عه‌فرین كۆمۆنه‌ی دووه‌می پاریس

په‌یڕه‌و ئه‌نوه‌ر 

ده‌كرێت عه‌فرین وه‌ك كۆمۆنه‌ی دووه‌می پاریس و وه‌ك مۆدێلێكی تازه‌ی ڕێكخستنی سیاسی پۆست-مۆدێرنه‌ لێی بڕوانرێت. پۆست-مۆدێرنه‌ به‌مانای ئه‌وه‌ی چۆن كار له‌سه‌ر جیاوازییه‌كان بكه‌یت و له‌ڕێی ئه‌و هه‌موو جیاوازییانه‌وه‌ جۆرێك له‌ ئۆرده‌ر و دیسپلین و به‌رخودان بۆ مانه‌وه‌ دروست بكه‌یت. چركه‌ساتی دروستبوونی كانتۆنه‌كانی ڕۆژئاوای كوردستان له‌و چركه‌ساته‌ ده‌چوو كه‌ له‌ مارسی 1871دا شۆڕشگێڕه‌ فڕه‌نساییه‌كان له‌ پاریس ده‌ستیان گرت به‌سه‌ر هۆتێل (دی ڤیڵ) كه‌ بوو به‌ دڵ و سیمبۆلی كۆمۆنه‌ و ئاڵای سووریان تێدا به‌رز كرده‌وه‌. 

له‌ كۆمۆنه‌ی پاریسدا بۆ یه‌كه‌مجار چینی كرێكار له‌گه‌ڵ هاوپه‌یمانه‌كانیاندا ده‌سه‌ڵات ده‌گرنه‌ ده‌ست، له‌ ڕۆژئاوای كوردستانیش بۆ یه‌كه‌مجار كوردانی ڕۆژئاوا له‌ دوای دروستبوونی ده‌وڵه‌تی سووریاوه‌، ده‌سه‌ڵات ده‌گرنه‌ ده‌ست و ڕێكخستنێكی سیاسی و كۆمه‌ڵایه‌تی و فه‌رهه‌نگی و سه‌ربازی تایبه‌ت به‌خۆیان به‌رهه‌م دێنن.

شۆڕشگێڕانی كۆمۆنه‌ هۆشیاریی ڕه‌تكردنه‌وه‌ و بازدان به‌سه‌ر ناسیۆنالیزمی بۆرجوازییان هه‌بوو. ئاڵا سووره‌كه‌یان سیمبۆلی ئازایه‌تیی مرۆڤایه‌تی و یه‌كسانی بوو. حكوومه‌ته‌كه‌ هه‌رچه‌ند كاتی بوو، هه‌رزوو كۆتای به‌ته‌مه‌ن و فه‌لسه‌فه‌ سیاسی و دنیابینییه‌كه‌ی هێنرا، به‌ڵام فۆڕمێكی تازه‌ی له‌ پێوه‌ندییه‌كانی نێوان فه‌رمانڕه‌وا و ئه‌وانه‌ی فه‌رمانیان به‌سه‌ردا ده‌كرێت له‌ مێژووی هاوچه‌رخدا، دروست كرد.

ئه‌وه‌ی ئه‌مڕۆ له‌ ڕۆژئاوای كوردستان ده‌بینرێت، به‌تایبه‌ت پرسی به‌رگریی عه‌فرین و خۆبه‌ده‌سته‌وه‌نه‌دان و به‌شداریی نێر و مێ و باڵانسه‌ جێنده‌رییه‌كه‌ی، فۆڕمێكی تازه‌یه‌ له‌ خۆرهه‌ڵاتی ناوه‌ڕاست و دنیای ئێمه‌دا و مۆدێلێكی ده‌گمه‌ن و دانسقه‌یه‌. ده‌كرێت به‌ كۆمۆنه‌ی دووه‌م و كۆمۆنه‌ی سه‌ده‌ی 21  ناوی بێنین. به‌رخۆدانی ڕۆژئاڤا و شوناسه‌ سیاسی و سۆسیۆلۆجییه‌كه‌ی مانیفێستۆی پێكه‌وه‌ژیان و خۆبه‌ڕیوه‌ێردن و یه‌كسانی نێوان هه‌موو پێكهاته‌ و گرووپه‌ جیاوازه‌كان و تاكه‌ جیاوازه‌كانه‌.

ڕاسته‌ عه‌فرین ئێسته‌ له‌ دۆخی به‌رگری و له‌ هێڵه‌كانی به‌رگریدایه‌، به‌ڵام ده‌كرێت بڵێین ئه‌وه‌ی ئێسته‌ ده‌یبینین كه‌وتنی عه‌فرین نییه‌، ڕووخانی عه‌فرین نییه‌، به‌ڵكو له‌دایكبوونی عه‌فرینه‌ و عه‌فرین به‌هه‌موو ماناكان له‌ دایك ده‌بێت.

