دوای ئەوەی لە ماوەی رابردوودا پۆلیسێكی ئەمەریكی لە كاتی هەوڵی گرتنی كەسێكی رەشپێست، بە خراپی مامەڵەی لەگەڵدا كرد و بووە هۆی گیانلەدەستدانی، ئەوەیش توڕەیی خەڵكێكی زۆری دروست كرد، لەوساتەوە پێشێوی چەندان شاری ئەمەریكای گرتووەتەوە، ئینتفاز قەنبەر، سیسەتوانی عێراق لە واشنتن، تیشك دەخاتە سەر راستی و لێكەوت و هۆكارەكانی ئەو دۆخەی دروست بووە.
دیموكراتەكان دەڵێن، دەنگ بە بایدن بدەن ژیان ئاسایی دەكەینەوە
ئەمڕۆ سێشەم قەنبەر بە "وشە"ی راگەیاند، هۆكاری سەرەكیی ئەوەی روودەدات و ئەو خۆپێشاندانانەی دەیانبینین، كوژرانی كەسێكی رەشپێستی بە رەگەز ئەفریقی بەناوی جۆرج فڵۆید، بە شێوەیەكی دڕندانە و لە هەڵسوكەوتێكی نادروست لەلایەن پۆلیسێك كە دەگاتە ئاستی تاوان، بەڵام ئەوەی باس دەكرێت بە بوونی نیازی رەگەزپەستانە لەو تاوانەدا نییە، بەتایبەتی لەلایەن میدیاكانی ئەمەریكا و دنیا، چونكە لە ئەمەریكا پۆلیسی فیدراڵی بوونی نییە، كە هەموو ئەمەریكا رووماڵ بكات، واتە لە ئەمەریكا پۆلیس دەسەڵاتێكی ناوخۆییە لە شار و هەرێم و ویلایەتێك، بۆیە ئەو هەڵەی ئەو پۆلیسە كردوویەتی، لەلایەن پۆلیسی ناوخۆیی بووە.
زیاتر گوتی، لە شارە گەورەكانی ئەمەریكا وەك واشنتن و نیویۆرك و شیكاگۆ و ئەتلانتا، هەموو بەڕێوەبەرانی پۆلیس لەو شارانە لە كەسانی رەشپێستن و لە دیموكراتەكانن، هەروەها سەرۆك شارەوانیەكانیان، زیاتر لە رەشپێستە ئەفریقیاییەكانن، تەنانەت ئەنجوومەنی شارەوانییەكانیش، بۆیە كەمتەرخەمی ئەو پۆلیسە دەكەوێتە ئەستۆی پۆلیسی ناوخۆیی كە فەرماندەكەی كەسێكی رەشپێستە، بۆیە ناكرێت پاڵنەری رەگەزپەرستی هەبووبێت و حكوومەتی فیدرال و واشنتن بەرپرسیار نین لەو بابەتە.
قەنبەر روونی كردەوە، كێشەكە ئەوەیە هەركاتێك كەسێكی رەشپێست دەكوژرێت، لەبەر هۆكاری سیاسی بابەتەكە گەورە دەكرێت، پارتی دیموكراتی سوود لەو دۆسیە دەبینێت كە پشت بە بابەتی رەگەزپەرستی و ترساندنی خەڵك لە رەگەزپەرستی دەبەستێت، بەڵگەیش ئەوەیە باراك ئۆباما، كە هەشت ساڵ سەرۆك بووە و نزیكەی 100 ملیۆن سپیپێست دەنگیان پێی دا، دێتە سەر شاشەكان و دەڵێت، بردنەوەی ترەمپ بەهۆی لاگیریی رەگەزپەرستی بوو و باسی رەگەزپەرستی دەكات، بۆیە ئەو بابەتە بۆ هەڵبژاردنی سەرۆكایەتی سوودی دەبێت بۆیان.
