کاروان محەمەد سابیر
دوێنێ لە دەڤەری راپەڕین، لاهور جەنگی لە بارێکی شڵەژاوی سایکۆلۆژیدا،وەک عادەتی پێگرتووە، کاڵفامانە هەندێک دەستەواژەی لە ئاستی نزمی خۆی دەربڕی، ئەو هەرزەسیاسیە، لە رۆژی ١٦ی ئۆکتۆبەری خیانەتی فرۆشتنی کەرکووکەوە، جێ بە خۆی ناگرێت، بە جۆرێک شەرمەزاری خاک و خەڵکی کوردستان بووە، شارۆکە بە شارۆکە دەگەڕێت، تا رووی رەشی خۆی سپی بکاتەوە و پاکانە بۆ ئەو خیانەتەی بکات.
بە چینێک ئارەقی شەرمەزارییەوە، لە پێش خانەوادەی شەهیدان، چەواشەکارانە قسەیکرد، پاساوی دەهێنایەوە، دواتریش وەک سووکایەتیکردن بە خوێنی ئەو شەهیدانە و کەسوکاریان، لە پارەی فرۆشتنی کەرکووک، هەر خانەوادەیەک تەنيا ١٠٠$ سەد دۆلاری ئەمریکی پێدان!
لاهور رووی کردبووە کەسوکاری شەهیدان و دەیگووت: من لەگەڵ رۆڵەکانتان لە کەرکووک بووم، لە شەڕی دژ بە داعش و بە چاوی خۆم شەهیدبوونیانم بینیووە. وەڵامی ئەو قسە بۆ پێشمەرگە یەکێتیەکان جێدەهێڵین، کە لاهور لەکام جەبهەی ئەمامی بووە، لە کام شەڕ بەشداری فیعلی بووە؟ هەرچەندە ڤیدیۆی پێشمەرگەکانی سۆسیالیستی کاکە حەمە ماوە، کە چۆن لە پێش هێزەکەی لاهورەوە سەنگەرەکانی داعشیان پاک دەکردەوە، لاهوریش بە دووربین سەیری شەڕەکانی دەکرد!
لەوەش دەگەڕێین و بۆ خەڵکی جێدەهێڵین، بەڵام چۆن وەڵامی قسەیەکی براکەی خۆی "ئاراس" دەداتەوە کە لە رۆژی داگیرکردنی کەرکووکدا، لە گەڕەکی عەرەفە و لە ماڵەکەی مام جەلالەوە، لە ژێر دەسەڵاتی حشدی شعبیەوە، لەبارەی شەڕی پێشمەرگەوە دەڵێت: "ئێمە چیمانکردووە؟ تەیارە ئەهات لە داعشەکانی ئەدا و پێشمەرگەش وێنەی سێلفی لەگەڵ جەنازەکانیان ئەگرت!".
لاهور، بێ ئاگا لە مێژوو و رووداوە سیاسیيەکان، باسی ٤٢ ساڵ پێش ئێستای کرد، گوتی: سەرکردەکانی پارتی کوردستانیان فرۆشت بە رژێمی عێراق.لە خۆی نەپرسی کە ئەگەر ئەو راستدەکات، بۆچی پارتیەکان وەک ئێوە پاداشتی فرۆشتنەکەیان وەرنەگرت و نەچوونەوە لای رژێم؟ ئەی دوای ئەوە کێ و کام لایەن بوو چووە بەکرەجۆ و سەنگەری دژی کوردایەتی هەڵبژارد؟
ئەوە چ روویەکی قایمە، لە خۆی ناپرسێت، کێبوون ئەوانەی وڵاتیان جێهێشت و لە بەریتانیا رەگەزنامەیان وەرگرت؟ ئێستايش گەڕەک و شوێنی بازرگانیان بە پارەی خەڵکی ئەم وڵاتە لەوێ کڕیووە!
