كه‌ (ئه‌كراد)ه‌كه‌ی نه‌بووم، (ئه‌نساڕ)یشی نابم!

نووری بێخاڵی

كه‌م و زۆر، شتێك سه‌ر له‌ سیاسه‌ت ده‌رده‌كه‌ین. به‌و مانایه‌ی تێده‌گه‌ین سیاسه‌ت هه‌م زانسته‌ و هه‌میش هونه‌ر، وه‌لێ له‌وه‌یش دڵنیاین كه‌ كورد به‌ هیچ كام له‌ دیوه‌ زانستی و هونه‌رییه‌كه‌ی سیاسه‌تی نه‌كردووه‌، یان ڕاست و ڕاشكاوتر بڵێین، نه‌یزانیوه‌ و نایزانێ سیاسه‌ت به‌و دوو تێگه‌یشتنه‌وه‌ بكات. ئه‌گه‌ر گوایه‌ له‌ سیاسه‌تدا دۆستایه‌تی هه‌میشه‌یی نییه‌، به‌ڵام به‌رژه‌وه‌ندیی به‌رده‌وام هه‌یه‌، ئه‌وا هه‌ر له‌ سیاسه‌تیشدا شتێك نییه‌ به‌ ناوی ئاكار و مۆڕاڵ (به‌ كوردی و به‌ كورتی، ئه‌خلاق).

له‌ كاتێكدا نه‌ك هه‌ر له‌ سیاسه‌تدا، به‌ڵكو له‌ ته‌واوی كایه‌كانی ژیاندا ژیریی ئه‌وه‌یه‌ له‌ نێوان (چاك و خراپ)دا، یه‌كه‌میان بژاره‌ بێت، ئه‌گه‌ریش (چاك)ه‌كه‌ نه‌كرا، (خراپ)ه‌كه‌ نه‌یه‌ته‌ هه‌ڵبژاردن، كه‌چی كورد چونكه‌ نه‌یزانیوه‌ و نازانێ سیاسه‌ت بكات، وه‌ك چۆن له‌ ناكۆكیی ناوخۆییدا، له‌ نێوان (خراپ، خراپتر، خراپترین)دا، (خراپ)ی هه‌ڵبژاردووه‌. به‌ هه‌مانشێوه‌، له‌ پێوه‌ست به‌ ململانێكانی له‌گه‌ڵ ده‌ره‌وه‌ی خۆی، له‌گه‌ڵ نه‌یاره‌كانی، له‌ (خراپ)ه‌وه‌ تا (خراپترین)ه‌كه‌ی چووه‌، كاتێكیش له‌وسه‌ری تونێڵه‌كه‌ به‌ ده‌ستی خاڵی و كۆڵێ برینه‌وه‌ ده‌رچووه‌، له‌ بری به‌خۆداچوونه‌وه‌، دووباره‌ له‌ (خراپ)ه‌كه‌یه‌وه‌ تێی هه‌ڵچووه‌ته‌وه‌. ئینجا خۆشییه‌كه‌یش ئه‌وه‌یه‌، ئه‌م كۆمیدیایه‌ی نه‌ك هه‌ر پاساو داوه‌ته‌وه‌ و ده‌داته‌وه‌، به‌ڵكو به‌ حیكمه‌ت و ژیری و ئه‌ندێشه‌مه‌ندی و هونه‌ری سیاسه‌تكردن، به‌ كۆمه‌ڵگه‌كه‌ی فرۆشتووه‌ته‌وه‌ و ده‌فرۆشێته‌وه‌.

