مەولاكەم.. ئەوە ئێمەین لەپشت دەرگە!

مقداد شاسواری

بەراهیی بابەتەكە: بەر لە چەند رۆژێك شاندێكی (كۆكتێل)ی پایەبەرزی هەرێمی كوردستان سەردانی نەجەفیان كرد و بەنیازبوون چاویان بە (ئایاتی عیزام و مەراجیعی كیرامی شیعە) بكەوێ، بەڵكو نێوانگیرییەكی خێر بكەن لە مەعبێنی هەرێم و بەغدا و ئەو گرژییەی هەیە هەندێك خاو بكەنەوە. ئێستەیش شاندەكە لە پشت دەرگە دارینەكەی حوجرەی سیستانی چوار مشقی لەسەر لبادێك هەڵكوڕماون و داوا لە مەرجەعی باڵا دەكەن لوتف بنوێنێ و دەرگەی حوجرەكەیانی بۆ بكاتەوە! یەكێكیان بەناوی شاندەكەوە خەریكی كڕووزانەوەیە:
مەولاكەم.. تكایە ئەمر بفەرموون ئەو دەرگەیەمان لەسەر بكرێتەوە و چەند خولەكێك.. یان تەنانەت چەند چركەیەكیش بێت لە حزووری موبارەكتاندا هەڵكوڕمێین و زەحمەتی بڕینی ئەو رێگە دوور و درێژەمان هەروا بە فیڕۆ نەڕوات و شەرمەزار و خەجاڵەتی دانیشتوانی هەرێمەكەمان نەبین.ئێمە ئەوەتا لەپشت دەرگەی حوجرە پیرۆزەكەتانین و چاوەڕێی هاتنە ژوورەوەین. شاندەكەمان نوێنەرایەتی هەموو چین و توێژەكان و هەموو حزب و لایەنەكان و هەموو ئاین و مەزەوەكان و هەموو بیروبۆچوونەكانی هەرێمەكەمان دەكات.
حزبە گەورەو مامناوەندی و بچووكەكانمان تێدایە. پەرلەمانمان تێدایە. ئەكادیمی لە ئاستی پرۆفیسۆرمان تێدایە. مێزەر بەسەر و زانای ئاینی نمرە یەكمان تێدایە. ئەفەندی و قات لەبەرمان تێدایە. بە بۆینباخ و بێ بۆینباخمان تێدایە. شاندە كۆكتێلەكەمان گوزارشت لەكۆی پێكهاتەكانی هەرێمەكەمان دەكات، بۆیە رجاو تكامان وایە دەست لە هینان درێژتر بەڕێمان مەكەنەوە و ئەگەر تەنیا بۆ وێنەگرتنێكیش بێت دەرفەت بدەن بێینە خزمەتتان.
مەولاكەم...
ئێمە ئەكرادین و لە عێراق دەژین. واتا هاووڵاتیی عێراقین. بەدوای قەدەری خۆماندا هاتووین. تكایە ئیزن بدەن تا بێین لەناو پێچەڵپێچی عەمامە پیرۆزەكەتان بەدوای مافی نەتەوەكەماندا بگەڕێین. هاتووین گەشتێك بەناو داوە تێكئاڵاوەكانی ریشی موبارەكتان بكەین بزانین ئاسەوارێك بەدی ناكەین لە مافە زەوتكراوەكانمان. هاتووین گوزەرێ بكەین بەناو قۆڵی عەباو گیرفانی جوبەو كونە لاستیقی دەرپێ سپییەكەتان، بەشكو مافەكانمان لەوێندەران شاردرابێتەوە و بتوانین بیدۆزینەوە.
هاتووین لەناو دەق و تێكستی ئەو كتێبە پیرۆزانەی لەناو ئەو دەلاقەو تاقانەی دیار سەرتانەوە خاك و تۆزی زەمەنێكی زۆریان بەسەردا نیشتووە بگەڕێین بەڵكو ئەوە خوایە، ئایەتێ، حەدیسێ، فەرموودەیێ، گوتەی ئەسحابەیێ یان پیاوچاكێكی تێدا بدۆزینەوە باسێكی لە قەومی ئێمە كردبێ.
هاتووین لەناو كونە مشك و درز و كەلەبەرەكانی حوجرە پیرۆزەكەتان نووسراوێكی مێژوویی دزراو، یان بەڵگەنامەیەكی شاراوە، یان وێنەیەكی رەش و سپی یان نوشتەیەك.. هەرشتێ بدۆزینەوە كە بتوانین دەستی پێوەبگرین و مافەكانمانی پێ دەستەبەر بكەین.