سەبارەت بە هۆكاری تری خۆپێشاندانەكان، قەنبەر گوتی، پاڵنەری دووەم، ئەو دزی و تاڵانكردنە بوو كە كەسانێكی تاوانكار ئەنجامیان دا، پاڵنەری سێیەم، پشێوخوازە رێكخراوەكانن كە رێكخراوێك سەرپەرشتیان دەكات و بەمدواییە دۆناڵد ترەمپ داوای كرد بخرێتە ناو لیستی تیرۆر بەناوی "ئەنتیفا"، واتە ئەوانەی دژی فاشیەتن، كە هاوشێوەی كڵاوشینەكانی رەوتی سەدری عێراقن، كاتێك دەچنە ناو خۆپێشاندانەكان توندوتیژییەكی رێكخراو دروست دەكەن، بۆیە ئەوان پاڵپشتی داراییان هەیە و رێكخراون و ماتۆرسكیل دەیانگوازێتەوە لە شوێنێك بۆ یەكێكی تر، ئەوانن ئۆتۆمبێلەكانی پۆلیس دەسووتێنن، ئەوكاتەی ترەمپ بردییەوە، ئەوكاتیش پشێویان دروست كرد.
ئەو سیاسەتوانە روونی كردەوە، بۆیە سێ جۆری ناڕەزایەتیكرا هەن، ئەوانەی راستەقینەن و لە دیمەنەكە توڕەن، دز و تاڵانچییەكان، و پشێوخوازە رێكخراوەكان كە مەبەستی سیاسیان هەیە، بۆیە پارتی دیموكراتی سوود لەو هەلە دەبینێت، چونكە دەیەوێت بە گەلی ئەمەریكا بڵێت سەردەمی ترەمپ سەردەمێكی ناسەقامگیری و توندوتیژی و وێرانكارییە، بۆیە دەنگ بە جۆ بایدن بدەن، ئێمە ژیان ئاسایی دەكەینەوە، كە ئەو قسە راستەقینە نییە، چونكە ئەو رووداوانە لە سەردەمی هەموو سەرۆكەكان هەبووە، لە 1992 كەسێك بەناوی رۆدنی كینگ، كە وێنەی گیراوە و چوار پۆلیس ئازاری دەدەن و بووە هۆی دروستبوون راپەڕین و پشێوی لە ئەمەریكا وەك ئەوەی ئێستە روودەدات.
قەنبەر ئاماژەی كرد، لێرە لە واشنتن خۆپێشاندەران وێرانكاریان دروست كرد و قسەی نەشیاوانیان لەسەر كۆتەڵی جەنگی دووەمی جیهانی نووسی، ئەو كۆتەڵە چ پێوەندی بە كوشتنی ئەو كەیسەوە هەیە؟، ئەوان هەوڵیان دا هەڵبكوتنە سەر كۆشكی سپی، سووتانی ئاڵای ئەمەریكا، پێوەندی بە كوشتنەكەوە نییە، رووداوەكە ناوخۆییە و بەرپرس لێی بەڕێوەبەری پۆلیسە كە خۆی رەشپێستە، پێم وایە گەورەكردنی بۆ بابەتێكی رەگەزپەرستی راست نییە.
شایەنی باسە ئەمڕۆ سێشەم مارك ئیسپەر، وەزیری بەرگری ئەمەریكا فەرمانی بە جووڵاندنەوەی دوو كەتیبەی پۆلیسی سەربازی و فرقەی 82ی گوازراوەی ئاسمانی بەرەو واشنتنی پایەتەخت دەركرد، لەوكاتەی پنتاگۆن ئاشكرای كرد كە 1500 ئەندامی پاسەوانی نیشتمانی لە پێنج ویلایەتی ئەمەریكا بانگهێشت كردووە بە مەبەستی بڵاوەپێكردنیان لە واشنتن، بەوەیش ژمارەی پاسەوانانی نیشتمانی لە پایەتەخت لە ماوەی چەند سەعاتی داهاتوو دەگاتە 2800 ئەندام، ئەوەیش لە چوارچێوەی هەوڵەكان بۆ رووبەڕووبوونەوەی پەرەسەندنی پشێوییەكان بەهۆی كوژرانی كەسێكی رەشپێست لە شاری مینیا پۆلیس لە ویلایەتی مینیسووتا بەناوی جۆرج فلوید، كە دیمەنی ئازاردانەكەی لەلایەن پۆلیسەوە لە هەموو میدیا و تۆڕە كۆمەڵایەتییەكان بڵاو كرایەوە.