له‌ شوێنكات و بۆنه‌یه‌كی تردا باسم له‌وه‌ كردبوو، چونكه‌ به‌رمه‌بنای باوه‌ڕێكی جێگیر و یه‌قینێكی كۆنكرێتی به‌ كوردبوون و كوردستانیبوون، نه‌ك به‌ هه‌وای حزب و سۆزی سه‌ركرده‌ و كه‌فوكوڵی ناكۆكیی سیاسی، ده‌نگمان به‌ (به‌ڵێ) بۆ سه‌ربه‌خۆیی دا، بۆیه‌ نه‌ په‌شیمانین و نه‌ شه‌رمیشمان پێیه‌. ته‌نانه‌ت ئه‌گه‌ر به‌یانی بچینه‌وه‌ ناو پرۆسه‌كه‌، هه‌مان هه‌ڵوێستمان ده‌بێت و شه‌ڕێكی سه‌ختتریش له‌پێناو سه‌رخستنیدا ده‌كه‌ین. ئاخر هه‌ر ئه‌و باوه‌ڕ و یه‌قینه‌مان بوو كه‌ له‌ هیچ كام له‌ هه‌ڵبژاردنه‌كانی عێراقدا به‌شداریمان نه‌كرد و نه‌خێرێكیشمان به‌ ناوچه‌وانی ده‌ستووری عێراقه‌وه‌ نا، ئه‌و ده‌ستووره‌ی كه‌ركووك و ناوچه‌ داگیركراوه‌كانی كوردستانی به‌ (١٤٠ مسقاڵی برێمه‌ر) له‌ عێراقی عرووبه‌ ماره‌ كرده‌وه‌. ئێسته‌یش كه‌ خیانه‌تی ناوخۆیی ١٦ی ئۆكتۆبه‌ر، به‌ پیلانگێڕی به‌ریتانیا و گه‌له‌كۆمه‌ی پاسدار و فه‌وجه‌ خه‌فیفه‌كانی له‌ عێراق و لبنان (حه‌شدی شه‌عبی و خزبوڵا)، خه‌نجه‌رێكی ژه‌هراوی له‌ جه‌سته‌مان دا و حزبه‌كانی عێراق و كوردستان له‌ سه‌روبه‌ندی ئاماده‌كاریدان بۆ چوونه‌وه‌ ناو گه‌مه‌ی نوێی هه‌ڵبژاردن له‌ عێراقدا، نه‌ك هه‌ر به‌ خۆمان، به‌ڵكو تا ئه‌و شوێنه‌ی له‌ده‌ستمان بێت، خه‌ڵك له‌سه‌ر بایكۆتكردنی هان ده‌ده‌ین، به‌تایبه‌تی ئه‌وانه‌ی له‌ پرۆسه‌ی ڕیفراندۆمی سه‌ربه‌خۆییدا به‌ (به‌ڵێ) ده‌نگیان دا.

ئاخر شه‌رمێكی گه‌وره‌یه‌ مرۆڤ (به‌ لایه‌نی كه‌مه‌وه‌ من باسی خۆم ده‌كه‌م)، دوێنێ به‌ (به‌ڵێ) ده‌نگی به‌ سه‌ربه‌خۆیی كوردستان دابێت، سبه‌ی ده‌نگی خۆی بخاته‌ سندووقی عێراقچێتییه‌وه‌، هه‌ر به‌ راستی ئه‌وه‌ بوێری نا، به‌ڵكو ڕووقایمی ده‌وێ.

په‌ندێكی كوردی هه‌یه‌ ده‌ڵێ: ”ئه‌وه‌ی له‌ مشك بێت، جه‌واڵ دڕێنه‌"، ئه‌م په‌نده‌ پڕ به‌ پێستی تێگه‌یشتن و مامه‌ڵه‌ی عرووبه‌یه‌ له‌گه‌ڵ كورد و دۆزه‌كه‌ی. به‌و مانایه‌ی شۆڤینیزمی عه‌ره‌بی كه‌ دوای ڕووخانی به‌عس، به‌ فاشیزمی مه‌زه‌ویش بارگاوی كراوه‌، له‌ پێوه‌ست به‌ مافه‌ ره‌واكانی كورد به‌ موو نه‌گۆڕاوه‌ و ناشگۆڕێت. به‌وه‌ نییه‌ فڵان كه‌س و هێز نه‌رم، فیسار كه‌س و لایه‌ن توندن. چونكه‌ نه‌رمی و توندیی ئه‌و كه‌س و لایه‌نانه‌ له‌ به‌رانبه‌ر كورددا پێوه‌ندی به‌ میانڕه‌ویی یه‌كه‌م و توندڕۆیی دووه‌م، عه‌قڵانیه‌تی یه‌كه‌م و ناعه‌قڵانیه‌تی دووه‌م، كورددۆستی یه‌كه‌م و كوردنه‌یاری دووه‌مه‌وه‌ نییه‌، به‌ڵكو له‌ ڕاستیدا پێوه‌ندی به‌ ئاست و ڕێژه‌ی ڕه‌خسانی هه‌لومه‌رج و زه‌وینه‌ی موماره‌سه‌كردنی شۆڤینیزمه‌وه‌ هه‌یه‌ بۆ هه‌ردوو به‌ره‌كه‌ كه‌ بۆ یه‌كه‌میان نه‌ڕه‌خساوه‌ (یان كه‌متر له‌بار بووه‌!)، به‌ڵام بۆ دووه‌میان ڕه‌خساوه‌. 