مەولاكەم..
ئێمە ئەكرادین و 100 ساڵ زیاترە بەزۆری زۆرداران لكێنراوین بەم عێراقەی ئێوەی تێدا دەژین و ئێمەی تێدا ئەنفال دەكرێین، كیمیاباران دەكرێین، جینۆساید دەكرێین، زیندەبەچاڵ دەكرێین، لێرە دەگوازرێینەوە بۆ ئەوێ، لەوێ راپێچ دەكرێین بۆ ئەولاتر، هێرشی سەربازیمان دەكرێتەسەر، راوەدوودەنرێین، سووكایەتیمان پێدەكرێ، هیچ مافێكی نەتەوەییمان پێ رەوا نابینرێ، هەموو سامانی سەر زەوی و ژێر زەوی خاكی ئێمە بە تاڵان دەبەن و نان و قووتی خەڵكەكەمان دەبڕن، نە ئەوەتا بە عێراقیمان دەزانن و نە لێمان دەگەڕێن ماڵی خۆمانتان لێ جیا بكەینەوە، نە بە مسوڵمانمان دەزانن و نە حسێبی كافرانمان بۆ دەكەن، زەلیلی هەموو دنیان و هێزی خۆتان بەسەر ئێمەدا تاقی دەكەنەوە، سەرەڕای هەموو ئەوانەش ئێمە قەت لێتان بێ هیوا نابین. سروشتی ئێمە وایە مەولاكەم.. ئێمە قەومێكی رۆمانسین و هەمیشە دوژمنی خۆمان خۆش دەوێ، هەمیشە دوژمنەكانمان بە برا گەورەی خۆمان دەزانین.
ئێستەیش قەینا.. هەرچیتان بەسەرمان هێناوە لەبیرخۆمانی دەبەینەوە. ئەدی (عفی الله عما سلف) بۆچی و بۆ كەنگینێیە.
دەزانین لەسەر ئەنجامدانی ریفراندۆم لێمان تووڕەو زویرن، بەڵام ئەوەتا ریفراندۆممان سڕكرد و خستمانە رابردووەوە. پشتمان لە سەرۆكەكەی خۆمان كرد و بە تەنیامان هێشتەوە و تاوانی ریفراندۆمەكەمان خستە ملی ئەو و خۆمانی لێ بێبەری دەكەین.هاتووین بەیعە و عێراقیبوونمان لە حزوورتان دەمەزەرد بكەینەوە و سەرلەنوێ تێهەڵچینەوە. هاتووین لەم بێهیوایییە رزگارمان بكەن و چۆڕە هیوایەكمان پێ ببەخشن تا بتوانین 100 ساڵی تریشی پێ بەڕێ بكەین.
مۆڵەتتان دەوێ مەولاكەم؟ دەتانەوێ كاتی زیاترتان پێ بدەین؟ چەند ساڵ؟ 10 ساڵ، 20.. 50. 100 ساڵ.. كێشەمان نییە مەولاكەم..ئێمە پشوومان زۆر درێژە.
هێندە گفتوگۆ دەكەین و دانوستان دەكەین هەتا قیامەت قووتمان دەدا.. قەیدی چییە.. مادام نیەتمان لەگەڵ یەك پاكە ئەوە 100 ساڵی تر بۆ ئێوە. تەنیا پەیك و پەیامێك بۆ جەعفەر و جەواد و حەیدەرەكانتان بنێرن هەر هێندەی نەمرین لە برسان ناوبەناو سلفەیەكمان بۆ بنێرن، ئێمەش 100 ساڵی تر كاتتان پێ دەدەین بۆ دانوستاندن!
ئێمە هاوڕا نین لەگەڵ (پیتەر گالبرێس) گوایە گوتوویەتی (عێراق، خوا دروستی نەكردووە، چەرچەڵ دروستی كردووە) ئێمە پێچەوانەی ئەو بیر دەكەینەوە و پێمانوایە عێراق خوا دروستی كردووە و ئێمەی ئەكراد بۆمان نییە دەست بۆ نەخشەو جیۆگرافیا پیرۆزەكەی ببەین و خۆمانی لێ جیا بكەینەوە. هیچ دەقێكی پیرۆزیش باسی لەوە نەكردووە ئەكرادەكان قەومێكی جیابن و مافێكیان هەبێ. ئێمە هەر خۆمان هێندەی خۆشەویستی و ئینتیمامان بۆ عێراقی پیرۆز هەیە، بۆ نیشتمان ونەتەوە و قەومی خۆمان نییە.
