هەموومان دەزانین سیاسەت كۆرپەی ئابوورییە، ئابووری ئەمڕۆش لە دەست یەكسانیخوازیدا نییە و دنیای سەرمایەداری وەك مۆتەكە دەستی لە بینەقاقای مرۆڤایەتی ناوە. بانكی سەرمایەدارەكان بە خوێن و هێزی كاری مرۆڤ بەرزترین ئاستی خۆی تۆمار كردووە. ئەمەش ئاماژەیە بۆ ئەوەی مرۆڤ هێشتا لە نێوان قۆناغی (ئاژەڵ و مرۆڤ)بووندا هەڵبەز و دابەز دەكات.
كاتێك دەبینم لە سەدەی بەناو مۆدێرنەدا چەكی قەدەغەكراوی وەك فسفۆڕ بەرانبەر منداڵی نەتەوەیەكی وەك كورد بەكار دێت، دڵنیام ئێمەی كورد یەكەم و دووەم نەتەوەیش نابین ئەم چەكانەمان لەسەر تاقی بكرێتەوە، دەتوانم ئەم كاتەی ئێمە تێیدا لە دنیادا دەیگوزەرێنین ناوی بنێم (مرۆئاژەڵ).
هەڵبەت مرۆ پڕ بە پێستی مرۆڤی ئێستە لام ڕاستە و ئاژەڵیشم تەنیا لە ڕووی كەمی بیركردنەوە سروشتییەكەیانەوە كردووەتە پاشگری مرۆڤ، ئەگەرنا لە ڕووی ئارامی و هەست و سۆزەوە ئاژەڵ لە مرۆڤی كاپیتاڵیزم و ئایدۆلۆجیخوازە جۆراوجۆرەكان زۆر لە پێشترن. كاتێك ستەمی مرۆڤ بەرانبەر بە مرۆڤی تر دەبینم و شانازی بە زیرەكی خۆی دەكات، خۆزگە دەخوازم زیرەك نەبووینایە و بكوژی مرۆڤایەتی و بوونیش نەبووینایە.
ئێستەیش ئێمەی كورد لەناو دنیای مرۆڤایەتیدا لەو پارووە نانە دەچین كە پەڕیوەتە قوڕگی مرۆڤێك، نە دەتوانێ قووتی بدات و نە دەتوانێ تفی بكاتەوە.
كورد لە گەرووی زەوی گیری كردووە، نە زەوی دەتوانێ بڕشێتەوە و كورد لە خۆی دەربكات، چونكە كورد ئیرادەی بەرگری لەخۆكردنی هەیە، نە زەوی و دنیا كوردیان پێ قووت دەدرێت و بوونیشمان هەیە.
بۆیە كورد پێویستی بە خۆسەپاندن هەیە بەسەر دنیادا، لە سیاسەتی شەرمنانە و پڕ لە درۆی مرۆڤایەتی و دیموكراسی بێینە دەرەوە، هیچ نەتەوەیەك هێندەی كورد نە دیموكراسی لە بەرانبەر نەتەوەكانی تردا پێڕەو دەكات، نە مرۆڤایەتی. هەڵبەت كورد لە بەرانبەر كورد نە مرۆڤایەتی دەناسێ و نە دیموكراسی، ئەمەیش یەكێكە لەو كێشە سایكۆلۆجیای كورد لە خۆیدا هەیەتی. دەتوانم تەواوی دیموكراسی و بەناو مرۆڤایەتی دنیا بخەمە ژێر پرسیارەوە لە ئاست نەتەوەكانی تردا و بەتایبەتی كورد، بۆیشیان بسەلمێنم نەك بوونی نییە، كاتێك بەرژەوەندی خۆیان نەك دەكەوێتە مەترسییەوە، بگرە تەنیا خواربوونەوەیەكی تێدا روو بدات.
بۆیە وشەگەلی (مرۆڤایەتی، دیموكرایی، پێكەوەژیان، برایەتی گەلان) دەبێت لە دیرۆكی كورد بسڕینەوە، ئەگەر دەمانەوێ خۆمان بپارێزین و بوونی خۆمان بسەلمێنین. ئەگەریش تەنیا چەكەكانمان بەدەستەوەیە بۆ ئەوەی چەند كورسییەك بەدەست بێنین و چەند ناوچەیەك بەڕێوە ببەین لە ڕووی ئیدارییەوە، ئەوە شتێكی تر دەبێت.
