حكوومەتی هەرێمی كوردستان ڕاگەیەندراوێكی بڵاو كردەوە و تیایدا داوا لە حكوومەتی توركیا و چەكدارانی پەكەكە دەكەن نەبنە هۆی زیانگەیاندن بە هاووڵاتییانی هەرێمی كوردستان.
ئێوارەی ئەمڕۆ دووشەم 19ی ئاب، حكوومەتی هەرێمی كوردستان ڕاگەیەندراوێكی بڵاو كردەوە و تیایدا هاتووە، ئەمڕۆ لە ئەنجامی بۆردمانی فڕۆكەكانی توركیا لە بناری قەندیل چەند هاووڵاتییەك برینداربوون و زیانی مادیشی لێكەوتەوە.
حكوومەتی هەرێمی كوردستان لە كاتێكدا هاوخەمی لەگەڵ زیانلێكەوتووانی ئەو ناوچەیە دەردەبرێت و نیگەرانە لەو بۆردمانە، داواش دەكات سەلامەتی هاووڵاتییانی هەرێمی كوردستان بپارێزێرێت و نابێت هاووڵاتیانی هەرێم ببنە ئامانجی بۆردمان.
حكوومەت لەهەمانكاتدا داوا لە چەكدارانی پەكەكە دەكات ڕەچاوی دۆخی ھاووڵاتییانمان و تایبەتمەندیی ھەرێمی كوردستان بكەن و چیتر نەبنە هۆكاری زیانگەیاندن بە ھاووڵاتییانی هەرێمی كوردستان.