ئەوە نییە لەبەر خاتری عێراق خیانەت و ناپاكی لەگەڵ خاك و نیشتمان و وڵاتی خۆمان دەكەین؟ هەر لە ئەزەلەوە مەولاكەم و.. تا ئێستەیش ئێمە حەزمان لە پاشكۆیەتییە. حەزی دێرینمانە پاشكۆی عێراقی پیرۆز بین. دەمانەوێ لە حەوشە بچووكەكەی پشتەوە، لە وڵاتی عێراقدا هەڵكوڕمێین و سەرمان كز بكەین و بێ دەنگ دانیشین و چاومان لە رەحم و بەزەیی ئێوە بێ جاربەجارێ لەتەنانێك فڕێ بدەنە سەر سفرەكەمان و چۆڕە شیرێك بخەنە دەمی منداڵەكانمانەوە.
ئێمە ئەوەتا سەرۆكی خۆمان بەتەنیا جێهێشتووە و شەو و رۆژ لۆمەی دەكەین لەسەر ئەوەی ریفراندۆمی ئەنجام داو ویستی ماڵمان جیا بكاتەوە و لەو عێراقە پیرۆزە دامانبڕێنێ.
هاتووین زیواڵێك لە عەباكەتان.
داوە موویەك لە ریشی پیرۆزتان.
تنۆكێك لە نووری رووخسارتان.
مشتێك لە تۆز و خۆڵی حوجرەكەتان.
فوویەك لە هەناسە گەرمەكەتان.
پەیامێك لە كتێبە پیرۆزەكەی سەر رانتان.
تۆسقاڵێك لە میهر و مرۆڤدۆستی رێبازەكەتان.
دەنكێك لە مورووی تەسبیحە پڕ لە زیكر و خواناسییەكەتان.
رەكعاتێك لە نوێژە ئاسمانییەكەتان.
دوعایەكی خێر لە گەرووی پڕ لە خێرتان، بەهێما و نیشانەی موتفەڕك و نوێكردنەوەی بەیعەتمان بۆ عێراقی یەكگرتووی یەكپارچەی پیرۆز بۆ گەل و قەومەكەی خۆمان ببەینەوە و دڵیان پێ خۆش بكەین. هاتووین پێتان رابگەیەنین ئێوەی هەڵسووڕاوان و حوكمڕانانی عێراق وەك هەمیشە براگەورەن و ئێمە برا بچووك.
ئێوە سەردار و سالارن و ئێمە زەبوون و زەلیل.
ئێوە سەید و نوورانی و پیرۆزن و ئێمە عەوام و گومڕاو و مولحید.
ئێوە پاك و زوڵاڵ و موبارەكن و ئێمە ناپاك و شێلوو و پۆخڵین.
ئێوە (خیر امە اخرجت للناس)ن و ئێمە لە رەچەڵەك و قەومی جنۆكەین.
ئێوە خاوەن پەیامی ئاسمانی و زمانی پیرۆزن و ئێمە ئاگرپەرست و دۆزەخیی و بێ زمانێكی واین تەنانەت ئاسمانیش لێمان تێ بگات.
ئێوە یەك لەشكر ئیمام و ئیمامزادەو خەلیفەو ئەسحابەتان هەیە لەو دنیا شەفاعەتتان بۆ بكات و دەرگەی بەهەشتتان بۆ بكاتەوە و ئێمە لەوێش كەس خۆیمان لێ ناكات بە ساحێب.
ئێمە ددان بەو راستییەدا دەنێین مەولاكەم.. كە عەرەب باشترین و پاكترین و میهرەبانترین و مرۆڤدۆستترین ئومەتێكە خوای تەبارەكوتەعالا خوڵقاندبێتی.
عەرەب، شیعە بێت یان سوننە
عەلمانی بێت یان رادیكاڵ
خواناس بێت یان مولحید و زەندیق
رۆشنبیر بێت یان جاهیل و نەفام
رەنگی پێستی رەش بێت یان سپی
چەپڕۆ بێت یان راستڕۆ
بەعسی بێت یان دەعوە
حەشدی شەعبی بێت یان جەیشی شەعبی 
عێراقی بێت یان كەنداوی
عەمامەو جوبەو دیشداشەی لەبەر بێت یان قات و بۆینباخ.
