پیاو ببەستنەوە با چیتر ژن نەسووتێ

ئەم هەفتەیە و مانگ و ساڵان، ناخۆشترین و دڕندانەترین جۆرەكانی كوشتن لە میدیاكان لەبارەی ژنی كوردەوە دەبیستین، "سەروین" و ئەو ژنەی لە سلێمانی پیاوەكەی بە لێدان نزیكی مەرگی كردووەتەوە، دوا حاڵەت نین كە نەك خەڵكی بە ویژدان، بگرە مرۆڤایەتی شۆك دەكەن و دیمەنەكە بە جۆرێكە كورد بیت لە هەر كوێی دنیا بژیت شەرم داتدەگرێ. بەڵام بۆ ئەمە بنبڕ نابێت و ئامارەكانی توندوتیژی هەر گەشە دەكەن، با ئەم حاڵەتانەی ستەمی پیاو بەرامبەر ژن و بەردەوامیی تا كوشتن بخەینە بەر لێكۆڵینەوە بەو هیوایەی نیازێكی رژد و بەرپرسیارانە بێتە ئاراوە بۆ بەستنەوەی پیاو و سنووردان بۆ دەستدرێژییەكانی كە لە دەرەوە بوونەوەرێكی درۆزنی دووڕوو و لە ماڵەوە دڕندەیەكی ستەمكاری دكتاتۆرە.
روونە لە كۆمەڵگەیەك پۆلیس هیچ دەسەڵاتێكی نەبێت و بكوژ بە ئاسانی خۆی نەدات بە دەستەوە، حاڵەتەكانی كوشتن و لەناویاندا كوشتنی ژن بە قێزەونترین شێوە هەمیشە دووبارە دەبێتەوە، ئێمە چاوی وردبینی ناخەینە سەر تەنیا دوو حاڵەت و خۆمان دەناسین، مەگەر كێ بوو "دوعا"ی بە بەرد كوشت، ئەوە هەمان كولتوور و نەترسانە لە دەسەڵاتی یاسا كە هەموو رۆژێك بە جۆرێكی ناشرینتر خۆی دەنوێنێت و هیچ چارەسەرێك نابینین. ئەوە پیاوە هەمیشە وەك دڕندە ئامادەیە و بە قەپ و ددانە پیسەكانی ژن دەگەیەنێت بە سەرەمەرگ و وەك بەرزەكی بانان بۆی دەردەچێت، پیاوە پێی وایە ژن بۆ ئەوە كراوە ئەو ئازاری بدات و بیچەوسێنێتەوە. لە كاتێكدا ژن خۆشەویستی پێشكەش دەكات، ئایا شتێك هەیە لە خۆشەویستی جوانتر مرۆڤ بیبەخشێ؟ ئەی بۆچی وەڵامەكەی كوشتنە، چۆن لەمە تێبگەین.
پێم وایە پێویستمان بەوەیە پیاوی كورد بە گشتی بخەینەوە بەردەم پەروەردە و فێری بكەین كە ئەو تەنیا مرۆڤە، چونكە خۆی خۆی ناناسێ، پیاو دەبێ قوڕگی بگیرێت و دەسەڵاتی لێ بسێنرێتەوە بە یاسا، پێی بگوترێ تۆ ئەو بوونەوەرە نیت كە رێگەت بەخۆت داوە ژن بكوژی، یان ژن تا ئەو ئاستە بچەوسێنیتەوە و هەموو رێگەكانی لێ دابخەیت كە خۆی بیر لە كوشتن بكاتەوە، من زۆر پێكەنینم دێت كاتێك هەرچی كەس و لایەنی توندوتیژی هەیە پاساو دێننەوە بۆ ئەو ستەمانە و پێیان وایە چارەسەری نییە، نەخێر چارەسەر ئاسانە، بەڵام خۆتانی لێ دەشارنەوە، هیچ لێڵییەك لە چارەسەردا نییە، تەنیا یاسا جێبەجێ بكەن و تۆمەتبارانی پیاو بخەنە قەفەزی گرتووخانە، دوای دوو ساڵ ژمارەكان زۆر دەگۆڕێن بەرەو باشتر و ئامارەكانی ستەمی پیاو كەم دەبنەوە.
