چەند ڕۆژێك لەمەوبەر دادوەرێكی عێراقی بە ناوی (وائیل عەبدوللەتیف) لە دیمانەیەكیدا كە كەناڵێكی تەلەڤزیۆنیی تایفەگیرانەی وەك كەناڵی "الرابیعە" بۆی سازاندبوو، بە شێوازێكی هەواڵگرییانە و بە بێ منەتانە دەڵێت (مادەی 140ی دەستووریی كۆتایی پێ هاتووە...) ئەم دادوەرە ناسراوەی عێراق كە پێدەچێت هێندەی قوتابییەكی سێی ناوەندی بۆرە شارەزاییەكی لە یاسادا هەبێت، لێدوانێكی وا لەو كەناڵەوە دەدات كە هێشتا لەناو سەركردە و بنكردەی زۆربەی سوننە و شیعەكانی عێراقدا، عەقڵییەتی سۆسیۆكولتوورییانەی شۆڤێنی بە عەرەبكردن زاڵە، لەبەرئەوە هیچ بە لامانەوە سەیر نابێت كە هەندێك لە دادوەرەكانی تری عێراقیش، بەر باڕەشی شۆڤێنیستی كەوتبن و لە بری ئەوەی بڵێن (حكوومەتی عێراقی فیدراڵ تاوانبارە بەوەی مادەی 140ی دەستووریی بە پشتا خەواند و بەپێی ئەو وادەیەی بۆ جێبەجێكردنی تەرخان كرابوو، هیچ كام لە بڕگەكانی جێبەجێ نەكردووە).
لە كاتێكدا ئەم مادەیە ئانالیزەی چاككردنەوە و نەهێشتنی هەموو ئەو بەڵا و موسیبەتانەیە كە سەدام و دارودەستەكەی بەسەر كوردستان و عێراقیاندا هێنا، كەچی كاكی دادوەر دەڵێت مادەكە كۆتایی پێ هاتووە، یان دەڵێت (مەحاڵە كەركووك بخرێتە سەر هەرێمی كوردستان، چونكە هەرێمەكان تەنیا لە سێ پارێزگا پێكدێن نەك زیاتر). لەمەشدا بە هەڵە چووە و لەوە ناچێت بە باشی دەستووری خوێندبێتەوە كە هیچ ژمارەیەكی دیاریكراو لە دەستووردا بۆ ژمارەی شارەكانی سەربە هەرێمێك دانەنراوە.
پێشتر بیستبووم كە هەندێك لەو بڕوانامانەی لە بازاڕی مرێدی فرۆشراون، بڕوانامەی كۆلێژی یاسا و شەریعەتیشی تێدا بوون، ئینجا ئەگەر دادوەرێك بەو نەفەسە شۆڤێنیستی و كۆنە قینەوە لەسەر بڕگە دەستوورییەكانی مادەیەك بدوێت، كە بەپێی ئەو مادەیە مافی پێشێلكراوی دەیان هەزار خێزانی كورد دەگەڕێتەوە، هەروەها هەزاران ماڵباتی عەرەبیش كە بە بڕیاری ئەنجوومەنی سەركردایەتیی بەعس پارەیان پێ درابوو، تا وەك داگیركەر بێنە كەركووك و ماڵ و زەویوزاری كورد داگیر بكەن، دەبێت ئەوانیش بەرەو مەنزڵگەكانی پێشوویان بگەڕێنەوە، كەواتە ناهەق نیم بڵێم ڕەنگە ئەم دادوەرەیش لە بازاڕی مرێدی میلییەوە بڕوانامەی یاسایی بۆ خۆی سەندبێت، تەنانەت ئاگاداری بڕیارەكەی دادگەی دەستووریش نییە كە نووسراوە (مادە 140 نافژە) ئاماژەش دراوە بەوەی كە بنەچەی ئەو مادەیە لە مادەی 58ی یاسای بەڕێوەبردنی دەوڵەت بۆ قۆناغی ڕاگوزاری بوونی هەیە و بە سێ قۆناغ مادەكە جێبەجێ دەكرێت.
هەمووی چەند ڕۆژێك تێناپەڕێت كە سەتان ملیۆن دۆلاری تر لە عێراقەوە ڕەوانەی كوێت دەكرێتەوە
هاوكات لەگەڵ ئەم لێدوانە شۆڤێنییانەی وائیل و هاوبیرەكانی وەك ئەویش، هەمووی چەند ڕۆژێك تێناپەڕێت كە سەتان ملیۆن دۆلاری تر لە عێراقەوە ڕەوانەی كوێت دەكرێتەوە، ئەوەش وەك قەرەبووی ئەو زیان و سزای ئەو تاوانانەی سوپای عێراق كە لەو وڵاتە دراوسێیەی دا لە كاتی داگیركردنی وڵاتی كوێت قەوماندبوویان، كەچی لە ئاست قەرەبووكردنەوەی هەزاران ماڵباتی ئەنفالكراو و گوندی وێرانكراوی پێشووی كوردستان كەڕوڵاڵن.
هەرگیز ئەوەشم لە بیر ناچێتەوە كە هەر ئەم نادادوەرە بوو بە دەم قسەی هاووڵاتییەكی بە ڕەگەز عەرەبی شۆڤێنیستەوە كە ناوی (حسن القصیر القصیر)ـە، خەندە دەهاتە سەر لێوی، كاتێك قەسیر بە وائیلی دەگوت (الاكراد رایدلهم صدام پانی حتە یسوی بهم حلبجە پانیە).
دواتر دادوەری ناوبراو هێندە بەرانبەر بە كورد ڕقئەستوورە، كاتێك پڕۆژەی پێشنیازكراوی دروستكردنی هەرێمی بەسرە شكستی خوارد، ئەم دیسان هەرێمی كوردستانی تاوانبار دەكرد و دەیگوت بەهۆی خراپ بەكارهێنانی دەستووی عێراق لەلایەن هەرێمی كوردستانەوە، وا ئێستە پڕۆژەی هەرێمی بەسرە ڕەت كراوەتەوە.