كتێبخانەی گشتیی كەركووك لە ساڵانی 1932-1936 بەشێوەیەكی كاتی دامەزراوە و لە سەرەتادا سەر بە (دائیرەی مەعاریف)ی كەركووك بووە و ژمارەیەك لە مامۆستایانی شارەكە سەرپەرشتییان كردووە، دوا بە دوای بەخشینی پارچە زەوییەك لەلایەن بنەماڵەی سەید ئەحمەدی خانەقا، لە ساڵی 1937دا بە فەرمی كراوەتەوە. شادیە بەكر محەمەد بەڕێوەبەری كتێبخانەی گشتیی كەركووك لە دیدارێكی "وشە"دا زانیارییەكان لەبارەی كتێبخانەكەیان دەخاتە روو.
32 هەزار ناونیشانیان هەیە
بەڕێوەبەری كتێبخانەی گشتیی كەركووك روونی دەكاتەوە، كۆی گشتیی كتێبە پۆلێنكراوەكانیان دەگاتە 32 هەزار ناونیشان، كتێبەكان بەسەر بوارەكانی، سیاسی، ئابووری، یاسایی، كولتووری، رۆشنبیری، زمانەوانی، مێژوویی، كۆمەڵناسی، زانستی و گەلێكی تر دابەش دەبن. ئەو دەڵێ، "ژمارەیەكی زۆریشمان هێشتا پۆلین نەكردووە و هەوڵ دەدەین لە فەوتان ڕزگاریان بكەین و بیانخەینە ناو پۆلێنەكەوە. كتێبەكانیشمان بە زمانەكانی كوردی، عەرەبی، توركمانی، ئینگلیزی و سریانین".
مانگانە 300 كەس سەردانیان دەكەن
شادیە بەكر دەڵێ، "هاموشۆكارانمان لە سەرجەم چین و توێژەكانی كۆمەڵگەن و زۆربەیان توێژەرەكانی ماستەر و تێزەكانی دكتۆرا و قوتابییانی زانكۆی كەركووكن. تۆماری تایبەتیشمان بۆ تۆماركردنی ئەو كەسانە داناوە كە بۆ خوێندنەوە و خواستنی كتێب سەردانی كتێبخانەكەمان دەكەن و تێكڕای مانگانەی هاموشۆكارانمان دەگاتە نزیكەی 300 كەس".
زیندووكردنەوەی كولتووری خوێندنەوە
شادیە بەكر ئاماژە بەوە دەدات، "بەهۆی سەرقاڵبوونی قوتابییان و توێژەران بە گەڕان لە ماڵپەڕە ئەلیكترۆنییەكاندا رێژەی 50%ی ئەركی سەرشانی ئێمەیان سووك كردووە، بەڵام ئێمە هەمیشە هەوڵمان داوە بە كتێبەوە بەندیان بكەین و زۆرترین خوێنەر لە خۆمان كۆ بكەینەوە".
زیاتر دەڵێ، "بۆ ئەم مەبەستەش ساڵی پار زنجیرەیەك كۆڕ و سیمینار و وۆركشۆپمان لە هۆڵی كتێبخانەدا كردووەتەوە و چەندان توێژەر لێكۆڵینەوەی خۆیان لەبارەی ئەو پرسە پێشكەش كردووە. مامۆستایانی بنەڕەتی و دواناوەندییەكانیش هاوكارمانن بۆ سەرخستنی ئەم ئامانجە و هاوكاری سەرەكیمانن بۆ هاندانی قوتابییان لە نووسینەوەی ڕاپۆرت و بڵاوكراوەكانی سەر دیوار لە قوتابخانەكاندا".
گەڕان بەدوای كتێب لە كتێبخانەی كەركووكدا
بەڕێوەبەری كتێخانەی گشتی كەركووك روونی كردەوە، "بەهۆی ژمارەیەك كارمەندی پسپۆڕ لە كۆمپیوتەر، توانیومانە سیستمی كۆنی پۆلینكردن و گەڕان بە دوای كتێب نەهێڵین و سیستمی ئەلیكترۆنی پێڕەو بكەین، واتە ئەگەر داواكارەكە تەنیا ناوی سەرچاوەكە یان ناوی نووسەرەكەی بزانێت، ئێمە یەكسەر سەرچاوەكەی بۆ دەدۆزینەوە و ڕێنوێنیی دەكەن".
