یەكێتی قاسیدێكی باش نییە

نووری بێخاڵی

پارتی ئەوەی وەك هەڵەی كرد، هاوكات هەڵەیەكی گەورەتر دەكات ئەگەر هەر بەم شێوەیە لەسەر میكانیزمی تێپەڕاندنی تەنگژەكان و چارەسەریی كێشەكان، پێشنیار و دەستپێشخەرییەكانی بۆ گۆڕان بە یەكێتی بسپێرێت. ئاخر ڕاستییەكەی لەو دۆخە پەرتەوازەیییەی یەكێتی تێیدایە، لەگەڵ ئەو خەونەی لەسەری ئەو حزبەدایە بۆ داگیركردنی گۆڕانی دوای نەوشیروان مستەفا و دڵڕاگرتن و ئیدارەدانی پارتی، ڕێك وەك ئەوەیە (بەز بە پشیلە بسپێریت).

یەكێتی كە ئێستە لە نێوان گۆڕان و پارتی گرەو لەسەر داهاتووی خۆی دەكات، نایەوێ نە شیش بسووتێ و نە كەباب. بەو مانایەی نە دەیەوێ دڵی پارتی بڕەنجێ و نە دووربارە كونی زەردەواڵەی دڕی گۆڕان لە خۆی بكاتەوە. بۆیە تا ئێستە كات دەكوژێ، ئەم كاتكوشتنە تەكتیكێكی سیاسیی ژیرانەی ئەو حزبەیە لەو نێوانەدا پێڕەوی دەكات، بۆ ئەوەی لە داهاتوو باشتر خۆی ڕێك بخاتەوە.

ئاخر یەكێتی كە لە ئاستی سەركردایەتیدا بەسەر دوو ئاراستەی بیركردنەوە و بڕیارداندا دابەش بووە، تەنانەت ئەو دابەشبوونەی ڕاستەوخۆ لە تۆنی دەنگی بنكە جەماوەرییەكەی و دابەشبوونی ئینتیمایان بۆ ئەم باڵ و ئەو باڵ، بە ئاسانی هەستی پێ دەكرێ و ڕەنگی داوەتەوە، ناتوانێ وەك هێزێكی خاوەن بڕیاری كۆنكرێتی لە ئاست كێشەكاندا خۆی یەكلا بكاتەوە. كەواتە بۆ ئەوەی هێندەی تر ماڵەكەی لێك نەترازێ، نایەوێ لە نێوان پارتی و گۆڕاندا بەتایبەت لە پرسی ڕەدوبەدەلی كاراكردنەوەی پەرلەمان و ڕیفراندۆمدا خۆی یەكلا بكاتەوە، بۆ ئەمەش كاراكردنەوەی پەرلەمان كارتێكی باشە بەدەستییەوە، بەتایبەتی كە لەوە پشتڕاستە گۆڕان لەگەڵ ریفراندۆمدا نییە (ئەمە لە نووسین و گوتار و لێدوانی هەڵسووڕێندراوە دژە بارزانی و پارتییەكانیدا وەك مانگی چواردەیە بە ئاسمانێكی ساف و ساماڵدا)، بۆیە بابەتی كاراكردنەوەی پەرلەمانی تەنیا بۆ خۆدزینەوە لەم بەرپرسیارێتییە نەتەوەیی و نیشتمانییە، كردووە بە (كراسی عوسمان). دەی ئەگەر وا نەبووایە، هەر ڕۆژە و لەسەر زاری گوتەبێژەكەی ناو و بەرگی تریان بە بەر پرۆسەكەدا نەدەكرد (بۆ نموونە ئێستە قەوانی ئاساییكردنەوەی پەرلەمان لە بری كاراكردنەوەی لێ دەدەن!).

لە كاتێكدا پرسەكە ئەمانە و چەندان رەهەندی تری هەن، كەچی یەكێتی وەك ئەوەی لە هەسارەیەكی تر بێت و وەك فریادڕەسی كێشەكانی ئەم هەسارەیە دابەزیبێت و دەستی لە هیچ لەم تەنگژە و كێشانەدا نەبێ، ئاوا ڕەفتار دەكات. كەچی ئەگەر قسە لە هۆكارەكانی قووڵكردنەوەی ناكۆكیی سیاسی، تەنگژەی دارایی و پەككەوتنی پەرلەمان بكرێ، یەكێتی پشكێكی زۆری لە هۆی سەرهەڵدان و قووڵكردنەوەی ئەو كێشە و تەنگژانە بەردەكەوێ.