خۆ ستەم هەر ئەوە نییە ژنەكە دەكوژن یان دەیسووتێنن، تۆ بیر بكەوە ژن دەسووتێنن چ رەفتارێكی وەحشییانەیە، ستەمی تر هەیە كە ژن بەهۆی شەرمی خۆی و پاراستنی بەهای خێزان ئاشكرای ناكەن، ئەگەر نا هەزاران ژنی كورد رۆژی هەزار جار بەهۆی نالەباری و ئەو تەنگانەیەی پیاوەكەی بۆ دروست دەكات یاخۆ برا و باوك، خۆی ئاواتی مردن دەخوازێ، سەر دەكاتە سەر كۆشی و لەوپەڕی ناچارییەوە بە هەناسەی سارد داوا لە خوا دەكات دەروویەكی لێ بكاتەوە، ئەمە بەهۆی ئەو كارەساتەی كە ژمارەیەكی زۆر لە ماڵە باوانیش ژنەكە قبووڵ ناكەنەوە و حەز دەكەن لەو ستەمەدا بژی تەنیا بۆ ئەوەی نەچێتەوە سەر ماڵیان و ژمە خواردنێكیان بۆ زیاد نەكات. تۆی پیاو یان برا و باوك حەقە لە خۆت بپرسی خوشكەكەت تا كەی لەژێر ئەو هەموو چەوسانەوەدا بژی، لە خۆت بپرسە بۆ قبووڵی دەكەی پیاوێكی تر وا لە خوشكەكەت بكات.
كارەساتێكی هەرە گەورە كە هەموو جار لەكاتی راگەیاندنی كوشتنێكی داهێنەرانە لە دڕندەیی پیاوی كورددا ئەوەیە، ژنانی بەناو چالاك و گیرفان گەرمەكانی پرسی ژن، دەكەونە سەر شاشەكان و دەكەونەوە دروشم لێدان و قسەی پان، لە كاتێكدا بەهۆی ئەم رووداوانە و ناسینی ئەو ژنانەوە روونە كە تا ئێستە كاریگەرییان تەنانەت لەسەر یەك ژن نەبووە هۆشیاری بكەنەوە، یان حكوومەتیان ناچار كردبێت یاساكانی توند بكات و پیاو ببەستێتەوە، چونكە بە راستی پیاوی كورد زۆرینەی شایانی بەستنەوەیە بەو مەبەستەی دەستی ستەمكارانەی لە دەرەوە نەبێت، ئەگەر نا بەر هەرچی بكەوێت ئازاری دەدات. 
ئەو ژنە بەناو چالاكانە و ئەو دەزگە بەناو داكۆكیكارانەی پرسی ژن، بەهۆی ئەوەی پرسێك بەناوی پێشخستنی ژن یان كرانەوەی كۆمەڵگە و جێبەجێكردنی یاسا، پاڵی پێوە نەناون بێنە دەنگ، تەنیا دروشم دەڵێنەوە، میكیاج دەكەن و شاشەكان دەڕازێننەوە، نازانن ئەو ژنانەی لە شاشەوە گوێیان بۆ گرتوون بە درۆزنیان دەزانن، ئێوەی بەناو چالاك ئەگەر پرسێكتان هەیە و خەمی سەرەكیتانە بەناوی ژن، فەرموون چالاكییەكی بەرچاو بكەن، بەسە قسە شەرمە دوای ئەو هەموو قسە و دەركەوتنەتان ئەم رووداوانە لە كوردستان تۆمار دەكرێن كە مرۆڤ سەرسام دەكات لە قێزەونیدا.
پێشنیازتان بۆ دەكەم بچن لە بەردەم شەقامێكی سەرەكی ئەی ژنانی نانخۆری پرسی ژن، لەوێ مان بگرن و 10 رۆژ نان مەخۆن تا هەموو تۆمەتبارانی ئازاردانی ژن دەخرێنە گرتووخانەكانەوە، چی دەبێت جارێك بە رژدی بچنە ناو پرسەكەوە و لە دروشم تێپەڕن؟ ئەگەر ئەمە ناكەن حەقە نزیكترین رۆژی ساڵی نوێ كە سەری ساڵە پێكەوە لە چالاكییەكی بەكۆمەڵدا شكستی خۆتان رابگەیەنن و بەڵێن بدەن بچنەوە ماڵەكانتان و چیتر قسە نەكەن لەبارەی توندوتیژی بەرامبەر ژنان.
پاساو مەهێننەوە بۆ خۆتان، رووداوەكان بەڵگەن بۆ ناكاریگەریتان، كاریگەریی ئەوەیە قۆناغی قسە تێپەڕێنیت و كردارت هەبێ كە بەهۆیەوە گۆڕانكاریی دروست بێ، قەت لە خۆتان پرسیوە ئێوە چی دەكەن كە تۆمەتبار لە گرتووخانە نییە؟  


PM:02:16:28/12/2016




ئه‌م بابه‌ته 1586 جار خوێنراوه‌ته‌وه‌‌