پەیڕەو ئەنوەر
ستراتیجە نوێیەكەی ڕۆژی هەینی ١٣-١٠-٢٠١٧ی سەرۆكی ئەمەریكا دۆناڵد تڕەمپ بۆ ڕێككەوتنی ئەتۆمی نێوان ئێران و سزادانی سوپای پاسداران، خوێندنەوەیەكی تری بەدوای خۆیدا هێنا. ئەمە مانای وایە تڕەمپ دیدێكی جیاوازی هەیە بۆ ئێران و شیعیزم و هیچ شتێك نامێنێتەوە بۆ نزیككردنەوەی ئەم دوو یەكەیە.
ڕەنگە سزاكانی سەر ئێران زیاتر ببن. خامنەیی و ڕووحانی ئەم سزایانە بەوە دەبەستێتەوە كە پڕۆژەی سەربەخۆیی كوردستان پڕۆژەیەكی ئەمەریكییە و ئێرانی پێ گەماڕۆ دەدرێت و ناهێڵێت ئێران هیلالە شیعییەكەی خۆی لە ناوچەكە بە ئامانج بگەیەنێت.
پاشای سعوودیە چەند هەفتەیەك لەمەوبەر ڕێ بە ئافرەت دەدات بۆ پرسی لێخوڕینی ئۆتۆمبێل و دواتریش سەردانی ڕووسیا دەكات. دنیای (ڕووسی و سعوودی) دوو دنیای دابڕاو بوونە لە ڕابردوودا؛ دابڕاو بەو مانایەی كە خاوەن هیچ مێژوویەكی سیاسیی هاوبەش نین. لە سەردەمی جەنگی سارد سعوودیە پاڵپشتی ئەفغانی دەكرد بۆ لاوازكردنی كۆمیۆنیزم و لەدوای بەهاری عەرەبیش ڕووسیا جارێكی تر گەڕایەوە بۆ خۆرهەڵات، ئەم گەڕانەوەیە جارێكی تر وەك مۆدێلی جەنگی سارد بوو لە ئەفغانستان یانی پێچەوانەی بیركردنەوەی سیاسیی سعوودیە بوو.
لە سەردانەكەی شا سەلمان بۆ ڕووسیا وا دەردەكەوێت سعوودیە بیەوێت بەتەواوی لە دنیای ڕووسی نزیك بێتەوە و ئەندازیاری پێوەندییەكانی نێوان ئێران و ڕووسیا تێك بشكێنێت. دیارە ئێران وای دەبینێت سعوودیە ببێتەوە بە ڕابەری سوننەكان لە عێراقدا و وەك سەری لاشە گەورەكەی سوننەكان دەربكەوێت.
ڕۆسنەفت ئەكتەرێكی نا-دەوڵەتییە و بەچڕی دەیەوێت ئامادەیی لە هەرێمی كوردستاندا هەبێت! لە سەرەتادا ئامادەیییەكە ئابووری بێت و لەڕێی بازاڕ و نەوتەوە دواتر بیكات بە ئامادەیی و مۆدێلێكی سیاسی و جیۆپۆلەتیكی و جیۆستراتیجی.
ڕۆسنەفت هەرێمی كوردستانی وەك پڕۆژەیەكی گەورەی وزە لا گرنگە بەو ئامانجەی بیكات بە (كوردیش-ستریم) لەجێی (توركیش-ستریم). دیارە ڕووسیا هەرێمی كوردستان لەڕووی سیاسییەوە بە ناوچەیەكی ئەمەریكی دەبینێت، بۆیە دەیەوێت لەڕێی وزە بێتە ناوییەوە و تێكەڵی بێت.
ئێران ئەم نزیكبوونەوانە بە گەمارۆ دەزانێت و وا هەست دەكات بەلیبراڵبوونی دنیای سعوودی (ئەگەر ڕووكەشانەش) بێت مۆدێلێكە بۆ كوشتنی ئێرانیزم و وەستاندنی جووڵە و هەژموونەكانی بەتایبەت لە عێراق و سووریادا.
تەنگژەی عێراق
تەنگژەی عێراق ئاڵۆزە و زیاتر پێوەندی بەوەوە هەیە كە بەبێ هیچ بونیادێكی سیاسی-كۆمەڵایەتی دروست كراوە و بونیات نراوە. عێراق لە سەرەتادا پڕۆژەیەكی بەریتانی بوو. پاشایەكیان لە مەملەكەتێكی تر هێنا و لەڕێی سیستمێكی پاشایەتییەوە عێراق بەرهەم هات.
لەدوای كۆتاهاتنی جەنگی سارد و ڕووخانی یەكێتیی سۆڤیەت و ڕاگەیاندنی مانیفێستۆی ڕێكخستنی نوێی جیهانیی New World Order لەلایەن ئەمەریكاوە عێراق بوو بە پڕۆژەیەكی ئەمەریكی نیولیبڕاڵ لە دیدی ئەمەریكییەكانەوە.
لەدوای ٢٠٠٣ ەوە عێراق وەك پڕۆژەیەكی ئەمەریكی لەدایك بووەوە، ئەمەریكی واتە عێراق لەڕێی حیكایەتی دیموكراسی و فیدڕاڵیزم و سازان و پێكەوەبوونەوە زیندوو بكرێتەوە! دیارە ئەمەریكا پێی وابوو كە لەڕێی مالیكی و سەدر و عەبادییەوە دەتوانێت قەڵایەكی گەورەی دیموكراسی بەرهەم بێنێت.
ئێستە عێراق لەڕووی بایۆلۆجییەوە تەنیا لەناو دیوارە كۆنكریتییەكانی ناوچەی سەوز هەناسە دەدات و دەژیت. ئەم دۆخە دەمانباتەوە بۆ چەمكی (دەسەڵات) لای فۆكۆ: "لە كوێ دەسەڵات هەبێت، لەوێش بەرەنگاری هەیە." لە عێراق لە كوێ دەسەڵات هەبێت لەوێ دۆخی بێ دەسەڵاتی هەیە. دیوارە كۆنكریتییەكانی ناوچەی سەوز بێ دەسەڵاتییەكی گەورەی دەسەڵاتە لە عێراق! ئامادەیی میلیشیایەكی وەك حەشدی شەعبی بەهەموو گرووپ و لق و پۆپەكانی ناوییەوە مانایەكی ئاشكرایی داڕمانی دەسەڵاتی سیاسیی عێراقی و سوپای عێراقییە!
دیارە ئێران ئێستە مەبەستیەتی لەڕێی ئەم میلیشیانەوە لە ڕووبەرە بچووك و گەورەكانی عێراق بەكەركووكیشەوە دەركەوێت و دەسەڵاتی ڕەمزی و واتایی خۆی پیشانی هەموو ئەكتەرە ناوخۆیی و دەرەكییەكان بدات؛ بەتایبەت كاتێك دەیەوێت بە هێزێكی وەك ئەمەریكا بڵێت من هێشتا لە عێراق ئامادەم و هیچ سزایەكی تۆ ناتوانێت دنیای شیعیزم بوەستێنێت و پانتایییە جیۆپۆلەتیكییەكانی لێ بستێنێتەوە!