به‌ره‌و ساڵوه‌گه‌ڕی شكۆمه‌ندی

نووری یێخاڵی

به‌ داخه‌وه‌، سه‌ره‌ڕای هه‌موو ئه‌و تاوانه‌ دڕنده‌ییانه‌ی به‌ درێژایی 100 ساڵی ڕابردوو، حكوومه‌ته‌ یه‌ك له‌دوا یه‌كه‌كانی عێراق له‌ دژی كورد ئه‌نجامیان داوه‌. وێڕای ئه‌وه‌ی كورد تاكه‌ ئه‌زموونێكی جوان و ئومێدبه‌خشی له‌گه‌ڵ هیچ كام له‌ عێراقی (مه‌لیك و قاسم و هه‌ردوو عارف و به‌كر و سه‌دام و مالیكی و عه‌بادی)دا نه‌بووه‌، كه‌چی له‌ ماوه‌ی ئه‌م 100 ساڵه‌دا، كورد خۆبه‌خش و دڵخوازانه‌، به‌ لایه‌نی كه‌مه‌وه‌ دووجار داروپه‌ردووی عێراقی داڕووخاوی خسته‌وه‌ سه‌ر یه‌ك و ده‌وڵه‌تی عێراقی وه‌ك دیارییه‌كی به‌ نرخ، بۆ عه‌ره‌ب خستووه‌ته‌ سه‌ر سینی ئاڵتوونی. نزیكترین نموونه‌یشمان دوای ڕووخاندنی به‌عسه‌، كه‌ ئێسته‌یشی له‌گه‌ڵدا بێت، سه‌ركردایه‌تیی كوردستان به‌ ڕوویه‌كی زۆر قایمه‌وه‌ شانازی به‌وه‌ ده‌كات، كه‌وا ڕۆڵی سه‌ره‌كی له‌ دروستكردنه‌وه‌ی عێراقی عرووبه‌دا گێڕاوه‌! 

واز له‌ خیانه‌ت و خیانه‌تكارانی ١٦ی ئۆكتۆبه‌ر بێنن، ئیتر ئه‌وه‌ شتێكه‌ له‌ جیناتیاندا و بووه‌ته‌ میرات و خوو. به‌ دیوه‌كه‌ی تردا، هه‌ر كوردێك ئیتر هاووڵاتیی ئاسایی، یان سه‌ركرده‌ بێت. هه‌ر گرووپێك له‌ كوردستان، ئیتر حزبی سیاسی بێت، یان كۆمه‌ڵه‌ی ئاسایی، هێشتا و تا ئه‌م چركه‌ساته‌، ئینجا به‌ هه‌ر بڕوبیانوویه‌كه‌وه‌ بێت، بڕوا و متمانه‌ی به‌وه‌ بێت كه‌ ده‌توانێ له‌ سایه‌ی عێراقی عرووبه‌دا به‌ شكۆمه‌ندییه‌وه‌ بژیی، ئه‌وا له‌ چه‌ند حاڵه‌تێك به‌ده‌ر نییه‌. یا بچووك و خۆبه‌كه‌مزانه‌، یان عاشقه‌ پاشكۆیه‌تی و شوێنكه‌وته‌یه‌، یاخۆ ئه‌وه‌تا له‌ مانا ورده‌كانی خیانه‌ت نه‌گه‌یشتووه‌.

ڕاستییه‌كه‌ی هاووڵاتییانی كوردستان وه‌ك تینووی سه‌روه‌ریی نیشتمانی و شكۆی نه‌ته‌وه‌یی، بۆ ئه‌وه‌ به‌پیر ڕیفراندۆمه‌وه‌ نه‌چوون، تا جارێكی تر ببنه‌وه‌ یان ڕاستتر بڵێین، له‌به‌ر میزاجی سیاسیی فڵان حزب و به‌رژه‌وه‌ندیی ئابووریی فیسار سه‌ركرده‌، له‌به‌ر دڵی ئه‌م كه‌س و خاترخوایی ئه‌و هێز، بكرێنه‌وه‌ به‌ عێراقی.  

