كورد پێویستی بە دەیان ڕیفراندۆم هەیە


ژیڤان خۆرانی

لە كۆبوونەوەی ڕۆژی ٧ی ٦ی ٢٠١٧ بە بانگهێشتی بارزانی بە مەبەستی (ڕیفراندۆم) واتە (ڕاپرسی) نەك (گشتپرسی) چونكە گشتپرسی هەڵەیە، لەبەرئەوەی (گشتپرسی) واتە ئەو كەسانەش دەگرێتەوە كە تەمەنیان لە خوار ١٨ ساڵە، بەڵام وشە و چەمكی ڕاپرسی دروستە. ڕوونە بتەوێ لەبارەی پرسێكی گرنگ ڕای خەڵكی وەربگریت، وەك هەڵبژاردنەكان، ڕای كەسانێك وەرناگری لەناو بێشكەدا بۆ شیر بگرین، بە دڵنیایی ڕای كەسانێكت لە كن پەسندە كە لە تەمەنی هەرزەكاری و منداڵی دەرچووبن. بڕیار درا ڕۆژی ٢٥ی ئەیلوولی ٢٠١٧ ڕێوڕەسمی (ڕاپرسی) بۆ جیابوونەوەی هەرێمی كوردستانی عێراق، لە وڵاتی (عێراق) بەڕێوە بچێت. وا پێشبینی دەكرێت خەڵكێكی یەكجار زۆر بە (بەڵێ) دەنگ بدەن، بێ ئەوەی بزانن (ڕیفراندۆم) چییە، واتەی چییە، بنەما سەرەكییەكانی چین، مەبەست چییە لە ڕیفراندۆم، بە پەژارەوە بە هەمان شێوە كۆمەڵە خەڵكێكی تر بێ ئەوەی بزانن هۆی چییە، دەنگی پێ نادەن!

زۆر گرنگە شارەزایان ئەم پرسە بۆ خەڵكی كوردستان ڕوون بكەنەوە، بێگومان دەیان قازانجی بۆ تاكی كورد هەیە، بە مەرجێك بارودۆخەكە لە ئێستە باشتر بكەن، گوزەرانی خەڵك بگۆڕن، جووڵە بخەنەوە ناو بازاڕ، حكوومەت پرۆسەی پێدانی قەرزی بچووك و پێشینەی هاوسەریی و خانووبەرە دەست پێ بكاتەوە. لەلایەكی ترەوە پەرە بە كەرتە سەرەكییەكانی دەوڵەت بدەن، وەك: كشتوكاڵ و تەندروستی و خزمەتگوزاری.

جارێ یەكگرتنی حزبەكان زۆر گرنگە، یەكدەنگی و یەكدەستی كورد لەم قۆناغە و قۆناغەكانی داهاتوودا گەرەكە كاری لەسەر بكرێت. پێویستە و دەبێ حزبەیل خۆیان ڕیفراندۆمێك ڕێك بخەن لەبارەی جیاكردنەوەی پرسی حزبی و پرسی نەتەوەیی و كۆمەڵایەتی، دەبێ حزب جیا بكرێتەوە لە حكوومەت و لە ڕیشەوە بنبڕ بكرێ، تۆ كە بڕیارت دا تێنەگەی، ئیتر سرۆشت بۆ دابەزێت، هەر تێناگەی. ئەگەر نا وەك ڕۆژی ڕووناك دیارە حزب دەستی خستووەتە ناو خوێن و دەمارەكانی هەموو بوارە لاوازەكانی كۆمەڵگە تا بە جومگە گرنگەكان ڕا دەگا، دەنا سەتان نموونەی ئاشكرا هەن بۆ ئەم بابەتە، هەزاران دەرچووانی زانكۆمان هەیە لەم كوردستانە دانەمەزراوە (ئەگەر باسی شوێنی شیاو بكەین بۆ كەسی شیاو) كەچی ئەوەی حزبییە و حزبێك پاڵپشتی دەكات، لە شوێنێكی دڵخوازی خۆی بە مووچەیەكی چاك، دامەزراوە. كوا یەكسانی؟

