شەماڵ بۆكانی
هیچ دوور نەڕۆین لە مێژووی 100 ساڵەی كورددا لە چوار پارچە، سەرەڕای سەرهەڵدانی رێكخراو و پارتی جۆراوجۆر، بە ئایدیا و پێناسەی جیاوە لە رەوتێكی شۆڕشگێڕی نەتەوەیی، وەك چەپ و نەتەوەیی و ئاینی كوردی، ئیسلامییەكانیش لە كوردستان لە دوای ساڵی 1991وە ڕەوتێكی عەرەبییان بەخۆوە گرت، ئەگەر نا تەكێ و خانەقا و حوجرەكان پێش ئەمان ڕۆڵی سەرەكییان لە پەروەردەكردنی ناسیۆنالیستی كوردیدا هەبووە و ئێستەیش دەتوانن ئەو ڕۆڵە بگێڕنەوە. هەروەها چەپەكان لە دوای دەسەڵاتێكی كاتییان لە شەستەكانی زاینی لە كوردستاندا، بیركردنەوەیەكی هێمنانەتریان لە كۆمەڵگەی كوردیدا هێنایە ئاراوە و بۆیان ڕوون بووەوە كێشەی كورد كێشەی خاك و نەتەوەیە، ئەگەر نا زۆر ئاسایییە بۆچوونی جیاواز و دەتوانن پێكەوەژیان بكەن بە پێناسەی باوەڕە جیاوازەكان وەك كولتوورێكی باوی كوردەواری.
ئەوەی من مەبەستمە توخمی تێگەیشتنە لە باوەڕی دژبەرانی كورد، ئەویش وەك لە كتێبی "چێشتی مجێور"ی مامۆستا هەژار بۆمان دەردەكەوێ، كورد تێكەڵ بەهەر گرووپ و لایەنێكی عیلمانی و ئاینی بووبێت سەرەڕای خزمەتێكی زۆر لەو پێناوەدا، كاتێك كار دەگاتە سەر راگۆڕینەوە لەناو سیستمی حزبیدا، ئەگەر وەك مافی مرۆڤیش باسی لە كێشەی كورد كردبێت، یەكەم هەڵوێستی هاوەڵانی ئەندام و حزبی ئەوە بووە، تۆمەتبار كراون بە كوردایەتی و باوەڕی ناسیۆنالیستی، واتە ئەمە دوژمنانی كوردن باوەڕیان بەوەیە تۆ هەرچی ڕەنگ بگۆڕی دیسان ئەوان پێیان وایە تۆ جیاخوازی و داوای دەوڵەتی خۆت دەكەی، كەوایە چۆن كورد دەتوانێت كەرامەت و باوەڕی خۆی پێشێل بكات كە بووەتە مۆتەكەی خەونی نەیارەكانی كورد.
ئێستە كە لایەنی مێژوویی كێشەی كورد دیاری كرا، بە تێڕوانین لە دۆخی ئێستەی ناوچەكە و دنیا كە لە بواری سایكۆلۆجیای كۆمەڵایەتییەوە گەڕانەوەیە بۆ رێز و پێناسەی تاكەكەسی وەك پێناسەی نەتەوەیی، چۆن دەكرێت كێشەی سەرەكیت بۆ گەڕانەوەی ئەم كەسایەتییە كە خاك و قەوارەی دیاریكراوی خۆتە لە بەرچاو نەگری.
ئاخۆ تاكی كورد بیر لەوە دەكاتەوە بۆ لێی دەپرسن عێراقی، ئێرانی، سووریایی یان توركیایی؟ بیر بكەوە مافی مرۆڤ یانی چی؟ تۆی كورد بیرت لەوە كردووەتەوە كاتێك وڵاتێكی سەربەخۆت نییە، واتە وەك كەسێكی باوك نەناسراو پێناسە دەكرێی كە لە بۆچوونی كوردا قێزەونترمان لەو دەربڕینەمان نییە.
چۆن دەبێ نزیك بە 50 ملیۆن مرۆڤ خاوەنی سنوورێكی جیۆگرافی بە ناوی دەوڵەتی كوردستان نەبێت، ئێوەی تاكی باشووری بیرتان لەوە كردووەتەوە هەر دەنگێكتان بە "بەڵێ" بۆ سەربەخۆیی واتە 100 دەنگی كورد لە چوار پارچە بۆ پێناسەی كەسایەتی وەك مرۆڤ، باشوورییەكان بیریان لەوە كردووەتەوە سەرەڕای هەموو كێشەكانیان، ئەگەر ئەم دەرفەتە بۆ كوردانی رۆژهەڵات بڕەخسایە، شەقامەكانیشیان بە برژانگ خاوێن دەكردەوە، بەپێی یاسا كوردانی تر ناتوانن دەنگ بدەن، بەڵام دڵیان لە نووكی پێنووسەكانتاندایە بۆ رۆژی ریفراندۆمی سەربەخۆیی كوردستان .
بێ لە هەموو ئەمانە، پێویستە لە دەستكەوتەكانی سەربەخۆیی باشتر تێبگەین، دەبێ بزانین سەربەخۆیی واتە چارەسەری گرفتەكان و نەهێشتنی گەندەڵی، چونكە ئەمە بوونی دەوڵەتە سنووری خزمایەتی و پێوەندییە تایبەتەكان دەبەزێنێت و یاسا بێ جیاوازی سەروەر دەبێت، ئیتر ئەوكات یاسا سەروەری گەلە، یاسا شەفافییەتە، یاسا ویژدانە، یاسا پێناسەی ئەو پاسپۆرتەی ناو باخەڵتە لێی نووسراوە وڵاتی كوردستان و لە هەر جێیەكی ئەم گۆی زەوییە بیت رێز لە كەرامەتت دەگیرێت و ناڵێن عەرەب و فارس و توركی تیرۆریست، دەڵێن هاووڵاتی پێشمەرگەی پارێزەری شەرەفی مرۆڤایەتی.
ئێستە ناوی پێشمەرگە شەرەفی تۆی تاكی كوردە لەناو تیڤی و سوشیال میدیای هەموو ماڵەكانی دنیادا، مەهێڵە كەرامەتت بشكێ، مەهێڵە دز و جەردە خوێنت بمژن، تۆ لە دوای دەوڵەتی كوردستان دەتوانی كورستانییەكی ئازاد و خاوەن ماف بیت، ئەوكات بەپێی یاساكانی نێودەوڵەتی لە كوردستانێكی دیموكراتدا دەتوانی لاپەڕەی داواكارییەكانت بۆ گەورەترین دادگای دنیا بەرز بكەیتەوە.
بۆیە دەبێت بڕیار بدەین هەڵمەتی گشتپرسی سەربەخۆیی كوردستان دەنگی چوار پارچەیە و سنووری ئایدیای تەسكی حزبی تێك دەشكێنێت و دەبێ پێناسەكەی هەڵمەتی نەتەوەیی و ڕزگاری یەكجاری بێت و ببێتە خاڵی وەرچەرخان بۆ پارچەكانی تری كوردستان، تكایە ئەم شانازییە لە دەست مەدەن.