زۆر باش له‌وه‌ تێده‌گه‌ین، كه‌ له‌ناو قوڕگی ئه‌م هه‌موو نه‌هه‌نگه‌ی ناوچه‌كه‌دا كه‌ داگیركه‌ری كوردستانن. هه‌روه‌ها له‌ناو هاوكێشه‌ی به‌رژه‌وه‌ندییه‌ ئابووری و سه‌ربازییه‌كانی وڵاتانی ناوچه‌كه‌ و دنیای بڕیار به‌ده‌ست دا، ڕاگه‌یاندنی سه‌ربه‌خۆیی هه‌روا ئاسان نییه‌. وه‌ك چۆن ئه‌وه‌ش ده‌زانین كه‌ به‌ ته‌نیا (هاوبه‌شی، سازان و هاوسه‌نگی) نا، به‌ڵكو پێش ئه‌وانه‌ش، ده‌بێ چوارچێوه‌یه‌كی تری یاسایی و ده‌ستووری، یان ڕاستتر، سیسته‌مێكی تری فراوانتر له‌ فیدڕاڵیزم له‌ عێراقدا بهێنرێته‌ ئارا، بۆ ئه‌وه‌ی تا ئه‌و ڕۆژه‌ دێت و ده‌بینه‌ خاوه‌نی سه‌روه‌ریی خۆمان، بتوانین ده‌ست به‌ ڕایه‌ڵه‌ و پردی ژیان و مانه‌وه‌ی به‌ زۆری زۆرداریمان له‌ عێراقدا بگرین، به‌ڵام ئه‌وه‌ی پێش ئه‌نجامدانی ئه‌و پرسه‌ نیشتمانی و نه‌ته‌وه‌یی و مێژووییه‌ی بینیمان له‌ هه‌ڕه‌شه‌ و چاوسووركردنه‌وه‌ی داگیركه‌رانی كوردستان، فشار و هه‌ڵوێستی دنیای ده‌ره‌وه‌ی دژه‌ ئازادی و دیموكراسی و بنه‌ما یاسایییه‌كانی (مافی گه‌لان له‌ بڕیاردانی چاره‌نووسی خۆیان). ئه‌و دنیایه‌ی جارێك به‌ یاسا مرۆیییه‌كانی، جارێكیش به‌ به‌نده‌كانی (ودرۆ ویڵسۆن)، جارێكی تریش به‌ چه‌مكه‌كانی به‌یه‌كه‌وه‌ژیانی ئاشتییانه‌ و چی و چیتر، قه‌رزدارمان ده‌كه‌نه‌وه‌. یان ئه‌وه‌ی ئه‌و ده‌رهاویشته‌ دوژمنكارییانه‌ی كه‌ دوای ڕیفراندۆم له‌ خیانه‌تكاریی ناوخۆیی و هێرشی داگیركارییانه‌ی سوپای عێراقی عه‌ره‌بی و میلیشیاكانی حه‌شدی شیعی تایفی ڕووبه‌ڕوومان بوونه‌وه‌، بمانخه‌نه‌ ژێر باری پێشمه‌رجی خۆڕاده‌ستكردن و پاشگه‌زبوونه‌وه‌ له‌ ئامانجه‌ نه‌ته‌وه‌یی و نیشتمانییه‌كانمان، ئه‌مه‌ ناكرێ قبووڵ بكرێت.

ڕیفراندۆم ڕووداوێكی ڕاگوزه‌ر نه‌بوو و نییه‌، به‌ڵكو كه‌ینوونه‌ و به‌رده‌وامییه‌، پرۆسه‌یه‌كه‌ ده‌بێت بگوازرێته‌وه‌ ناو كۆنه‌ستی كۆمه‌ڵگه‌، له‌ هۆشیاریی ده‌سته‌جه‌معیی ئێمه‌دا ڕه‌نگ بداته‌وه‌، ڕۆژانه‌ خۆی به‌رهه‌م بێنێته‌وه‌. ئه‌مه‌ش به‌ر له‌ هه‌ر كه‌س و دامه‌زراوه‌یه‌ك، ئه‌ركی ڕۆشنبیری نه‌ته‌وه‌یی و ناوه‌ندی ڕۆشنبیریی كوردستانییه‌ كه‌ ڕۆڵی كارا له‌ به‌رهه‌مهێنانه‌وه‌ی ئه‌و هۆشیارییه‌ نه‌ته‌وه‌یییه‌دا بگێڕێت. له‌وه‌دا حزبی كوردی، هیچ حزبێك، جێی بڕوا و متمانه‌ نییه‌. چونكه‌ هیچیان هه‌ڵگری مه‌شخه‌ڵی بیری نه‌ته‌وه‌یی نین، ئه‌وان ڕه‌نگه‌ (كوردایه‌تی!) بكه‌ن، به‌ڵام له‌ پێوه‌ست به‌ (كوردبوون)دا، كڵۆڵ و هه‌ژارن.

