ژیان مۆبێرگ: زۆربەی خانمە مۆدێلەکان مەرجی بوون بە مۆدێلیان تێدا نییە

:: PM:12:21:17/08/2019 ‌

خانمە مۆدێل و ئەکتەر ژیان مۆبێرگ 15 ساڵ کاری مۆدێلی کردووە و لە لێدوانێکدا بۆ "وشە" دەڵێ، بەداخەوە زۆربەی خانمە مۆدێلەکان مەرجی بوون بە مۆدێلیان تێدا نییە لە ڕووی باڵا و کێشەوە.

ئەمڕۆ شەموو 17ی ئاب، خانمە مۆدێل و ئەکتەر ژیان مۆبێرگ تایبەت بە "وشە" ی ڕاگەیاند، من لە دنیای مۆدێلەوە ڕووم لە دنیای فیلم کردووە، چونکە بە هۆی تەمەنمەوە بە باشم زانی بچمە دنیای ئەکتەرییەوە و زیاتر گرینگی بە تواناکانی خۆم بدەم لەم بوارەدا.

زیاتر روونی دەکاتەوە، بەشداری یەک فیلمم کردووە و بەمزووانە لە فیلمێکی تر بەشداری دەکەم و سیناریۆی فیلمیشم نووسیوە و ئێستا خەریکی فیلمێکی درێژین لەگەڵ دەرهێنەر سۆران سۆرانی کە خۆم کاری نووسینی سیناریۆی ئەم فیلمەم کردووە و دڵنیام ئەم فیلمە بەشداری لە چەندین فێستیڤاڵی نێودەوڵەتی دەکات.

"تا ئێستا بەشداری هیچ ڤیدیۆ کلیپێکم نەکردووە و چەندین جار داوام لێ کراوە و خۆم قبوڵم نەکردووە، بەڵام هەرگیز لە کاری مۆدێلی پەشیمان نیم، چونکە لە کاری مۆدێلی خۆت دەناسیت لە ڕووی جلوبەرگ و هەڵبژاردنی جل و بەرگەکانەوە" ژیان مۆبێرگ وای گوت.

دووپاتی دەکاتەوە، هەندێک خانمە مۆدێل هەیە خۆی ناناسێت و نازانێت جلوبەرگ هەڵبژێرێت و خۆی بگونجێنێت لەگەڵ جلوبەرگەکانی، بەداخەوە زۆربەی خانمە مۆدێلەکان مەرجی بوون بە مۆدێلیان تێدا نییە لە ڕووی باڵا و کێشەوە، تەنیا هەندێکیان نەبێت مەرجی تەواویان تێدایە وەکو سانای شاجوانی کوردستان و ئازیز ئومێد و دێنا جەزا کە لەڕووی باڵا و کێشەوە گونجاون و هیچ جوانکارییەکیشیان نەکردووە، بۆیە مەرجەکانی بوون بە مۆدێل دەیانگرێتەوە و دەتوانین بڵێین ئەوان مۆدێلی ڕاستەقینەن.

هەولێر/ گەرمیان گلی





















وشە - هیدایه‌ت جان

ئه‌م بابه‌ته 256 جار خوێنراوه‌ته‌وه‌‌