لە یەكگرتنەوەوە بۆ لێكترازانی ئیسلامییەكان

شەفیق بانیشاری

ساڵێك زیاترە سێ لایەنە ئیسلامییە سیاسییەكەی كوردستان،دەنگوباسی كۆبوونەوەیان خستووەتە ناو هەواڵی میدیاكان و ڕاكێشانی سەرنجی خەڵكی باوەڕداری ئیسلامی سیاسیی,ئەگەرچی لە ئاینی ئیسلامدا هاتووە كە مسوڵمانان هەموو یەكن و برای یەكن, بەڵام لێرە هەریەكە و بەبیروباوەڕێكی ئیسلامییەوە و تێگەیشتنی جیاوە بۆ ئیسلام, كاری حزبیی خۆیان دەكەن و دەتوانین بڵێینتەنیا خودایان یەكە.

حزبە ئیسلامییەكانی كوردستان لە سەرەتاوە بۆ كەمكردنەوە و بچووككردنەوەی یەكتر دروست بوون,بە سوودوەرگرتن لە هەندێك بۆشایی و هاوكاری لایەنە عیلمانییەكان و وڵاتانی دەوروبەر, لەپێناو كەمكردنەوەی سەنگی بەرامبەرەكەیان،چونكە وەك ئاشكرایە یەكەم حزبی سیاسی و چەكداری ئیسلامیی كوردستان بزووتنەوەی ئیسلامی بوو كە پێش و پاش راِپەڕین بە تەنیا لە گۆڕەپانەكەدا بوو بەرامبەر بە عیلمانییەكانی كوردستان، دواتر لە 1994 یەكگرتووی ئیسلامیی بە بەرنامە و شێوازێكی تری ئیسلامییانە هاتە گۆڕەپانی حزبایەتی ڕوونە هەلومەرجی هاتنەكەی لە چ بۆشایییەكدا بوو، بۆیە نامەوێ بچمە ناو ئەو سەرهەڵدان و ڕاگەیاندنەی هاوشانی یەكگرتووبزووتنەوەی ڕاپەڕین ناسراو بە(نەهزە)جموجۆڵی حزبی لە مەیدان بوو تا یەكگرتنی لەگەڵ بزووتنەوەی ئیسلامی لە كۆتای نەوەتەكان و سەرەتای 2000.
بەچەند ساڵێك دوای ئەوانیش, كۆمەڵی ئیسلامی و "جوندولئیسلام"لە هەناوی بزووتنەوەوە هاتنە دەرەوەو لەژێرناویجێبەجێكردنی بەرنامەی ئیسلامجوند بەتوندڕۆیی تەواو جیاواز بوو لە ئیسلامییەكانی تر، تەنانەت لە ئەركەكانی ئاینیشدا زۆركات دژی ئیسلامییەكانی تر بوو تا ئەو رۆژەی بە مووشەك بەڕێ كران. دواتر كۆمەڵ بە نەرمتر لەو توندڕۆیییە كەوتە چالاكی سیاسی، هەرچەندە سەرەتا كۆمەڵیش وەك هێزێكی چەكداریی خۆی سازدا و كاری دەكرد و حزبێكی جیهادی بوون،هەروەك بەشداریی پەرلەمانو لێدانی موزیك و زۆرشتی بە حەرام دەزانی وپێچەوانەی بزووتنەوەی دایك و یەكگرتووی ئیسلامیی كە بەشدار بوون لە پەرلەمان و حكوومەتدا، تا هێرشی ئەمەریكا بۆ سەربارەگانیان و بەجێهێشتنی هەورامان، سیاسەتی كۆمەڵ گۆڕا و نەرمتربووبەرامبەر حزبە عیلمانییەكان، بەڵام لەگەڵَ حزبە ئیسلامییەكان وەك پێشوو مایەوە.
هەرچەند لەماوەی بەشداری كۆمەڵ لە هەڵبژاردنەكانەوە تا ئێستەیش، زۆرجار لەلایەن هەریەك لەو حزبە ئیسلامییانەوە خواستی "یەكگرتن یا یەك لیستی هاوبەش"بۆ هەڵبژاردنپێشنیاز كراوە،هاوكات زۆرلە مسوڵمانان ئەوە دەخوازن بەراورد بە فرەحزبی و پەرتكردنی پەیامی ئیسلام یەكە و یەك پەیامیان هەیە، بەڵام لە بەرامبەر یەكتردا و بۆ ململانێ ئیسلامییەكان ئەوە رەت دەكەنەوە و تا ئێستە خەونی یەك لیستیش نەبووە بەراستی، نەك یەكگرتنەوەیان. بەڵام عیلمانییەكان چەند ئەزموونێكی وایان كردووە و بە ئەنجامیشیان گەیاندووە.
ساڵی ڕابردوو ئەم هەوڵانەی ئیسلامییەكان زۆر چڕ كرایەوە، سەرەتا بە ئامانجی یەكگرتنیان، چەند سفرەوخوانێك و رێوڕەسمی رۆژووشكاندنیشیان بۆ كرد، بەڵام هیچی بەرهەم نەهێنا. دواتر گوتاری خۆیان گۆڕی بۆ دروستكردنی قەوارەی ئیسلامی و لیستی ئیسلامیی،ئەمیش هەر بێ ئەنجام مایەوە، بە تایبەت پاش كۆچی دوای نەوشیروان مستەفا ئومێدی ئیسلامییەكانی كوردستان ڕوو لە پووكانەوە چوو،بەو پێیەی وا دەردەكەوێ كۆمەڵ مرخی لە هەڵبژاردنی داهاتوو خۆش كردووە تا جەماوەری گۆڕان بۆ خۆی ببات بەهۆی نزیكی و هاوڕای لەگەڵ ئەو حزبە، بۆیە ئەو خەیاڵە وای لێكردووە ئامانجی زیاتری هەبێت بۆ مسۆگەركردنی كورسی بەراورد بەو كورسییانەی لەگەڵ یەكگرتوو و بزووتنەوەی ئیسلامیی بەری دەكەوێت.لێرەوە دەردەكەوێ پڕۆژەی ئیسلامیی و یەكگوتاری ئاینی لە بەرامبەر چەند كورسییەكی پەرلەمان و ئامانجی دنیاییدا دەكەوێتە گۆڕەوە.
بۆیە بەپێی ئاماژەكان خەریكە ڕەوت و ئاراستەی جیاواز لە بواری ئیسلامی سیاسیی لە كوردستان دەردەكەوێ، بەمەش ئەو ڕاستییە روونتر دەبێتەوە كە هیچ كام لەو حزبانە خەمی ئیسلام و مسوڵمانانبوونی هەڵنەگرتووە، ئەگەر نا بەپێی دەقەكانی ئاین، مسوڵمان برای یەكن و لە جیاتی پەرتەوازە بوون، پێویستە یەكڕیز بن، بەڵام بەهۆی ئەوەی ئەمان بەناوی ئیسلامەوە كار بۆ مەرامی خۆیان دەكەن، هیچ پڕۆژەیەكی یەكگرتن هەرگیز روو نادات. چونكە ئامانجە دنیایییەكان پیرۆزتر دەردەكەون لایان تا ئامانجە ئیسلامییەكان.


PM:02:12:01/09/2017




ئه‌م بابه‌ته 726 جار خوێنراوه‌ته‌وه‌‌