شینگێڕ بێت یان گۆرانیبێژ.
بانگدەر و قورعانخوێن بێت یان راپەڕ و سەماكار
پاشكەوتوو بێت یان پێشكەوتوو
هاروهاج و توندوتیژ بێت یان میهرەبان و نەرم و حەلیم
ئیرهابی بێت یان ژیاندۆست
هەرچییەك بێ، ئێوە لەسەر هەق و ئێمە ناهەقین. ئێوە راست و ئێمە چەوتین. ئێوە گەورەو ئێمە بچووك. ئێوە بڕیار دەدەن ئێمە بە كولەمەرگیش بێت بژین یان بمرین، تەنانەت جۆری مردنەكەشمان ئێوە دیاری دەكەن. ئێوە هەر بمانكوژن و قڕمان بكەن، ئێمەش هەر گۆرانی و شیعر و بەستەو لاوك و حەیرانتان بەسەردا دەڵێین.
ئێمە واین مەولاكەم..ئێمەی ئەكراد قەومێكی عەجایبین.
ئەگەرنا هیچ قەومێكتان بینیوە شیعر و گۆرانی بەسەر بكوژ و جەلادەكانیدا هەڵبڵێت؟ كەستان بینیوە فەرموو لە دوژمنەكانی بكات بێن داگیری بكەن. هیچ قەومێك شك دەبەن پشت لە سەرۆكە دەوڵەتخواز و سەربەخۆخوازەكەی بكات و بەتەنیا جێی بهێڵێ و خۆی فڕێ بداتە بەر پێپەتییەكانی دوژمنەكانی خۆی؟ كەستان بینیوە خاكی خۆی بە گۆترە بفرۆشێتە داگیركەر و دوژمنەكانی؟ئەوە هەر لە ئێمە دەوەشێتەوە مەولاكەم.. 
ئێوە دەمانكوژن و ئێمە بە پرتاو، هەموو رۆژ بە بیانوویەك و هەرجارەو بە شاندێك رادەكەینەوە بەر دەرگەكەتان. ئێوە نانمان دەبڕن و ئێمە دێینەوە دەستتان ماچ دەكەین. ئێوە رۆڵەكانمان دەكوژن و ئێمە دوای لێبوردنتان لێ دەكەین.ئێوە دەمانپلیقێننەوە و سووكایەتیمان پێ دەكەن، ئێمە هوتاف و دروشمی (بژی.. بژی)تان بەسەردا هەڵدەڵێین.
ئێمە هاتووین و ئەوەتاین لەپشت دەرگەی حوجرە پیرۆزەكەتان.
هاتووین شكۆی نەتەوەیەكتان لەبەرپێ ورد و خاش بكەین.
هاتووین قەوم و نەتەوەیەك لە هەموو ماف و بەها و پیرۆزییەكانی داماڵین و دایچۆڕین.
هاتووین بۆ هەر ناماقوڵییەكی كردوومانەو ئێوەی زویر كردووە داوای لێبوردن بكەین.
ئێمە نەك چیتر داوای دەوڵەت و سەربەخۆیی ناكەین. هاتووین بەشی سفرەیەكی مەمرەومەژی بودجەیەكی كەمیش بێت پێمان رەوا ببینن. هاتووین بەشی چۆڕە شیرێك و چەند دانە حەفازەیەك بۆ منداڵە چاوكزەكانمان مینحەیەكمان پێ ببەخشن.
هاتووین بۆ نەخۆشە داماوەكانمان دەرزییەك، دەنكە حەبێك، شووشە شرووبێكمان پێ بدەن.
هاتووین حاشا لە كوردبوونمان بكەین و بە عێراقییەكی دڵسۆز وەرمانبگرنەوە. ئەگەر خۆشتان دەرفەتتان نیە بۆ بینینمان مەولاكەم.. قەینا..فەقێیەك، سوختەیەك،گوتەبێژێك، بەرپرسی نووسینگەیەك، ئەگەر هەر پێمان رەوا نابینی، خزمەتكارێكی حوجرە پیرۆزەكەشتان بنێرن چاوێكی پێمان بكەوێ دڵخۆش دەبین مەولاكەم.




PM:03:43:11/03/2018




ئه‌م بابه‌ته 215 جار خوێنراوه‌ته‌وه‌‌