سوپای توركیا وه‌ك هێزێكی بێ دیسپلین و بێ بیروباوه‌ڕ
وا دیاره‌ گوته‌بێژی سوپای توركیا به‌شێك له‌ شكسته‌ سه‌ربازییه‌كانی وڵاته‌كه‌ی له‌ عه‌فرین ده‌باته‌وه‌ بۆ پرسی گۆڕانی جیۆگرافیا و كه‌شوهه‌وا و باران و قوڕ و لیته‌! به‌ڵام ڕاستییه‌كه‌ی ئه‌وه‌یه‌ كه‌ سوپای توركیا له‌ دوای هه‌وڵی كوده‌تاكه‌ی ته‌مووزی 2016ه‌وه‌، زۆرینه‌ی جه‌نه‌ڕاڵ و پله‌دار و عه‌قڵه‌ سه‌ربازییه‌ گه‌وره‌كانی لێ دوور خراوه‌ته‌وه‌ و ئێسته‌ بۆشایییه‌كی گه‌وره‌ هه‌یه‌ له‌ دامه‌زراوه‌ی سه‌ربازیی توركیا و له‌ڕووی توانای مرۆیییه‌وه‌ له‌ ته‌نگژه‌دایه‌. 

گرتنی دوو كارمه‌نده‌كه‌ی ده‌زگه‌ی هه‌واڵگریی توركیا/میت له‌ دووكان له‌ هاوینی ساڵی رابردوودا له‌لایه‌ن په‌كه‌كه‌وه‌، هێمایه‌كی تربوو له‌ داوه‌شان و دابه‌زینی ئاستی دامه‌زراوه‌ی سه‌ربازی توركیا. سه‌رده‌مانێك ئه‌ردۆغان شانازییه‌كی گه‌وره‌ی به‌ ده‌زگای "میت"ه‌وه‌ ده‌كرد كه‌ كوردێكی وه‌ك "هاكان فیدان" به‌ڕێوه‌ی ده‌بات و به‌رپرسیارێتی و دووه‌م هێزی ناو رێكخراوی ناتۆیشه‌! 

هه‌موو هێزێكی سه‌ربازی له‌ دنیادا فكر و بیروباوه‌ڕێك ده‌یجووڵێنێت و دیسپلینی ده‌كات، به‌ڵام ئێسته‌ ئه‌م سوپایه‌ له‌ هه‌موو مانا سه‌ربازی و ستراتیجی و دیسپلینه‌كانی دوور خراوه‌ته‌وه‌ و به‌ته‌نیا بووه‌ به‌ ئامێرێك بۆ به‌رهه‌مهێنانی شێوازه‌كانی مه‌رگ و به‌خشینه‌وه‌ی مه‌رگ به‌سه‌ر هه‌موو ئه‌وانه‌ی له‌ ده‌ره‌وه‌ی دنیای توركی و له‌ ده‌ره‌وه‌ی سیاسه‌ت و به‌رژه‌وه‌ندییه‌كانی توركیادا ده‌جووڵێن و خۆیان ڕێك ده‌خه‌ن. 

وا ده‌بینرێت كه‌ ئه‌ردۆغان له‌رێی داگیركردنی عه‌فرین و چوونه‌ ناو جیۆگرافیای سووریاوه‌، ڕووداوێكی سیاسی دروست بكات تا بتوانێت په‌یامه‌ سیاسی و سه‌ربازییه‌كانی خۆی به‌خێرایی بنیرێت بۆ هێزه‌ هه‌رێمی و نێوده‌وڵه‌تییه‌كان. به‌ڵام بۆچوونێك هه‌یه‌ پێی وایه‌ كه‌ یه‌كێك له‌و په‌یامانه‌ی كه‌ ئه‌ردۆغان له‌ڕێی سه‌رباز و سوپاكه‌یه‌وه‌ ده‌یه‌وێت بینێرێت، پرسی زیندووكردنه‌وه‌ی سنووره‌كانی ئیمپڕاتۆری عوسمانی و سیستمی سوڵتانیزم و په‌ڕینه‌وه‌یه‌ بۆ ده‌ره‌وه‌ی سنووره‌كانی خۆی! عه‌فرین ئه‌گه‌ر بكه‌وێت، به‌شێك له‌ سیستمه‌ هه‌رێمییه‌كه‌ی ناوچه‌كه‌ش له‌گه‌ڵیدا ده‌كه‌وێت و توركیاش زاڵتر ده‌رده‌كه‌وێت.

AM:09:21:03/02/2018




ئه‌م بابه‌ته 417 جار خوێنراوه‌ته‌وه‌‌