پۆلیسی هاتوچۆی گەرمیان لە شارەدێی رزگاری، دەستی بەسەر نزیكەی 50 ماتۆڕسكیلدا گرت كە بێ سەرەتان و مایەی بێزاركردنی خەڵكن.
نەقیب كارزان مەجید بەرپرسی راگەیاندن و پێوەندییەكانی پۆلیسی هاتوچۆی گەرمیان، ئەمڕۆ چوارشەم بە "وشە"ی راگەیاند، بنكەی هاتوچۆی شارەدێی ڕزگاری لە درێژەی كار و چالاكییەكانیاندا و بە هاوكاری تیمەكانی پۆلیس لە ڕزگاری، بە مەبەستی دابینكردنی هاتوچۆیەكی سەلامەت و پاراستنی ئاسایش و ئارامی هاووڵاتییان و دانیشتووانی ناوچەكە، هەستان بە هەڵمەتی دەست بەسەرداگرتنی ماتۆڕسكیلی بێ سەرەتا و لێخوڕینی بێ مۆڵەت.
بەو هۆیەشەوە شەوی ڕابردوو دەستیان گرت بەسەر ژمارەیەكی زۆر ماتۆڕسكیلدا كە بێ سەرەتا بوون و ژمارەیەكیان شوفێرەكانیان بێ مۆڵەت بوون و هەروەها بووبوونە هۆی بێزاركردن و ئازاردانی هاووڵاتییان و شۆفێرانی تر.
بەهۆی دەنگی بەرز و خێرا لێخوڕینەوە، بەشێك لە شوفێرانی ماتۆڕسكیل بەردەوام هاووڵاتییان بێزار دەكەن، بەپێی زانیارییەكانی "وشە" ژمارەی ماتۆڕە گیراوەكان گەیشتووەتە 50 ماتۆڕسكیل و زۆربەی شۆفێرەكانی منداڵ و مێرمنداڵن.
هەژار حەمید وەك یەكێك لە شوفێرانی ماتۆڕسكیل بۆ "وشە" ئاماژەی دا، زۆر جار ئەو شوفێری ماتۆڕسكیلانەی كە بژێوی ژیانیان لەسەر ماتۆڕسكیلە و بۆ كاركردن بەكاری دەهێنن، لەم هەڵمەتانەدا زیانیان بەردەكەوێت و بە پێویستی دەزانێت پۆلیس رەچاوی ئەم حاڵەتانە بكات.
هیوا حەسەن وەك شۆفێرێك كە ماتۆڕەكەی دەستی بەسەردا گیراوە هێشتا تەمەنی نەگەیشتووەتە 18 ساڵ و گوتی، دەرفەتی دەرهێنانی مۆڵەتی نەبووە و ترساوە لەوەی بەهۆی تەمەنیەوە مۆڵەتی پێ نەدرێت.
نزیكی گەرمیان لە ئێران و ناوچەكانی ناوەڕاستی عێراق رێخۆشكەرە بۆ هاتنی ماتۆڕسكلیلی بێ سەرەتا.
گەرمیان/ سەبری هۆرێنی