دەرفەتە بۆ چاكسازی


یوسف لەتیف

ئەو گەلەكۆمە نادروستەی لەسەر كورد كرا، لە بەرامبەر خواستی لەمێژینەی خۆی بۆ ئەوەی هەنگاو بەرەو دروستبوونی دەوڵەت بنێ‌، بە ئاگر و ئاسنی چەند لایەنە وەڵام درایەوە، بەوەیشەوە نەوەستاون و پێیان حەیفە بە برسێتی و گەمارۆیشەوە لە زێدی خۆیان دابنیشن. ئەمەش لەو وڵاتانەی كە ئێمەیان بەسەردا دابەش بووین، ئاسایییە و هەر ئەوەیان لێ‌ چاوەڕێ‌ دەكرێ‌. هەرچەندە هەموومان ئەو ڕاستییەمان دەزانی، بەڵام خۆمان بەوە هەڵخەڵەتاند گوایە دەسەڵاتی ئێستە خۆی ستەمدیدەی دەسەڵاتی پێشوو بووە و بە یەكەوە هاوخەم و هاوسەنگەر و ستەملێكراو بووین لە رابردوودا و هیچ پاساوێك نابینرێتەوە كە ئەوانیش هەمان تێڕوانینی سەدامیان بەرانبەرمان هەبێ‌ و لەوانیش خراپتر بمانچەوسێننەوە.

بەداخەوە بینیمان، ئێستە بۆ درێژەدان بەو گەمارۆ هەمەلایەنەی خستوویانەتە سەر كوردستان، هەر جارەی بیانوو و پاساوێك دێننەوە كە سەرجەم ئەو مەرجانە بوونیان نییە، چونكە وڵاتەكەیان لە خواری ریزبەندی وڵاتانی گەندەڵیدایە، بەڵام ئێمەیەلێك كە ئاوا دەورە درابین بەم خۆئامادەكردنەوە، خۆمان یارمەتی توانەوەی خۆمان دەدەین، چونكە چاكسازی ناكەین و ئەو ئیرادەیەمان نییە. هیچ وڵاتێك خۆری ئازادی نابینێ‌ كە گەندەڵ بێ‌، پێشبینێ‌ ئەوە دەكەم وەك دارێكی كرم تێبوو هەناوی دەڕزێ‌ و تەمەنی كورت دەبێ‌ت و دەبێ‌ بە گرتووخانە بۆ هاونیشتمانی.

ژاپۆن كە هەرەسی هێنا بەرامبەر چەكی كیمیایی كە لە هەردوو شاری هێرۆشیما و ناكازاكی درا، ئیتر كە لەو شەڕە نابەرانبەرە دۆڕا، هات بودجەی دەوڵەتی رێكخستەوە و زۆر لە بودجەی وەزارەتی بەرگریی خستە سەر پەروەردە و برەوی بە زانست و پەروەردە دا، وڵاتەكەی گەیاندە ئەو ئاستەی كە هەموو وڵاتێك پێویستی پێیەتی ئێستە.

 كۆیا 50 ساڵی رابردووی هەڵپەی نانیان بوو، برسێتی تەنگی پێهەڵچنیبوون، كەچی خۆیان رێكخستەوە و ئەو تەنگژەیەیان بە كاری رژد تێپەڕاند و خۆیان گەیاندە ئاستی وڵاتەیلی پیشەسازی و پێشكەوتووی دنیا، ماوەتەوە بڵێین ئێمە بوێریی چاكسازیمان نییە، بۆچی چاوەڕێی ئایندەی روون بین كە نەتوانین ریفۆرم لە ناو ئیدارە و حزب و وڵاتدا بكەین، چۆن و بە چ مافێك بۆڵەبۆڵ و گلەیی لە دوژمن بكەین. ئێمە هەرچی كەرتمان هەیە لەژێر پرسیاردایە، مافی زۆر دەخەینە سەر كەمێك و بارەكە تاك و قورستر دەكەین. ئەو بەرگرییەی رابردوو كە پێشمەرگەی قارەمان كردی، نەك ئەركی خۆمانی جێبەجێ‌ كرد، بەڵكو بەرگریكاری ئازادی بوو بۆ هەموو دنیا، بەڵام حەیف نییە پڕی بكەین لە بندیوار و رێژەی نادروستی بۆ زیاد بكەین و گیرفانی هەندێكی پێ‌ گەرم بێتەوە؟ حەیف نییە مامۆستایەك رۆژانە شەش تا 10 وانە لە سەرپێ‌ راوەستێ‌ و بڵێتەوە و نەوەكانمان پێ‌ بگەیەنێت، كەچی بەو جۆرەی بێ مووچەیی و چارەكە مووچە وەڵام بدرێنەوە. 

بۆیە ناكرێت كەس ئەو بەرپرسیاریەتییە وەرنەگرێت و هەریەكە بیخاتە سەر ئەویتر، ناكرێ‌ كەرتی تەندروستی نادروست بێت و بەو حاڵەتە خراپ و ناچارییەدا بەردەوام بێت، ناكرێت ژیان و گوزەران هێند سەخت بێت، بێكاری بەردەوام بێت و رێژەكەی لە هەڵكشاندا بێت و كەس خۆی بە ساحێبیان نەكات، ناكرێ‌ ئەوە حاڵی كارەبا بێت و ساڵ بە ساڵ خۆزگەی پار بخوازی و دەوڵەت هیچ پلانێكی بۆی نەبێت و بڵێ‌ ئیرادەی خوایە. ناكرێ‌ ئەو سروشتە جوانە پرچی ئەو داربەڕووانە بە بەرچاوتەوە ببڕن و نەڵێیت سووتەمەنی نییە و بۆم دابین ناكرێ‌، چۆن دەبێت ئەو جەنجاڵییەی شار پاسی نەبێ‌ بۆ هاتوچۆ، ئەگەریش هەبێ‌ لە خراپترین جۆر و كوالیتیدا بێ‌ و تۆبەت پێ‌ بكات كە جارێكی تر تیایدا سەركەوی. ناكرێ‌ فەرمانگەیەكی 30 كەسیت هەبێ‌، بەڵام 50 راوێژكارت لەسەری بۆ خانەنشین كردبێت و حەوت سەر فەرمانبەریشت بۆ دامەزراندبێ‌.

 كە ئیرادەی چاكسازیت نییە، هیچ گلەیی لە دوژمن مەكە كە ئێستە باشترین كاتە بۆ چاكسازی و پێداچوونەوە و درەنگیشە.


AM:11:36:01/12/2017




ئه‌م بابه‌ته 423 جار خوێنراوه‌ته‌وه‌‌