بۆ یەكەمجار لە سنووری شارۆكەی پێنجوێن جووتیارێكی گەنج كەلەرم و قەرنابیت
بەرهەم دەهێنێت و داوای رێگەگرتن لە هاوردەی بەرهەمی دەرەكی دەكات.
ئەمڕۆ شەموو 24ی ئاب، ئەرمەن كەریم بە "وشە"ی راگەیاند، هەرچەندە
لە پێنجوێن ساڵانە لە وەرزی هاویندا چەندین جۆری جیاوازی میوە و سەوزە بەرهەم دێت،
بەڵام لەمساڵدا جیاواز لە جووتیارانی تر کەلەرم و قەڕنابیتم بەرهەم هێناوە.
زیاتر روونی دەکاتەوە، هۆكاری ئاشنا نەبوونی جووتیارانی ئەو ناوچەیە یان
حەزنەكردنە بەم دوو بەرهەمە كشتوكاڵییە كە لە لایەن خەڵكییەوە خواستێكی زۆری لەسەرنییە
و ترسی ئەوەیان هەیە بۆیان ساغ نەبێتەوە، یانیش هۆکاری بێ ئەزموونییە لە
بەرهەمهێنانی ئەو دوو بەرهەمە کە سەرباری ئەوەش تا ئێستا رۆژانە كەلەرم و قەرنابیتێكی
زۆر لە رێگەی مەرزەكانی پێنجوێنەوە هاوردەی هەرێم دەكرێت.
"لەمانگی پێنجەوە شەتڵی هەردوو بەرهەمەكەمان
چاندووە و وەك هەر بەرهەمێكی تری كشتوكاڵی پێویستی بە كووت و دەرمان و ئاودان هەیە
و رێژی كەلەرمەكە "20" نەوارە، كە هەر نەوارێك 1000 مەتر دەكات و قەرنابیەتەكەش
سێ نەوارە" ئەرمەن کەریم وای گوت.
ئەو جووتیارە گەنجەی پێنجوێن داوای رێگری کردن لە هاوردەی بەرهەمە
کشتوکاڵییەکان دەکات وەک پاڵپشتی و هاندان بۆ جووتیارانی ناوخۆ و پێی وایە خاکی
کوردستان ئەوەندە بەپیتە کە بتوانێت وەڵامدەرەوەی داخوازی دانیشتووانی بێت.
شارۆكەی پێنجوێن بەهۆی گونجاوی كەشوهەوا و زەوییەوە، ساڵانە لە وەرزی
هاویندا چەندین جۆری بەرهەمی كشتوكاڵی دەخاتە بازاڕەكانەوە و لە لایەن هاووڵاتییانەوە
بەردەوام خواستیان لەسەرە.
پێنجوێن/ رێبین پێنجوێنی