بەهەرحاڵ، چش لە (فیتی سەر بە قولابە!)ی گۆڕینی سەرۆكی فركسیۆنەكەیان لە بەغدا لەو تەوقیتەدا. وەكوتر واز لە عینادی و كەللەشاخی زۆرێك لە هەڵسووڕێندراوی گۆڕان بێنن كە هەنووكە و پاش كۆچی دوایی ڕێكخەرەكەیان، دیار نییە ڕیش و جڵەوی بڕیاری حزبەكەیان لە دەست كێدایە، وەك چاو لەو گوتارە پۆپۆلیستییەی میدیاكەیان و هەڵوێست و گوتار و نووسینی ئەو هەڵسووڕێندراوانەشیان بپۆشن كە دەمێكی زووە، بڕیار و حوكمی پێشوەختەی خۆیان بەرمەبنای ڕقی سیاسی و مێژوویی لەسەر پارتی داوە. وەلێ بەدیوەكەی تردا، مەعقوول نییە كەسێكی ژیر و دنیادیتە و خاوەن ئەزموون كە لە سروشتی ڕووداو و هاوكێشەكان تێ بگات، لەناو ئەو حزبەدا نەبێ، ڕوانگە و تێگەیشتنێكی تری بۆ هەستیاریی قۆناغەكە و میكانیزمەكانی چارەسەری و لێكتێگەیشتن لەگەڵ پارتی هەبێت. 

بۆیە ڕەنگە سووربوونی گۆڕان بەوەی ئامادەی قبووڵكردنی پێشنیار و دەستپێشخەرییەكانی پارتی نییە (ئەوەی گۆڕان لە ختوخۆڕایی و بۆ گەرمكردنی بازاڕی هەڵوێست، بە مەرجەكانی پارتی ناویان دەبات!) لەبارەی چارەسەریی كێشەكان، لەوێوە سەرچاوە بگرێ كە بۆ دەبێ پارتی ڕاستەوخۆ ئەوان نەدوێنێ و یەكێتی بكاتە وەكیل و نوێنەر و قاسید و پەیكی خۆی؟. 

دیارە كەم و زۆر ئەگەر ڕوانگەیەكی وا هەبێت، گۆڕان ناحەق نییە، بەتایبەتی ئەو ئێستە حزبێكی سیاسییە و هەر نا لە ئاستی ئۆتۆریتەی جەماوەری و كاریگەریی سیاسی لە زۆنی سەوز، خۆی ئەگەر لە یەكێتی زیاتر نەبینێ (كە هەر وایشە!)، ئەوا خۆی هاوشانی ئەو دەخاتە ڕوو. بەم پێیە پارتی ئەگەر كەناڵی ڕاستەوخۆی پێوەندی لەگەڵ گۆڕاندا نەكاتەوە و هەر بە تەمای قاسیدەكەی بێت (كە لە كۆبوونەوەیان لەگەڵ پارتی لە ئاستی باڵادا خۆیان بە خەمخۆر نیشان دەدەن، بەڵام لە گەڕانەوەیاندا بۆ سلێمانی، بەگوێرەی دڵڕاگرتنی هەردوو باڵەكە و زیاتریش بە ئاراستەی بەرژەوەندیی باڵی دەستڕۆیشتوو كە خۆی بە هاوسەنگەری گۆڕان دەزانێ لە بەرامبەر پارتیدا، گوتاری خەمخۆرییەكەیان دادەڕێژنەوە و پەیامەكەی پارتی بە شەل و سەقەتی دەگەیەننە گردەكە!). 

ئەمە وێڕای كات لە دەست چوون، هەروەها بواری مانۆر و گەمەی زیاتریش بە یەكێتی دەدا بۆ ئەوەی كات بكوژێ، چونكە لە بنەڕەتدا وێناچێ یەكێتی نیازی كاراكردنەوەی پەرلەمانی هەبێت، ئەوە ئەگەر لەژێر فشارەكانی گۆڕانیشدا لە پرۆسەی ریفراندۆم هەنگاوەكانی سست و خاوتر نەبنەوە (دیاری نەكردنی ئەندامێك بۆ كۆمیتەی ریفراندۆم تا ئێستە، ئاماژەیەكی باش نییە!).

لەم نێوەدا ئەم گەمەی كاتكوشتنەی یەكێتی و ئەم غەزرینەی گۆڕان، نەك هەر بە خێر بۆ بەرنامە و پلانەكانی پارتی بۆ چارەسەكردنی كێشەكان و ئاشتەوایی سیاسی و كۆدەنگی نیشتمانی ناشكێنەوە، بەڵكو بەردەوامیی ئەم گەمەیە بواری مانۆڕی زیاتر بۆ یەكێتی دەكاتەوە، بۆ ئەوەی خۆی وەك ناوبژیوان و چاكەكار و بێبەری لە گوناه و بەرپرسیارێتیی كێشە و تەنگژەكان بنوێنێ و ئەمەش بكاتە كاڵایەكی باش بۆ هەڵبژاردنەكانی داهاتوو. 

بۆیە ئەگەر پارتی دەیەوێ لەگەڵ گۆڕاندا بگاتە چارەسەرێكی ڕاستەقینە و لێكتێگەیشتنێكی هاوسەنگ و بەرهەمدار، ئەوا دەبێ ڕاستەوخۆ لەگەڵیدا دانوستاندن بكات و واز لە گەیاندنی پەیام و مەسجەكانی بە دەستی ئەم وەكیل و قاسید و پەیك بهێنێ.

AM:09:45:14/07/2017




ئه‌م بابه‌ته 28154 جار خوێنراوه‌ته‌وه‌‌