ڕووداوەكەی ئەزمەڕ فڕۆكەی بێفڕۆكەوان ئەنجامی داوە

دەزگای ئاسایشی هەرێمی كوردستان ئاشكرای دەكات، فڕۆكەی بێ فڕۆكەوانی توركیا هێرشی كردووەتە لەسەر چیای ئەزمەڕ و دوو سەركردەی پەكەكەی كردۆتە ئامانج.

ئەمڕۆ سێشەم 22ـی تشرینی یەكەم، لە ڕاگەیەندراوێكی دەزگای ئاسایشی هەرێمی كوردستان هاتووە، رووداوەكەی 15ی ئۆکتۆبەری 2019 ی چیای ئەزمڕ لە سەعات  5:10 خولەكی دوانیوەڕۆ، دوو كادیری باڵای پارتی كرێكارانی كوردستان بەناوەكانی (جەمیل) و (دەمهات) لەسەر شاخی ئەزمەر لە ناوچەیەكی گەشتیاری و لەناو خەڵكی مەدەنیدا بەشێوەیەكی دڕندانە كراونەتە ئامانج.

 

ئاسایش ڕوونی كردووەتەوە، ئەو دوو ئەندامە بەبێ ئاگاداری لایەنە پێوەندیدارەكانی حكوومەتی هەرێمی كوردستان هاتوونەتە ئەو ناوچەیە و دوای لێكۆڵینەوەی چڕوپڕ و بەدەستهێنانی بەڵگەی پێویست لە شوێنی روودانی تاوانەكە، بۆمان دەركەوتووە كە ئەو دوو ئەندامە باڵایەی كۆما جڤاكێن كوردستان (كەجەكە) لەلایەن فڕۆكەی بێ فڕۆكەوانی توركیا و لەناو خەڵكی مەدەنی و لە شاری سلێمانی لە شوێنی گەشتیاریدا كراونەتە ئامانج و ئەمەش پێشێلكاری و دەستپێشخەری و پێشهاتێكی مەترسیدارە و بە هیچ جۆرێك خزمەت بە ئاسایشی هاوبەش و پێكەوەژیان ناكات.

 

باس لەوەیش كراوە، داوا لە هەموو لایەك دەكەین خاكی عێراق و كوردستان بەكار نەهێنن بۆ هێرشكردنە سەر وڵاتانی دراوسێمان، هەرچەندە پێویستە هاووڵاتییان ئاگاداربن لەو راستییەی كە ئاسمانی هەرێمی كوردستان لەژێر كۆنترۆڵی دەسەڵاتی فڕۆكەوانی مەدەنی عێراقییە و ئەو رادارەی كە كەشفی ئاسمانی كوردستان دەكات لەژێر كۆنترۆڵی هەرێمی كوردستان نییە، لە هەمان كاتدا دڵنیایی دەدەین بە كۆمەڵانی كوردستان، دڵسۆز و تێكۆشەر و ئاشتیخوازی كوردستان و دانیشتووانی شاری سلێمانی كە بە هەموو توانا كار دەكەین بۆ پاراستنی سەروەری و ئاسایش و ئارامی خەڵكی كوردستان و هەموو هەوڵێك دەدەین ئەو كردەوە مەترسیدارە دووبارە نەكرێتەوە.

لەکاتی ڕووداوەكەی 15ـی ئۆكۆتبەر پۆلیسی سلیمانی بڵاوی كردەوە كە نارنجۆكێك بووە و ئەو دوو هاووڵاتییەی كردووەتە قوربانی.