دوو جۆر خواستنیان هەیە
بەگوتەی بەڕێوەبەرەكە، "ئەوانەی سەردانمان دەكەن، بە دوو شێوە كتێبەكانمان دەخوازن، جۆرێكیان كاتییە و بۆ ماوەی چەند سەعاتێكە و كتێبەكان نابردرێنە دەرەوەی كتێبخانە، خوازەر هەر لە هۆڵی خوێندنەوەدا مەبەستی خۆی دەپێكێت. لەم بارەدا كتێبەكان بە بیمەی هەر ناسنامەیەك بێت وەردەگیرێن. جۆری دووەمی خواستن، خواستنی دەرەكییە كە دەكارێن بۆ ماوەی 10 ڕۆژ كتێبەكە ببەنە دەرەوە و پاشان بیگەڕێننەوە، ئەگەریش لەو 10 ڕۆژەدا كارەكەی تەواو نەبوو، دەتوانێ هەمان سەرچاوە بۆ 10 ڕۆژی تر بخوازێتەوە و فۆرمی خۆراكی خۆی وەك بیمە لەلای ئێمە بهێڵێتەوە. جاری واش هەیە كەسەكە لای ئێمە ناسراوە و جێگەی متمانەمانە، بۆیە هیچ بیمەیەكی لێ وەرناگرین".
كتێبخانەی بەخشراو
یەكێك لە هەڵوێستە هەرە ئەرێنییەكانی ڕۆشنبیران لە كەركووك، بەخشینی كتێبخانە تایبەتەكەیانە بە كتێبخانەی گشتیی كەركووك. وەك شادیە بەكر دەڵێ، "ژمارەیەك لە ڕۆشنبیران و كەسایەتییەكانی ئەم شارە وەك وەفایەك بۆ كتێبخانەكەمان، كتێبەكانی خۆیان دەبەخشن. هێندێكیان هێشتا لە ژیاندا ماون ئەم كارەیان كردووە و هێندێكی تریان لەپاش مردنیان، خانەوادەكەیان ئەم كارە دەكەن. ئێمەش بۆ بەزیندوو ڕاگرتنی ناوی ئەم بەخشەرانە، لە قوژبنێكی تایبەتدا دەیانپارێزین و نمایشیان دەكەین و بە تابلۆیەك ناوی بەخشەرەكەی لەسەر تۆمار دەكەین".
دوو شەفت دەوام دەكەن
"دەوامی ڕۆژانەی فەرمانبەرانی كتێبخانەكەمان لە سەعات هەشتی بەیانی تا چواری پاش نیوەڕۆ بەردەوامە، جاری واش هەیە وا پێویست دەكات درەنگتر دەرگەی كتێبخانەكە دابخەن.
ئەو دەڵێ، "كێشەی سەرەكیی ئێمە نەبوونی كارەبای بەردەوامە، زۆرجاریش داوامان كردووە وەك شەقامی پزیشكان كارەبای بەردەواممان بدەنێ، هەرچەندە موەلیدەشمان هەیە و سووتەمەنیی پێویستمان لەلایەن كۆمپانیای دابەشكردنی بەرهەمەكانی نەوتییەوە بۆ دابین دەكرێت".
داواكارییان هەیە
"داواكارییەكی ترمان لە پارێزگاری كەركووك كردووە كە دوو فەرمانبەری خزمەتگوزارمان بە گرێبەستی پترۆدۆلار بۆ دابمەزرێنێت، چونكە كتێبەكان بە بەردەوام پێویستیان بە خاوێنكردنەوە هەیە و ڕۆژانەش دەبێ دەستێك بە مێز و كورسیی هۆڵەكاندا بهێنرێت، كە لە ئێستەدا فەرمانبەرانمان سەرباری كارەكانی خۆیان، كاری خاوێنكردنەوەش دەكەن".
تەلاری كتێبخانەی گشتیی كەركووك یەكێكە لە سیمبۆلەكانی شارەكە و ناوبەناو كاری نۆژەنكردنەوەی بۆ دەكرێت. هەڵكەوتەی جیۆگرافیایشی نزیكە لە پردی خەبات و لە بەری ڕۆژئاوای چەمی خاسە ڕوو لە قەڵای دێرینی كەركووك، جوانییەكی داوەتە شارەكە.
لە 20ی تشرینی یەكەمی 2016 كاتێك چەكدارانی داعش پەلاماری شارەكەیان دا، چەند فیشەكێك بەر تەلاری كتێبخانەكە كەوت و زیانی بەركەوت. تەلاری ئەو كتێبخانەیە لەسەر هەمان ئەو پارچە زەوییەیە كە ساڵی 1937 لەلایەن بنەماڵەی سەید ئەحمەدی خانەقا بۆ دروستكردنی كتێبخانەكە بەخشراوە.