لە دەستپێكی چالاكییەكی ڕۆشنبیریی ئیماراتدا، چەند شاعیر و هونەرمەندی كورد، بە خوێندنەوەی شیعر و موزیك و بابەت، خەڵكی ئەو وڵاتە بە ڕۆشنبیری و هونەری كورد دەناسێنن.
یەكێتیی نووسەران و ئەدیبانی ئیمارات، لە پڕۆگرامێكی یەك مانگیدا بە ناوی "قافات" بۆ ئەم ساڵ، لە دەستپێكی كارەكانیاندا، بە شەوێكی تایبەت بۆ ڕۆشنبیری كوردی تەرخان دەكەن و بڕیارە ئەمشەو سەعات حەوت بە كاتی ئیمارات لە ئیمارەی "شاریقە" بەڕێوە بچێت.
نەوزاد جەدعان شاعیرێكی ناسراوی ڕۆژئاوای كوردستانە و یەكێكە لە بەشداربووانی ئەو شەوە ئەدەبییە، بە "وشە"ی گوت: لەبارەی شیعری كوردی و هونەركاری لە توانا وفراوانیی كورد لە ئەدەبدا بابەتێك پێشكەش دەكەم.
ئەوەشی ئاشكرا كرد كە دەستپێكی ئەم چالاكییە ڕۆشنبیرییە بە ئەدەب و شیعری كورد، گرنگییەكی تایبەتی خۆی هەیە و دەتوانین لێرەوە پەیامی خۆمان بە تەواوی ئەو وڵاتانە بگەیەنین كە بەشداری چالاكییەكانیان كردووە.
ئەمشەو، لەلایەن "كەمال ئەحمەد" لەسەر مێژووی ڕۆشنبیری و هێماكانی، بەتایبەتی لە ئەدەبدا باس دەكات، پاشان نەوزاد جەدعان بابەتەكەی پێشكەش دەكات و دواتر شاعیر "لاوین ئەحمەد" چەند شیعرێك بە زمانی كوردی بە وەرگێڕانەوە پێشكەش دەكات.
هەر لەم شەوەدا، تیپێكی موزیكی ڕۆژئاوای كوردستان بە چەند گۆرانی و پارچە موزیكی فۆلكلۆری كوردی، شەوەكە زیاتر دەڕازێننەوە.
لەم پڕۆگرامەدا، ڕۆشنبیری و كولتووری ئەو میللەتانەی دراوسێی عەرەبن دەخرێنە ڕوو، لەوانە فارسی، ئەمازیغی، چەند میلەتێكی ئەفەریقی زۆری تر. لە پێگەی فەرمی خۆیشی یەكێتی نووسەران و ئەدیبانی ئیمارات بانگەشەی زۆریان بۆ ئەمشەو كردووە كە تایبەت بۆ شیعر و ئەدەب و كولتووری كورد تەرخان كراوە.