كامه‌ حزبی كوردستان (كه‌ به‌ زۆر ناومان ناون حزبی كوردی، وه‌ك چۆن له‌ ختوخۆڕایی به‌ عه‌لمانی تاوانباریان ده‌كه‌ین!)، دواجار كه‌ دێته‌وه‌ سه‌ر (عێراق)، دڵی بۆ به‌غدا لێ ده‌دات. كامه‌ حزب له‌م كوردستانه‌ پێی وایه‌ سوپه‌ر كوردستانییه‌، ته‌نیا پێچكه‌ كورسییه‌كی په‌رله‌مان و لامێزی وه‌زاره‌تێك له‌ به‌غدا شك ببات، دێته‌وه‌ سه‌ر سروشتی خۆی و ده‌بێته‌وه‌ پۆست عێراقچی. ئاخر هه‌ر ئه‌م دڕدۆنگی و ترسه‌ی حزبی (كوردی!)یه‌ له‌ خۆساغكردنه‌وه‌ له‌سه‌ر كوردستانیبوون و پڕۆژه‌ی سه‌ربه‌خۆیی، بوار بۆ ده‌مگه‌رمێكی وه‌ك (ئاراس فه‌تاح) و هاوكوفه‌كانی خۆش ده‌كات، كه‌ شه‌رمی خوێنی پێشمه‌رگه‌ شه‌هیده‌كانی داستانی (پردێ و سحێلا و مه‌حموودییه‌) داینه‌گرێت، چاوه‌ ئایدیۆلۆجییه‌ كوێره‌كه‌ی، خیانه‌ت و خیانه‌تكارانی ١٦ی ئۆكتۆبه‌ر، دڕنده‌یی میلیشیاكانی حه‌شدی شیعی ده‌رهه‌ق به‌ خه‌ڵكی سڤیلی خورماتوو و كه‌ركووك نه‌بینێت و ڕووخاندنی پردی (پردێ) به‌ شكستی ناسیونالیزم بزانێ. له‌مه‌ش كاره‌ساتتر، ئه‌م گرێ ده‌روونییه‌یشی، به‌ كوردبوون و ئازادیخوازی به‌ خه‌ڵك بفرۆشێته‌وه‌. 

به‌داخه‌وه‌، حزب له‌م وڵاته‌ی ئێمه‌دا له‌ ماشێنی وه‌گه‌ڕخستنی به‌رژه‌وه‌ندییه‌ ئابوورییه‌كانی، له‌ فووكردن به‌ ئاگری ناكۆكیی و ململانێی ناوخۆیی، له‌ هه‌ڵپه‌كردن بۆ ده‌سه‌ڵات و قۆرخكاری زیاتر، هیچ ڕوانگه‌یه‌كی ڕۆشن و ستراتیجیی ئاشكرا و گوتارێكی ڕاشكاوی نه‌ته‌وه‌یی نییه‌. 

ئه‌فسووس، حزب له‌م وڵاته‌ی ئێمه‌دا و له‌ پێوه‌ست به‌ هه‌ڵوێستی نیشتمانی و باوه‌ڕی نه‌ته‌وه‌یی، ته‌نیا له‌سه‌ر په‌رچه‌كردار ده‌ژیی.
كاتێ مرۆڤی شكۆمه‌ندی و سه‌روه‌ریخواز، دڕدۆنگی و ترسی حزبی (كوردی!) ده‌بینێ له‌ سه‌رله‌نوێ خۆشوناسكردنه‌وه‌ له‌به‌ر ڕۆشنایی بیری نه‌ته‌وه‌یی و كوردستانی... كه‌ په‌رله‌مانتێره‌ كورده‌ پڕۆ - مالیكی و دواتر پڕۆ - عه‌بادییه‌كانی به‌غدا ده‌بینێ (ئه‌وانه‌ی له‌ ڕقی پارتی، له‌ پێوه‌ست به‌ خه‌ون و ئامانجی نه‌ته‌وه‌یی كورد، چوونه‌وه‌ سه‌ر سروشتی دێزه‌یی خۆیان!) كه‌ كائینی عه‌جیبی وه‌ك ئاراس و ئه‌و شتانه‌ ده‌بینێ، كینه‌ی مێژوویی و ڕقی سیاسی و ئایدیۆلۆجی، ئاوا كوێری كردوون.. كه‌ خیانه‌تكارانی ١٦ی ئۆكتۆبه‌ر ده‌بینێت، نه‌ك داناوه‌شێن، به‌ڵكو كوردایه‌تیش به‌ كوردستانیان ده‌فرۆشنه‌وه‌ و گوایه‌ كوردستانیان له‌ مه‌ترسیی شه‌ڕێكی خوێناوی پاراستووه‌. 

هه‌قه‌ شانازی به‌وه‌ بكات كه‌ سه‌ر به‌ هیچ كام له‌م چوار تایپه‌ی پێشوو نییه‌. مافی خۆیه‌تی هه‌ست به‌ ویژدان ئاسووده‌یی بكات كه‌ ڕه‌گی دره‌ختی بیركردنه‌وه‌ و داری كوردبوونی، هه‌رگیزاو هه‌رگیز، ناچێته‌وه‌ سه‌ر هیچ كام له‌و گوفه‌ك و زبڵدانانه‌ی، پنچك و ده‌وه‌نی ئه‌وانه‌ی سه‌ره‌وه‌ی تێدا ڕوواوه‌!

AM:10:09:03/09/2018




ئه‌م بابه‌ته 285 جار خوێنراوه‌ته‌وه‌‌