به‌م پێودانگه‌ هیچ كام له‌ (جه‌عفه‌ری، مالیكی و عه‌بادی) و ئه‌وانه‌ی پێش ئه‌مانه‌ هاتوون و ئه‌وانه‌یشی دوای ئه‌مان دێن، له‌ پێوه‌ست به‌ دۆزی كورد، جیاوازییان نییه‌، چونكه‌ بۆ هه‌موویان سه‌روه‌ری و یه‌كپارچه‌یی خاكی عێراق، وه‌ك به‌شێكی دانه‌بڕاو له‌ نیشتمانی عه‌ره‌ب هێڵی سووره‌.

له‌ دوای ڕووخانی به‌عسه‌وه‌، ئه‌وه‌ 14 ساڵه‌ حزبه‌ كوردییه‌كان له‌گه‌ڵ هه‌موو ده‌موچاوه‌كانی دوای سه‌دام ئه‌زموونیان هه‌یه‌، بۆیه‌ ئه‌گه‌ر فێڵ له‌ ویژدانی خۆیان و درۆ له‌گه‌ڵ گه‌لی كوردستاندا نه‌كه‌ن، به‌ لایه‌نی كه‌مه‌وه‌ ددان به‌وه‌دا ده‌نێن كه‌ (مالیكی و عه‌بادی)، دوو تاكی پێڵاو و ڕووی هه‌مان دراوی عرووبه‌ و فاشیزمیی مه‌زه‌وین. ئه‌گه‌ر بیانوویش ئه‌وه‌یه‌ دووه‌م توندڕۆتر بووه‌، وه‌لێ دیوه‌كه‌ی تری ڕاستییه‌كه‌ ئه‌وه‌یه‌، دووه‌میان كاوێژی له‌سه‌ر میراتی یه‌كه‌م كردووه‌، به‌ڵام به‌ ترش و خوێكردنه‌وه‌. 

بۆیه‌ ڕه‌نگه‌ بۆ من وه‌ك هاووڵاتییه‌كی ئاسایی، دواتر وه‌ك نووسه‌ر و ڕۆژنامه‌نووسێك، به‌تایبه‌تیش وه‌ك كوردێك كه‌ قه‌ت بڕوام به‌ عێراقچێتی نه‌بووه‌ و نابێ. ئه‌و هه‌نگاوی جوانكردنه‌وه‌یه‌ی ده‌موچاوی ناشیرینی مالیكی (یه‌كه‌م ئه‌ندازیاری بڕینی قووتی خه‌ڵكی كوردستان و بودجه‌ی پێشمه‌رگه‌، ده‌ستپێشخه‌ر له‌ جووڵه‌ پێكردنی هێز به‌ره‌و كوردستان، داهێنه‌ری الدم بالدم به‌رانبه‌ر به‌ كورد و..........!) شتێكی نۆرماڵ و شیاو نییه‌، ته‌نانه‌ت ئه‌گه‌ر به‌ پاساوی گه‌مه‌ی سیاسه‌ت و گۆڕانی به‌رژه‌وه‌ندی و چی و چیتریش پینه‌ و په‌ڕۆ بكرێته‌وه‌. 

به‌هه‌رحاڵ، پاساوی حزب و سیاسییه‌كان هه‌رچی بێت بۆ ئه‌م یارییه‌ دۆڕاوه‌، ئه‌وه‌ شتێكه‌، به‌ڵام به‌ لایه‌نی كه‌مه‌وه‌ بۆ من وه‌ك كوردێك (من باسی خۆم ده‌كه‌م)، كه‌ له‌ ڕۆژی بڕینی بودجه‌ی كوردستان به‌ ده‌ستی ئه‌م كاراكته‌ره‌ی شۆڤینیزمی عه‌ره‌بی، تا ڕۆژی ئه‌نجامدانی ڕیفراندۆم، كه‌ ئه‌و زاته‌ و شله‌ و ئه‌عوانه‌كانی له‌ كوردستاندا دژی پرۆسه‌كه‌ بوون، به‌ باوه‌ڕه‌وه‌ له‌ سه‌نگه‌ری دژه‌ (ئه‌كرادی مالیكی) وه‌ستامه‌وه‌، بۆیه‌ به‌ شووره‌یه‌كی زۆر و شه‌رمێكی گه‌وره‌ بۆ خۆمی ده‌زانم، دوێنێ دژه‌ (ئه‌كرادی مالیكی) و ئه‌مڕۆ (ئه‌نساڕی مالیكی) بم. 

AM:10:22:28/12/2017




ئه‌م بابه‌ته 638 جار خوێنراوه‌ته‌وه‌‌