دابەشكردنی مووچەی فەرمانبەرانی هەرێمی كوردستان بەردەوامە و بڕیارە سبەی وەزارەتێكی حكوومەتی هەرێمی كوردستان مووچە وەربگرن و لەگەڵ گەیشتنی پارەكەی بەغدایش دابەشكردنی مووچە خێراتر دەكرێ.
بەپێی زانیارییەكانی "وشە" سبەی مووچەی وەزارەتی دادی حكوومەتی هەرێمی كوردستان دابەش دەكرێ و وەزارەتی دارایی و ئابووری چاوەڕوانی ناردنی بەشە پارەی كوردستانە لەلایەن بەغداوە تا دابەشكردنی مووچە خێراتر بكرێ.
بەپێی ڕێككەوتنی نێوان هەرێمی كوردستان و عێراق لە ناوەڕاستی هەر مانگێك عێراق بڕی 452 ملیار دینار بۆ هەرێمی كوردستان دەنێرێت و بە داهاتی ناوخۆیی و پارەی هاوپەیمانان بۆ پێشمەرگە و فرۆشتنی نەوت مووچەی فەرمانبەران دەدرێت.
لە سەرەتای ئەمساڵ پاشەكەوتی مووچە لەسەر مووچەی فەرمانبەرانی هەرێمی كوردستان هەڵگیراوە و پێدانی مووچە ئاسایی بووەتەوە. لە پێنجی سەرەتای هەر مانگێك لە هەرێمی كوردستان مووچە دابەش دەكرێت.