قایمقامیەتی هەولێر ئاشكرای دەكات لە یەكێك لە مۆڵەكانی هەولێر سەنتەرێكی جوانكاری داخرا بەهۆی هاوردەكردنی كەلوپەلی نەشیاو و ڕێپێنەدراو.
ئەمڕۆ شەموو 14ـی ئەیلوول، قایمقامیەتی هەولێر بڵاوی كردووەتەوە، لیژنەی بەدواداچوون و چاودێری دەرمان كە پێكهاتووە لە بەڕێوەبەرایەتیی كۆنترۆڵی جۆریی دەرمان، بەڕێوەبەرایەتی نەهێشتنی تاوانی ڕێكخراو سەربە ئاژانسی پاراستن و لەڕێی بەشی پۆلیسی شارەوانی هەولێر، سەنتەرێكی جوانكارییان لە هەولێر داخست.
روون كراوەتەوە، سەنتەرەكە بەناو جوانكاری دەكەوێتە ناو تابلۆ مۆڵ لە شاری هەولێر، بەهۆی هاوردەكردن و هێنان و بەشێوەیەكی نایاسایی و فرۆشتنی دەرمانی رێپێنەدراو و نەشیاو داخرا.
ئاشكرا كراوە، هەموو ئەو دەرمانە نایاساییانە لەلایەن لیژنەكەوە دەستی بەسەردا گیرا و بەڕێوەبەرایەتی كۆنتڕۆڵی جۆری دەرمان هەموو شوێنەكانی سەنتەری جوانكاری و دەرمانخانەكان ئاگەدار دەكاتەوە، مامەڵە بە ئەم دەرمانانە نەكەن بەپێچەوانەوە خۆیان بەرپرس دەبن بە توندترین شێوە سزا دەدرێن، چونكە ئەم دەرمانانەی زیان بە تەندروستی مرۆڤ دەگەیەنن.