فڕۆكە جەنگییەكانی توركیا لەگەڵ فڕۆكەكانی هاوپەیمانی نێودەوڵەتی داعش هێرشی ئاسمانیان كردووەتە سەر تیرۆریستان لە مووسڵ، سەرۆك وەزیرانی توركیا ئەمڕۆ سێشەم ئاشكرای كرد.
سەرۆك وەزیرانی توركیا بیناڵی یڵدرم ئەمڕۆ سێشەم ڕایگەیاند، كە فڕۆكە جەنگییەكانی توركیا بەشداری ئەو هەڵمەتانەیان كردووە كە كراونەتە سەر تیرۆریستان لە مووسڵ، بەهەماهەنگی لەگەڵ هاوپەیمانی نێودەوڵەتی بۆ ڕووبەڕووبوونەوەی داعش.
هەروەها گوتی، هێزەكانی ئاسمانی توركیا بەشداری كردەوەگەلەكەیان كرد و لەگەڵ هاوپەیمانان هێرشی ئاسمانیان ئەنجام داوە، هیچ زانیارییەكی تری لەوبارەوەیە نەخستەڕوو.
رۆژی دووشەم 17 تشرینی یەكەم/ئۆكتۆبەر لە درەنگانی شەودا حەیدەر عەبادی سەرۆك وەزیرانی عێراق دەستپێكی جەنگی ڕزگاری مووسڵی ڕاگەیاند، دواتریش لە سەعات 5:30ی بەرەبەیان یەكەم پێشڕەوی لە میانەی هەڵمەتی رزگاری مووسڵ لەلایەن هێزی پێشمەرگەی كوردستانەوە لە میحوەری خازر دەستی پێ كرد و لە سێ قۆڵەوە بەرەو گوندەكانی دەوروبەری حەمدانییە و بەرتلە پێشڕەوییان كرد، تا ئێوارە توانیان نۆ گوند لە تیرۆریستان پاك بكەنەوە و ڕووبەری 200 كیلۆمەتر دووجاش داعش دوور بخەنەوە، هاوكات لە میحوەری گەیارە و گوێڕ-مەخموور و میحوەری بەعشیقە و بەنداوی مووسڵ و ئاسكی مووسڵ جموجۆڵ هەبوون و تیرۆریستان گورزی كوشندەیان پێ كەوت.
مووسڵ دووەم گەورەترین شاری عێراقە و دەكەوێتە 405 كیلۆمەتر باكوری عێراق رۆژی 10ی حوزەیران/یۆنیۆی 2014 دوای ڕاكردنی سوپای عێراق و پۆلیسی ناوخۆیی كە ژمارەیان 60 هەزار چەكدار دەبوو، كەوتە دەست تیرۆریستان و دوای دوو ساڵ و چوار مانگ و حەوت ڕۆژ هێرش لەلایەن پێشمەرگە و سوپای عێراق و دژە تیرۆر و پۆلیسی فیدراڵی و چەكدارانی حەشدی نیشتمانی دەستی پێ كرد.
لە رۆژی سێشەم چواری تشرینی یەكەم/ئۆكتۆبەرەوە لێدوانی توند لە نێوان بەرپرسانی ئەنكەرە و بەغدا دژی بوونی هێزێكی 150 كەسی لە سەربازگەی زەلكانی شارەدێی بەعشیقە دەدرێت، گرژییەكان گەیشتە ئاستی ئەوەی باڵوێزی توركیا لە بەغدا و باڵوێزی عێراق لە ئەنكەرە لەلایەن وەزارەتی دەرەوەی هەردوو وڵاتەوە بانگهێشت كران.
مانگی ئەیلوول/سێپتێمبەری 2014 هێزێكی توركیا كە لە 150 سەرباز و 25 تانك پێكهاتبوون هاتنە سەربازگەی زەلكانی شارەدێی بەعشیقەی دەوروبەری مووسڵ و دەستیان بە مەشق و ڕاهێنان بە هێزەكانی حەشدی نیشتمانی كرد، توركیا لەبارەی هاتنی هێزەكەیەوە پشتی بە رێككەوتنی 2007ی نێوان وەزیری بەرگری توركیا و عێراق بەستووە كە لە ئەنكەرە لە نێوان جەواد بۆلانی وەزیری بەرگری عێراق و بەشیر ئەتالایی وەزیری بەرگری توركیا ئیمزا كرا، بەگوێرەی ڕێككەوتنەكە عێراق ماف بە توركیا دەدات لەشكركێشی بۆ قوڵایی خاكی باكوری عێراق بكات، بە ئامانجی ڕووبەڕووبوونەوەی پەكەكە.
حەشدی نیشتمانی لە هۆزە سونەكانی دەوروبەری پارێزگای مووسڵ پێك دێت كە پاش داگیركردنی ناوچەكانیان لەلایەن داعشەوە، لە چوارچێوەی چەند هێزێكی چەكدار خۆیان بۆ رووبەڕووبوونەوەی داعش پڕچەك كردووە.
شارەدێی بەعشیقە دەكەوێتە باكوری رۆژهەڵاتی مووسڵ بە دووری 12 كیلۆمەتر و یەكێكە لە ناوچەكانی دەشتی نەینەوا خاكەكەی دەوڵەمەندە بە زەیتوون، 70% دانیشتووانی ئێزدین و 25%یشی مەسیحی و 5% توركمانن و عەرەبیش بە رێژەیەكی كەم تێیدا نیشتەجێن.
سهرچاوه: فرانس 24.