میلەتی كورد تا ئێستەش لەڕووی كۆمەڵایەتییەوە پێش نەكەوتووە، شاری سلێمانی بە پایتەختی ڕۆشنبیری ناوزەد كراوە، كەچی هێندەی سەرۆك هۆزێك قسەی دەخوا و دەستی دەڕوا، نابینی ڕووناكبیرێك بابەتێكی گرنگ بورووژێنێ و خەڵكەكە پشتگیری بكەن. لە ناوچەی گەرمیان هەر دەڵێی چاخی بەردینە، بە ڕۆژی ڕووناك سەرۆك خێڵ و هۆزەكان هەڕەشە لە حكوومەت دەكەن، چونكە دەزانن ئەو خەڵكە ڕەشۆكە پشتیان دەگرن و گرەوی خۆیانیان لی بردوونەتەوە. ناوچەكانی دەوروبەری سلێمانی بنەماڵە و شێخەكان بەڕێوەی دەبەن، بۆ نموونە قەرەداغ و قۆپی و كوێ و كوێ، لەم ناوچەیە ماڵە شێخێك بچنە خوازبێنی كچێك وای لە حاڵیان پێیان نادەن، چونكە ئەوان بنەماڵەن و شێخن، خودا فەزڵی بەسەر هەموو خەڵكی داون. لە هەمووی خۆشتر گەرەكە ناوی بووكەخانم، پاشناوی شێخانی ئەو ناوچەیە هەڵگرێ، تۆ سەیری ئەو گاڵتەجاڕییە بكە. بۆیە خەڵكی كوردستان گەرەكێتی ڕیفراندۆمێك بكات بۆ جیاكردنەوەی ژینوار لە دەست فەرمانی بنەماڵە و خێڵایەتی، نەخاسمە ژینوارێكی ژیاری و مۆدێرن.

ڕیفراندۆمێكی ترمان پێویستە لەبارەی مەلاوە، دەبێ مەلا لە دەستێوەردانی ژیانی خەڵكی، دەست هەڵگرن و جیا بكرێنەوە، بۆچی دەبێ قسە لەبارەی هەموو شتێكەوە بكەن، لەسەر میمبەری پێغەمبەر؟ مەلا هەیە هیچ زانیاری لەبارەی ئەوروپاوە نییە، لە گوتاری هەینی یەك بەدەنگی هاوار دەكات، "ئەگەر داعشیان دروست نەكردایە، بە ١٠ ساڵ هەموو ئەمەریكا و ئەوروپا مسوڵمان دەبوون!" قۆستنەوەی ساویلكەیی گوێگران، گرنگترین خاڵی گوتاربێژانی ئاینییە، نەخاسمە ئەوەی وەك هەقایەتە ئەفسانەكان گێتی ئەوروپا و ئەمەریكای دێتە بەرچاو، چونكە نەیبینیوە، گوتاربێژان بە ئارەزووی خۆیان وێنای تراژیدی و كۆمیدی لە زەینی گوێگر دروست دەكەن. تێگەیاندنی وەها بابەتێك لە منداڵێكی ١٠ ساڵی بەرەمی داهاتووی ئەم منداڵە چی دەبێت بۆ خێزان و نەتەوە و نیشتمان؟

ڕیفراندۆمێكی تر و دەیان و سەتانی ترمان پێویستە، من هەر بابەتێك پێشنیاز بكەم بۆ لەسەر وەستان و قسەكردن لەبارەیەوە، تۆ دەیان بابەتی ترت هەیە تا قسەی لەسەر بكەین و چاك و خراپ، ڕاست و ناڕاست، لێك جودا بكەینەوە، ژبەر هەندێ درێژدادڕی ناكەم و ئێژم كورد فرە ڕاپرسی و چاكسازی گەرەكە.


AM:11:34:10/07/2017




ئه‌م بابه‌ته 1433 جار خوێنراوه‌ته‌وه‌‌