێ كورد خۆی بۆ داهاتووی سووریا بزانێت چی دەكات و تا چەند ئامانج و بەرژەوەندییەكانی لەگەڵ سیاسەتی وڵاتانی زلهێز یەك دەگرێتەوە، خوێندنەوەیەكی دروستیش بۆ گۆڕانكارییەكان بكات. وڵاتان ئاگەدارن كە پەیەدە بە شێوەیەكی تاكڕەوانە ڕێگە نادات ئاوارەكان و سیاسییەكانیش بگەڕێنەوە زێدی خۆیان، ئیتر ئەمە سیاسەتێكی تەواو هەڵەیە. بۆیە تۆ ناتوانی داوای ماف لە وڵاتان بكەی كە تۆ مافی خەڵكی خۆت قۆرخ كردووە.
وڵاتان لەسەر سووریا ڕێك دەكەون
پسپۆڕێكی سیاسی لە زانكۆی سەڵاحەدین لەبارەی سیاسەتی نێودەوڵەتی و ئەگەری گۆڕانكارییەكان لە سووریا بۆ "وشە" گوتی، دوای هاتنەسەر دەسەڵاتی ترەمپ، پێشبینی دەكرێ نەرمی لە نێوان مۆسكۆ و واشنتنیش زیاتر ببێ بۆ ڕێككەوتن لەسەر داهاتووی سووریا و توركیاش نەرمی نواندووە.
د. ساڵح عومەر گوتی، ئێستە ڕووسیا و ئەسەد گرنگی بە پەیەدە نادەن و ئەوان لە كاتە پێویستەكان پەیەدەیان بەكار هێناوە، توركیاش ئەو نەرمی نواندنەی بەرامبەر ئەسەد لەو پێناوە بووە ڕێگری لە پەیەدە بكات، ئەگەر پەیەدە سیاسەتی خۆی نەگۆڕێ و كورد بەگشتی لە ڕۆژئاوا یەكڕیز نەبن، ئەوا لە پەیەدە و ڕۆژئاوا لە مەترسیدا دەبن.