بەشێكی زۆری زێدەڕۆكانی سەرشەقام و ناو بازاڕەكان، لادەبرێت و ئەمڕۆ هەڵمەتێكی تایبەت كرا بەناو بازاڕی تایەفڕۆشانی هەولێر كە سەر شۆستەكە بە تەواوەتی گیرابوو.
هەڵمەتی لابردنی 100 كەپر و قەفەز و كابینە و ژووری دروستكراو لە ساندویچ پەنەڵ بەشێوەی زێدەڕۆیی
ئەمڕۆ یەكشەم هەشتی كانوونی یەكەم، بەڕێوەبەرایەتی شارەوانیی شەشی هەولێر بڵاوی كردووەتەوە، هەڵمەتی لابردنی 100 كەپر و قەفەز و كابینە و ژووری دروستكراو لە ساندویچ پەنەڵ بەشێوەی زێدەڕۆیی لەسەر شۆستە و شەقامی سەرەكی تایەفرۆشان لە ناوچەی پیشەسازی باشوور ئەنجام درا.
ڕوون كراوەتەوە، ئەو هەڵمەتە لە سنووری بەڕێوەبەرایەتی شارەوانیی شەش بووە و بووە هۆكاری پاككردنەوەی گۆڕەپانی ئەو شوێنە لە كەلوپەلی زێدەڕۆیی تایەفرۆشان.
باس لەوەش كراوە كە هەڵمەتەكە بەهاوكاری پۆلیسی شارەوانی و بەشی نەهێشتنی زێدەڕۆیی هێزی زێرەڤانی بوو، ئەوەیش دوای ئاگەدار ردنەوەیان و پێدانی مۆڵەتی یاسایی بۆ لابردنیان و دوابەدوای ڕەزامەندیی هەریەكە لە قایمقامییەتی قەزای ناوەندی هەولێر و سەرۆكایەتی شارەوانیی هەولێر، هەڵمەتەكە ئەنجام درا.
دەست پێكردنی ئەو هەڵمەتە لە كاتێكدایە پێشتر هەفتەنامەی "وشە" لە ڕێی كۆمەڵێك ڕاپۆرت چەندان سەرپێچی ئاشكرا كردبوو كە كراوەتە سەر موڵكی گشتی و بووبووە هۆكاری بێزاركردنی هاووڵاتییان، دوای ئەو ڕاپۆرتانە شارەوانیی هەولێر هەڵمەتێكی فراوانی دەست پێ كردووە بۆ لابردنی ئەو زێدەڕۆیانە.