ئەم قەردارێ کێ نە؟

بروسك رۆژهه‌ڵاتی

پێشمەرگە بەریا نها ل چیا و ئیرۆ ڕۆژێ ژى ل دەشتێ لهەمبەر دوژمنەک خوینمژ راوەستانە، ئەو دوژمنێ کۆ دنیا لێ دترسە و ب بهیستنا ناڤێ وان، دبعەجن و  خۆ حه‌وت کونجکان دڤەشێرن، پێشمەرگە و هەموو هێزێن دی ل کەلەکەلا هاڤینێ و دور ژ سپلێت و ئاڤا سار و ب زگەک برسی و تێرنەخاری، رژدن داکۆ وێ ئالایا پیروز بلند راگرن و نەهێلن خەونێن مە ببن بلقا سەر ئاڤێ.

ئەڤ عەگیدێن کۆ ناهێلن جارەکە دی عەورێن ڕەش، ڕۆژا مە تاری بکەن و ناهێلن ریڤی و گور ژ کورە رێکان بێن و توربکێن خۆ ژ زێر و روومەتا گەڵێ کورد تژی بکەن و دگەڵ خودا ببەن، پێشمەرگە و... ب جانێ خۆ یێ شیرین ئارامیا کوردستانێ دپارێزن و رێ نادەن وەڵاتێ مە، مینا عێراقا کۆ بوویە گولا خوینێ، تەڤلی هەڤ ببە.  

ئەم قەردارێ وان کەسانن کۆ ل کوردستانێ، خودانێ بستەکا عەرد نینن کۆ تێدا ڤەحەون، لێ ب جان و مالێ خۆ پارێزڤانی ژ ڕومەت و ئاخا کوردستانێ دکەن.

ئەم قەردارێ وان کەسانن کۆ نهە کاڵ بۆنە و رێدینا وان سپی بوویە لێ هەر دیسا چەپەر (بەرۆکێن) شەر بەرنەدانە داکۆ خەونێن مە ببن راستی و ئەم ژ وێ بندەستیێ رزگار ببن. 
بلا هەر کەس باش بزانە د بن سیبەرا وان قەهرەمانایە کۆ ئەم ئیرو ڕۆژێ ب سەربەستی دژین.

وەڵات قەردارێ وان کەسانە کۆ ب دلەک مەزن و سینگەک بەرفرەهـ هەرتم بەرهەڤ بوونە خۆ گوریێ وێ ئاخا پیروز بکەن، ئەڤ ئاخا کۆ ب سەد هەزاران شەهید و قوربانی دایە لێ چ جاران سەرێ خۆ بۆ خوینمژان نەچەماندییە.

ئەم قەردارێ وان کەسانن کۆ تێنی و برسی دبن لێ دخازن ئەم تێر بن و لسەر دوشەکەک نەرم رازێن و مە هاژ بایێ دنیایێ نەبە.

ئەم قەردارێ وان کەچ و خورتانن کۆ ب کەلێژانەک زۆر و ب ئەڤینداریەک مەزن بەر ب شەرێ ماڵوێرانکەر دبەزن و هەڤژینیێ دگەڵ ئاخێ پێکتینن و گوڤەند و دیلانا وان ل بەرۆکێن شەر دایە.
ئەم  قەردارێ وان کەسانن کۆ ئێدی ناهێلن و ناخازن جارەکا دی گەڵێ کورد بێ هێڤی ببە و مە ژ بور ببە وەلاتێ خۆ بەردە و کۆچبەرێ وەڵاتان ببە.

لێرەدا من ب پێویست زانی ببێژم، ئەرکەک ئەخلاقی و نیشتمانییە کۆ ئەم بۆ وان عەگید و جامێران و ماڵباتێن وان چ ژ دەستێ مە بهێت ژ بۆ وان بکەین و ئێدی نەهێلین دەرد و کۆلێن پێشمەرگە و دەبارا ژیانا وان ببە سەرنووچەیا مەدیایان و هندەک "نەزان" کەیسێ خو ب وان بینن و پێبکەنن.  

هزار سڵاڤ ژ پارێزڤانێن وەلاتێ ئاگر و ڕۆژێ.

 

PM:04:14:10/04/2019




ئه‌م بابه‌ته 74 جار خوێنراوه‌ته‌وه‌‌