لاهور بێ ئابرووانە، لە پێشچاوی کەسوکاری شەهیدان دەڵێت: راگەیاندنی پارتی تۆمەتی خیانەتیان داوەتە پاڵم! ئەو کە ئێستا جگە لە تێکچوونی هاوسەنگی سیاسی و کۆمەڵایەتی، هاوسەنگی عەقڵی و دەرونیشی لەدەستداوە، لەبیریچووە کە بەڕێز کۆسرەت رەسوڵ بە "دەستکێشی دوژمن" و مەلابەختیار بە "هەرزە و کاڵفام" و د.نەجمەدین کەریم بە "خیانەتکار" و شێخ جەعفەر و فەرماندە و پێشمەرگە و کادرانی یەکێتی بە "خاکفرۆش" ناوی ئەو گرووپەی ١٦ی ئۆکتۆبەریان هێنا، کە لاهور ئەندازیاری کارای خیانەتەکەیە، تۆ بڵێی تێکۆشەرانی یەکێتی بوختانت پێ بکەن؟ تۆ بڵێی بافێڵی ئامۆزات راست نەکات، کە ئیمزا و یاداشتی سەرکردەکانی یەکێتی بەرزکردهوە بۆ چاوی کامیراکان؟ تۆ بڵێی خەڵکی دوز و کەرکووک لە خۆڕا تۆمەتت بۆ دروست بکەن؟
ئەی ئەو هەموو سوپاسگوزاریەی سەرکردەکانی حەشدی شەعبی بۆ تۆ لە پای چی بووە؟ تۆ بڵێی ئەو دۆستانەشت بە سوپاسکردنت، ویستبێتیان بە غەدر بتکەنە خیانەتکار؟
ئەی دوایین لێدوانت کە کەناڵی (افاق)ـی نووری مالکی بڵاویکردەوە، دەڵێی "حهشدی شعبی رێکەوتنەکەیان پێشێلکرد، کە بڕیار بوو ئێمە لە کەرکووک بمێنینەوە!"
لاهور دەڵێت: ئێمە بەرگریمان کرد، کام بەرگری و چۆن؟ ئەی تۆ و براکەت و خزمەکانت نەبوون، لە ١٦ی ئۆکتۆبەر، لە میدیاکانەوە بە هەناسەبڕکێوە دەتانگووت"ئێمە بەرگری لە نەوتی دزراو ناکەین" ئەگەر لەبیرتچووە و تووشی "فوقدان زاکیرە" بووی، ئەوا ئێمە هەموویمان بۆ تۆمار کردووی!
تۆ نەک بەرگریت نەکرد، بەڵکو دووجار خیانەتت کرد، جارێک لە کوردستان و خەڵکی کەرکووک، دووەمین لە پێشمەرگەکانی یەکێتی کە بە کوشتتدان و پێت نەگوتبوون کەرکووکمان فرۆشتووە!
ئەوە چ لۆژیکێکە، تۆ بەرگریت کردبێت و دواتریش ماڵ بە ماڵ و گەڕەک بە گەڕەک، چاوساغی میلیشیاکان بیت؟ ئەوە چ لۆژیکێکە تۆ بەرگریت کردبێت و "ئاراس پلایس"ی برات لەگەڵ "حهسن پلایس" پێکەوە لەناو کەرکووک بن و براکەت بڵێت "کەرکووک ئارامە و بەیانی دەچمە شۆریجە و دوو دەست دۆمینە دەکەم".
لاهور، دوای خیانەتی ١٦ی ئۆکتۆبەر، لەناو یەکێتی وەک گەورە خائین دەناسرێت و نفوزی جەماوەری و تەنزیمی لەدەستداوە، ئەوەش گەورەترین هەڕەشەیە لەسەر ژیانی سیاسی ناوبراو، کە دەترسێت لە کۆنگرەی یەکێتی، یەکێتیيەکان تۆڵەی ئەو خیانەتەی لێبکەنەوە، بۆیە لێرەولەوێ هەوڵی سپیکردنەوەی رووی خۆی دەدا. ئەگەر پێش ١٦ی ئۆکتۆبەر، لاهور لە ژووری تاریک ئیمزای خیانەتی فرۆشتنی (کەرکووک، دووز و خانهقین)ـی کردبێت، ئەوا بە رۆژی رووناک و بە کامیرای ئێچ دی، خیانەتەکەی تۆمار کراوە.
ئەگەر دادگا و حزبەکەی سزای نەدا، مێژوو و ویژدانی (کوڕی شەهیدکراو، جەرگ سووتاو، خەڵکی ئاوارە، ماڵ سووتاو، ماڵ و دوکان تاڵانکراو، ژن ئەتک کراو و ..هتد)سزای دەدەن، ئەم پەلەقاژەیەیشی ئێستا دەیکات، نە مێژووی بۆ راست دەکاتەوە، نە سەری بەرزدەکاتەوە، چونکە هەمیشە مێژوو و ئایندە، بۆ تێکۆشەران بووە، نەک خیانەتکاران!