نەك تەنیا گۆشت، زۆربەی خۆراكەكان بە گشتی، هەرگیز نابێ بە خاوی بخورێن، تەنانەت بە نیمچە كوڵاویش خراپە، توێژەران هەمیشە دووپاتی لەسەر دەكەنەوە.
ئەو خواردنانەی كە نابێ بە خاوی بخورێن ئەمانەن: گۆشت، پاقلەمەنییە وشككراوەكان، دانەوێڵە، هێلكە.
ژەهراوین و دەبنە هۆی کەمبوونەوەی ئاسن
بەروبوومە پاقلەمەنییە وشكەكان بەخاوی مادەیەكیان تێدایە كە بە بڕی زیاد ژەهراوییە بۆ مرۆڤ، بە تایبەتی فاسۆڵیای سوور. رێژەی ئەم مادەیە لە فاسۆڵیای سووری خاو دەگاتە 20،000 – 70،000 یەكە، كەچی پاش كوڵاندن ئەم رێژەیەی كەم دەبێتەوە بۆ 400-200 یەكە. هەروەها فاسۆڵیای سپی، پاقلە، پاقلەی سۆیاش رێژەیەكی كەمی ئەم مادەیە لەخۆ دەگرن.
ترشی فایتیك بەشێوەیەكی سروشتی لە دانەوێڵەی خاودا هەیە و دەبێتە ئەگەری كەمبوونەوەی رێژەی كانزای ئاسن و كانزای زینك (تۆتیا)، بە كوڵاندنی دانەوێڵە رێژەی ترشی فایتیك تا پتر لە 50% دادەبەزێت. گەلێك مادە لە هێلكەی خاودا دەبنە هۆی كەمبوونەوەی بەهای خۆراكی هێلكە، بۆ نموونە پرۆتینی كۆنالبومین لەگەڵ كانزای ئاسندا یەك دەگرێت و لەش ناتوانێت سوودی لێ وەربگرێت، پرۆتینی ئەڤیدین Avidin لەگەڵ بایۆتیندا Biotin كە سەر بە كۆمەڵەی ڤیتامین B یـە، یەك دەگرێت و رێگە لە هەڵمژینی دەگرێت لە كۆئەندامی هەرسدا، بە كوڵاندن یان برژاندنێكی باشی هێلكە ئەم پرۆتینانە دەگۆڕێن و ئەم زیانانەیان نامێنێت.
هەروەها بە كوڵاندن یان برژاندنی هێلكە، سەلامەتی تەندروستی زیاتر مسۆگەر دەبێت.