ئەگەر واقعبینانە بڕوانینە بارودۆخی كوردستان لە ماوەی سێ دەیە حكوومڕانیی گەلی كورد و كابینە یەك لە دوای یەكەكانی كوردستان، هەموو ئەو كار و ئەركانەی لەو ماوەیەدا جێبەجێ كراون و بە ویژدانەوە باش و هەڵوەستەیان لە سەر بكەین، بەراوەردێك لەگەڵ سەرەتاكانی راپەرین و رەوشی ئاوەدانی و پێشكەوتنی كوردستان لە گشت بوارەكاندا بكەین، ئەوا ئەو راستییەمان بۆ دەردەكەوێت حكوومەتی كوردستان توانیویەتی سیمای گوندێكی گەورە بگۆڕێت بۆ شارێكی گەورە، لەگەڵ هەموو ئەو ئاریشە و كێشە سیاسی و ناوخۆییانە كە لەنێوان هێز و لایەنە سیاسییەكاندا بوونیان هەبوو، بە شەڕی خۆكوژیشەوە.
دەتوانین بڵێین، پێش ڕووخانی ڕژێمی بەعسیش ئەوا حكوومرانیی كوردستان لەژێر گوشار و ئابڵووقەدانی ئەو رژێمەدا بووە، تا نەتوانێت كوردستان لە رووی پێشكەوتن و ئاوەدانییەوە هەنگاوەكانی جێبەجێی بكات، ئیتر لە ڕووی بودجە و مووچە و بوارەكانی تریشدا. بەڵام حكوومەتی كوردستان دەستەوەستان نەوەستا و بەو توانا دارایییە سنووردارەی كە لە رێگەی خاڵە سنوورییەكان و ناوخۆیی كاروانی خزمەتگوزاری و ئاوەدانی بەرەوپێشەوە بردووە.
دەبێ ئاماژە بەو راستییەش بكەین، كێشە و گرژییە ناوخۆییەكان وا دەكەن كە كەسانی هەڵپەرست و نا نیشتیمانپەوەر و خۆپەرست بكەونە گیانی كوردستان و لە رێگەی نایاساییەوە دەست بەسەر داهات و سەروەت و سامانی زۆر بگرن كە ئەوەش دەچێتە چوارچێوەی گەندەڵی و قۆرخكارییەوە لەلایەن هەر كەس و بەرپرسێكەوە ئەنجام بدرێت، پێوستە رووبەرووی ڵپێچینەوەی یاسایی ببێتەوە و هەروەها ئەگەر بۆ ماوەیەكی زۆر ئەو كێشە و گرفتانە كە بەمەستم گەندەڵی و قورخكارییە چارەسەرییان بۆ نەدۆزرێتەوە نەك تەنها زیان بە ئاسایشی نەتەوەیی و ئابووری و كۆمەڵایەتیی دەگەێنێت، بەڵكو پایەكانی حكوومرانی سست و لاواز دەكات.
ئەمرۆ پرسی گەندەڵی و قۆرخكاریی هەندێك كەس و بەرپرس نەك تەنیا لە هەرێمی كوردستان بوونیان هەیە، بەڵكو ئەو كێشەیە لە عێراق، ناوچەكە و هەموو دنیا بوونی هەیە، حكوومەتەكان لە رێگە و چوا چێوەی یاسایی هەوڵەكانیان دەخەنە گەر تابتوانن رووبەڕووی ئەو نەخۆشییە كوشندەیە ببەنەوە و وڵاتەكەیان لە كێشەی گەورە كە زیانی گەورە بۆ سەر ئابووری وڵات و پێگەی حكوومڕانی جێدەهێڵێت رزگار بكەن.
ئەوەی دەمەوێت بیڵێم، ئەمرۆ كابینەی نۆیەمی حكوومەتی كوردستان بە سەرۆكایەتیی رێزدار مەسروور بارزانی ئەرك و بەرپرسیارییەتی قورس و گەورەی هەڵگرتووە، لەلایەن چارەسەری كێشە كەڵەكەبووەكانی حكوومەتە یەك لە دوای یەكانی كوردستان بە گەندەڵی و چاكسازییەوە كە وەك بەرێزی ئاماژەی پێ دا، پرۆسەیەكی گشتیرە و بەخێرایی چارسەر ناكرێت و دەبێ بە شێوەی سیستماتێك و هەنگاو بە هەنگاو كاری لەسەر بكرێت بۆ چارەسەركردن و بنبڕكردنی.
هەروەها پرسێكی تری ئەمرۆیی دۆزینەوەی چارسەرییە بۆ پرسی بودجە و مووچە و قەرزی هاووڵاتییانی كوردستان كە پەیوەستە بە ژیان و بژێویی هەموو تاكێك، حكوومەتی كوردستان هەموو ڕێكارەكانی خستووەتە گەر تا چارەسەری گونجاوی بۆ بدۆزێتەوە لە رێگەی گفتگۆی بەردەوام لەگەڵ دەسەڵاتدارانی بەغدا و هەروەها لە سەر ئاستی هەرێمی كوردستان بۆ بەدەسهێنانی داهات و فرۆشتنی نەوت و هتد.
لەلایەكی تریشەوە، لە ماوەی نزیكەی ساڵێك لە سەرهەڵدانی ڤایرۆسی كۆرۆنا ،سەرۆكایەتی حكومەتی كوردستان گشت توانا دارایی و ئیداریی و تەندروسییەكانی خستووەتە گەر بۆ پاراستنی گیانی كوردستانیان تا لەو نەخۆشییە مەترسیدارە پارێزراو بن. ئەوەش جگە لە ئەرك و بەرپرسیاریەتی دەزگە پەیوەندیدارەكان، ئەوا حكوومەتی كوردستان زۆر سەركەوتووانە توانیویەتی مامەڵە بۆ رووبەرووبوونەوەی ئەو نەخۆشیە بكات.
لە رووی ئاوەدانی و خزمەتگوزارییەوە، هەنگاوەكانی حكوومەتی كوردستان لە ماوەی 13 مانگی رابردوو، توانیویەتی زۆر سەركەوتووانە لە چەندان بواری جیاوازدا خزمەتگوازی و پرۆژەی ستراتیژی جێبەجێ بكات و بەدڵنییاییەوە لە ئایندەیەكی نزیكدا، بەرنامە و پرۆژەكانی تریش دەچنە بواری جێبەجێكردنەوە و ئەوەش رەنگدانەوەی زۆری لە سەر گەشەسەندن و پێشكەوتنی كوردستان لێ دەكەوێتەوە.
لێرەدا، گرنگە، چ هێز و لایەنە سیاسییەكانی بەشداربوو لە حكوومەتی كوردستان و چ ئۆپۆزسیۆن بە ڕژدی پشتیوانی ئەو هەنگاوانە بن بە بێ جیاوازی، وەك پێشتر سەرۆك وەزیرانی كوردستان بە راشكانەوە و راستگۆیانە گووتیان كە حكومەتی هەموو كوردستانیانە بە بێ جیاوازی، تا هەمووان لە سایەی ئەو ئاشتی و سەقامگیری و پێكەوە ژیانەی كوردستان بە ئاسوودەیی بەرەو ئایندەیەكی گەش و باقی ئامانجەكانمان هەنگاو بنێنین.