ئێستە لە ناوچەی ڕۆژئاوای كوردستان جۆرێك بەڕێوەبردنی ئیداری و یەكسانی لەسەر دەستی كورد و بە خوێنی كورد پێكهێنراوە، هەموو پێكهاتە نەتەوەییەكانی ناوچەكە بە كورد و عەرەب و ئەرمەن و ئاشوورەوە پێكەوە دەژین، بەشێوەیەك یەكسانی ئیداری كاروبار لە نێوان ژن و پیاو بەڕێوە دەبرا و بوو بە مایەی سەرسوڕمانی دنیای دەرەوە، بەڵام ئەم بەڕێوەبردنە لە ڕۆژهەڵاتی ناوەڕاستی بێ چەكی پێشكەوتوو جۆرێكە لە (یۆتۆپیا) و ئەگەر بشكرێتە داخوازی ڕاستی "ئەمری واقیع" وەك ئێستە، ئەوا بە دوو هۆكار سەركەوتوو نابێت:
یەكەم، جیهانی رۆژئاوا و كاپتاڵیزمی سەرمایەداری زلهێزانی وەك ئەمەریكا و ڕووس، كە خشتی پایەكانی بوونیان لەسەر خوێن و جەستەی مرۆڤی ڕۆژهەڵاتی ناوەڕاست بە سوودوەرگرتن لە ئاژاوەنانەوە و داگیركاری سەروەت و سامانی ناوچەكە بونیاد ناوە، هەرگیز ڕێ نادەن بە ڕێككەوتنی نەتەوەكانی ڕۆژهەڵاتی ناوەڕاست، چونكە ئەوكات دەبێت كارگەی چەكەكانیان دابخەن و فرۆشیان نابێت.
خاوەن چەكە پێشكەوتووەكان ڕۆژهەڵاتییەكان بە (مشكی تاقیگە) تێگەشتوون و هەر جۆرە چەكێكی تازە بەرهەم دێنن، لەسەر ئێمە تاقی دەكەنەوە.
دووەم، ئەوەی برایەتی گەلان دەكاتە یۆتۆپیا مرۆڤەكانی ناوچەی ڕۆژهەڵات خۆیانن، مرۆڤگەلێكی ئایدۆلۆجی پڕ لە ڕق و كینەن بەرانبەر یەكتر و ڕۆحی خۆبەزلزانی و لووتبەرزی نەتەوەكان ڕێ نادات گوێ بۆ یەكتری بگرن و پێكەوە ڕێك بكەون، بۆ سەلماندنی ئەمەیش تا ئێستە تەواوی عەرەبی ناوچەكە كوردی ڕۆژئاوا بە هەڵهاتووی كوردی باكور دەزانن و لە یەكێك لە ڤیدیۆكانی بەردەستم، توندڕۆكانی بەناو ئۆپۆزسیۆنی سووری چەند شەڕڤانێك شەهید دەكەن، زۆر لە دڵەوە پێیان دەڵێن (بەرازەكان) لە زاری چەندان ڕۆشنبیریشیانەوە ئێمە هێشتا لە ناوچەكە بە میوان دەزانن.
تورك بە خەڵكی شاخەكانمان دەزانن، عەرەبی عێراقی بە كوردی ئێران ناومان دەبەن، ئێرانیش بە ئێرانیمان ناو دەبەن، تۆ بڵێیت 40 ملیۆن كورد وەك چیرۆكە خەیاڵییەكەی ئادەم تەنیا بەبێ دایك لە ئاسمانەوە بەربووبنە سەر ئەو پارچە زەوییەی ناوی كوردستانە؟ هاوكات كورد بەگشتی سەركەوتوو نەبووە لە گەیاندنی مێژووی خۆی و ڕابردووی خۆی لە ناوچەكە بە ڕۆژهەڵاتییەكان، بگرە زۆر كات بەهۆی بوونی چاوی تەماع لەو ناوچەیە، سیاسییەكانی ڕۆژئاوا كارێكیان كردووە ئەوروپاییەكان باشتر لە مێژووی كورد ئاگادار بن .
كورد دەڵێت "یەكجار تێبگەن زستان ساردە". كەواتە تۆ بوونت قبووڵ ناكرێت و تاكە ڕێ (سۆسیالیزمبوونێكی پەتی دوور لە هەموو ئایدۆلۆجیایەكە، بە یەكگرتوویی هەر چوار پارچەی كوردستان).
