په‌یڕه‌و ئه‌نوه‌ر
كافێ وه‌ك سپه‌یس، كافێ وه‌ك ڕووبه‌ر و پانتایی و شوێن چۆن مرۆڤ داده‌ڕێژێته‌وه، چۆن مرۆڤ و تاك چوارچێوه‌دار ده‌كات و له‌گه‌ڵ جیۆگرافیادا تێكه‌ڵی ده‌كات. لیبڕاڵیزم و تاكگه‌رایی چۆن "شوێن" به‌رهه‌م دێننه‌وه! چۆن شوێن و مرۆڤ پێكه‌وه ده‌به‌ستنه‌وه له دنیای كوردیدا. ئه‌م كرده‌یه پێوه‌ندی به كۆمه‌ڵێك كرده‌ی تری وه‌ك مۆدێرنیته، به‌رهه‌مهێنان، پیشه‌سازی و بازاڕ و سه‌رمایه‌دارییه‌وه هه‌یه.
له دوای (٢٠٠٣)ـه‌وه و پرۆسه‌ی ئازادیی عێراق و فراوانبوونی بازنه‌كانی به‌رخۆریزم و مه‌سره‌فگه‌رایی له دنیای كوردیدا كافێ و پشووخانه‌كان ئاماده‌گییه‌كی گه‌وره و به‌رفراوانیان هه‌یه، ڕۆژ دوای ڕۆژ ئه‌و ئاماده‌یییه گه‌وره‌تر ده‌بێت و زیاتر گه‌شه ده‌كات. ئه‌م پرۆسه‌یه له سه‌نته‌ری شاره‌وه ده‌ست پێ ده‌كات تا ئه‌و ناوچانه‌ی به زۆنی بازرگانی و شوێنی چینی باڵا و چینی سه‌رووی دنیای كوردی ده‌ناسرێن.
ئه‌م پرۆسه‌یه خۆی ئاماژه‌یه‌كه بۆ گه‌وره‌بوونی مه‌سه‌له و فه‌لسه‌فه‌ی بازاڕ و له دنیای لیبڕاڵیزمیشدا بازاڕ گه‌وره‌یه و تاك سه‌نته‌ره و ده‌سه‌ڵاتی سیاسی سنووره‌كانی تاكی به‌ڕێژه‌یه‌كی زۆر درێژ كردووه‌ته‌وه و ڕووبه‌رێكی گه‌وره‌تری بۆ دابین كردووه.
پشووخانه/كافێكانی ئێمه شوناس به‌رهه‌م دێنن، به‌رهه‌مهێنانی شوناسی تاكگه‌رایی و ته‌نیاكردنی مرۆڤ /به‌و مانایه‌ی له پرۆسه‌ی به‌كۆمه‌ڵایه‌تیبوون و پێكه‌وه‌یی بوون دایده‌بڕێنێت و له‌وانی تری دوور ده‌خاته‌وه/ له پرۆسه‌ی به پێكه‌وه‌یی بوون و خێزانیبوون دووری ده‌خاته‌وه.
ڕیزكردنی دوو به دووی كورسی یا ڕیزكردنی كورسی و مێزی تاكه‌كه‌سی و خه‌ریكبوون به دنیای تایبه‌تی ناو مۆبایل و تابڵێت و ئای پاده كه‌سییه‌كانه‌وه، گوێگرتن له موزیكی خۆرئاوایی (ڕاپ، پۆپ و جاز)، كۆبوونه‌وه‌ی چه‌ند كه‌سێك له مێزێك به‌بێ ئه‌وه‌ی گفتوگۆ بكه‌ن و ئاڕگیۆمێنت ئاڵوگۆڕ بكه‌ن و ئاماده‌گی مێ/خزمه‌تگوزار له‌و پانتایییه‌دا مۆدێلێكی تازه‌ی گردبوونه‌وه/كۆكردنه‌وه‌ی مرۆڤی كۆمه‌ڵگه‌ی ئێمه‌یه. ئه‌م مۆدێله دوای ڕاپه‌ڕین هیچ ئاماده‌یییه‌كی نه‌بووه. ئه‌م مۆدێله سه‌ره‌تایه‌كی تازه‌یه له داڕشتنه‌وه و ده‌ستكاریكردنی ژیانی تاكه‌كه‌سی ئێمه و ژیانی كۆیی "ده‌سته‌جه‌معی" ئێمه، دروستكردنی پێوه‌ندی له نێوان شوێن و تاكگه‌رایی و به كه‌سایه‌تیكردنی شوێن و به‌لییڕاڵیزمكردنی شوێن.
كافێكانی ئێمه له ڕووبه‌رێك ده‌چن ئازادییه‌كی ناوه‌كی یا خۆیی ببه‌خشنه‌وه، ئازادی زیاتر و باشتر به‌رهه‌م بێنێت له نێوان سوژه و ئۆبژه، له نێوان تاك و كۆمه‌ڵ، ئازادییه‌ك كه هه‌موو ڕه‌گه‌زه‌كانی پێوه‌سته به ژیانی كه‌سی و خولیا و ئاره‌زووه كه‌سییه‌كانه‌وه، به‌و مانایه‌ی مرۆڤ چۆن بژی و چی بكات و چۆن نوێنه‌رایه‌تی خۆی بكات و گوێ له كێ بگرێت و كێ بخاته لیستی په‌راوێز و چۆن به‌ها بۆ كۆی كایه و كه‌سه‌كان ببه‌خشێته‌وه، هه‌ر له نێرگه‌له خواردنه‌وه تا ده‌گاته مه‌ی خواردنه‌وه، هه‌ر له دروستكردنی پێوه‌ندی له‌گه‌ڵ ئه‌وانی تردا تا ده‌گاته سێكس و ڕێگه‌كانی خۆبه‌تاڵكردنه‌وه و خۆخاڵیكردنه‌وه.
كافێ بۆ ئێمه شوێنێكه بۆ به‌تاڵكردنه‌وه‌ی چوارچێوه‌كانی دنیای تڕادیسیۆناڵ و به‌هاكانی كۆنپارێزی و به‌رهه‌مهێنانه‌وه‌ی خودێكی تر و دروستكردنه‌وه‌ی دیوی ناوه‌وه‌ی خۆمان. ده‌كرێت بڵێین ڕاكردنه له سیستـمێكی كۆمه‌ڵایه‌تی كلاسیكی چه‌قیو و ناكارا. ڕاكردنه له دنیایه‌ك كه گشت و خه‌ڵك و ژیانی پێكه‌وه‌یی سه‌نته‌ری كۆی سیستمه‌كه‌یه.