وەزارەتی كارو كاروباری كۆمەڵایەتی حكوومەتی هەرێمی كوردستان و زانكۆی كوردستان لە هەولێر رێككەوتنێكیان واژوو كرد، كە بەپێی رێككەوتنەكە لە پێدانی زانیاری و پڕۆژە و ئەو توێژینەوانەی پەیوەستە بە كۆمەڵگەی كوردستانی هاوكاری یەكتر دەكەن.
ئەمڕۆ سێشەم لە راگەیەنراوێكی وەزارەتی كارو كاورباری كۆمەڵایەتی حكوومەتی هەرێمی كوردستان بڵاوكراوەتەوە تێیدا هاتووە، وەزارەتی كارو كاروباری كۆمەڵایەتی و زانكۆی كوردستان/هەولێر رێككەوتننامەی لەیەكگەیشتنیان واژوو كرد بەمەبەستی هەماهەنگی درووست كردن لەنێوانیان.
لەراگەیەنراوەكەدا هاتووە، بەپێی ئەو رێككەوتننامەیە هەردوو لایەن ئاسانكاری بۆ یەكتر ئەنجام دەدەن لە پێدانی زانیاری و پڕۆژە و ئەو توێژینەوانەی پەیوەستە بە كۆمەڵگەی كوردستانی لەگشت ئەو بوارانەی كە كاری وەزارەتن.
لەبەشێكی تری راگەیەنراوەكەدا ئاشكرا كراوە، هەردوو لایەن ئامانجیان بنیاتنانی پردی پێوەندییە لە رێگەی ئەنجامدانی پڕۆژە زانستییەكان و سوود گەیاندن بە كۆمەڵگەی كوردستان، هەروەها لەو بوارانەی كە ئەرك و پسپۆریەكانی وەزارەت و زانكۆی كوردستان دەگرنە خۆ و سوودی درێژخایەن بە كۆمەڵگە دەگەیەنن.