دەبێ ئەمجارە لە بەرانبەردا بۆ گەیشتن بە خۆسەپاندن و شكاندنی چەكی بایەلۆجی قەدەغەكراو، پێكەوە ڕاپەڕین و 40 ملیۆن كورد 10ی ببێتە قوربانی تا دنیای ڕۆژئاوا دێتە ئەو بڕوایەی بەڵێ ئێمە دەبێت نەخشەمان هەبێت لە دنیادا، كورد دەبوو زوو یەك بگرێت و دواكەوتووە، یەكگوتاری كورد بەهۆی دابەشبوونی هێزەكان بەسەر ئایدۆلۆجیای جیاجیا و ڕۆژهەڵات و رۆژئاوادا سەختە، بەڵام ئەستەم نییە و دەكرێت.
بە یەكگرتنی هەردوو هێزە گەورەكەی كورد (پارتی و پەكەكە) كورد دەتوانێ لە هەر چوار پارچە ڕابپەڕێت. وشەی كورد ئازایە، وشەیەكە بۆ گەوجاندنی كورد، بەڵێ منیش دەڵێم هێزە كوردییەكان شەڕكەری باشن، بەڵام شەڕ بۆ كێ بكەن باشە؟
كورد زۆر زیرەكە بەڵام ئاقڵ نییە
هاوكات كورد زۆر زیرەكە بەڵام ئاقڵ نییە. زیرەكی ئەوەیە زۆر شت درك پێ دەكەیت، بەڵام نازانی لە كوێ و كەی بەكاری بێنیت .
كورد كاتێك زیرەكی خۆی ئاقڵانە بەكار دێنێت ڕێكخراوێكی یەكگرتوو دابمەزرێنێت و خیانەتكارانی خۆی كپ بكات و ئەو ڕێكخراوە ببێتە دەمڕاستی كورد بە ڕووی دنیادا.
نەهامەتی كورد لەوەدایە تا ئێستە چاوەڕێی كۆنگرێسی ئەمەریكایە شتێكی بۆ بكات، كاتێك گوتارەكانی كۆنگرێس دەبینم بیری دراوسێیەكی نەنكمم دەكەوێتەوە، كاتێك لەگەڵ مێردەكەی دەبوو بە شەڕی دەهاتە لای نەنكم لەمدیو دیواری حەوشەكەوە بەدەنگی بەرز هاواری لە نەنكم دەكرد، حاجی لێم گەڕێ دەڕۆمەوە ماڵی باوكم، لە ژێریشەوە بە نەنكمی دەگوت تۆ بڵێ بەخوا ناڕۆیت بەخوا ناڕۆیت. ئیتر تابەیانی لای نەنكم دەمایەوە و بەیانی مێردەكەی سارد دەبووەوە و دەهاتەوە بە شوێنیدا.
جا كۆنگرێسیش وای لە كورد كردووە، دەڵێت كورد مافی هەیە كورد خیانەتی لێ كراوە لە پشتی كوردین... لەولاشەوە ترەمپ فرۆشتووینی بە توركیا. لە كاتێكدا دەتوانن ترەمپ و توركیایش ڕابگرن.
ئەو گوتارانەی كۆنگرێسی ئەمەریكا تەنیا كاتكوشتنە و دەیانەوێ سەركردەكانی كورد بەناوی ئاشتییەوە ڕازی بكەن، بەڕێككەوتنی ئاشتی ناوچە كوردییەكان بە فرۆشراوی بدەنە دەست تورك و پارەكەی بۆ باخەڵی ئەمەریكا و ڕووس و خاكەكەی بۆ تورك و نەهامەتییەكەی بۆ كورد.
ئەمە لە پلانی یەكەمدا، لە پلانی دووەمدا دەیانەوێ تورك تا قووڵایی ڕەقە ببەن و هێنانی ئەو گرووپ و كەسە توندڕەوانە بۆ ناوچەكە، لە پلانی یەكەمدا دوو ملیۆن كەسە و لە پلانی دووەمدا چوار ملیۆن كەسن كە هەموویان ڕەگەزنامەی توركیان پێ دراوە، واتە گواستنەوەی چوار ملیۆن هاووڵاتی توركی ڕەگەز جیاجیایە بۆ ناوچەكە.
بێدەنگی كورد لەمە، كوشتنی هەموو كوردە بەناوی ئاشتییەوە بۆ هەزار 400 ساڵی تر. بۆیە كورد دەبێت ئێستە (ئەتاكوردێك) دروست بكات و هەڵگری پەیامی (ئینا خەلەقنا كورد فی ئەحسەنن تەقویم بێت).