بۆمبه‌ ته‌قیوه‌كه‌ی كۆنسێرتی گرووپی موزیكی لوڕ له‌ هه‌ڵه‌بجه‌


رۆژی سێشه‌م ٤/٧/٢٠١٧ گرووپی موزیكی لوڕ كۆنسێرتێكی موزیك و گۆرانی له‌ژێر ناوی "سه‌ركه‌وتنه‌كانی پێشمه‌رگه‌ له‌ به‌ره‌نگاری تیرۆر"دا له‌ شاری هه‌ڵه‌بجه‌ به‌ ده‌نگبێژی لوقمان سه‌لیم ساز كرد.

له‌ كورته‌ راپۆرتێكدا نزار زێوێی سه‌رپه‌رشتیاری گرووپی موزیكی لوڕ، وێڕای سوپاس بۆ هاوكاریی پارێزگاری هه‌ڵه‌بجه‌ و به‌رپرسانی رۆشنبیریی شاره‌كه‌ و ئاماده‌بووانی كۆنسێرته‌كه‌، ئاماژه‌ به‌ هه‌وڵی تێكده‌رانه‌ی چه‌ند كه‌سێك ده‌كات كه‌ له‌ كاتی كۆنسێرته‌كه‌دا به‌ ته‌قاندنه‌وه‌ی جۆره‌ ته‌قه‌مه‌نییه‌ك پشێوی و شڵه‌ژانیان له‌ هۆڵه‌كه‌دا دروست كردووه‌.

وه‌ك هۆگرێكی دنیای هونه‌ری گۆرانی و موزیك و كه‌سێكی نزیك له‌ گرووپی موزیكی لوڕ و خه‌مخۆرێكی كورد و زامی هه‌ڵه‌بجه‌، دوای خوێندنه‌وه‌ی ئه‌و راپۆرته‌ خه‌م دایگرتم. زۆر دڵم ئێشا. بۆ ده‌بێ گرووپێكی هونه‌ری له‌م كاتوساته‌دا بۆ ئه‌وه‌ی شارستانیی به‌و ده‌ڤه‌ره‌ ببه‌خشن، ئاوا پاداشت بكرێن؟ دوای به‌دواداچوون بۆ كۆنسێرته‌كه‌، بۆم ده‌ركه‌وت خه‌ڵكی ئه‌و شاره‌ به‌شێوه‌یه‌كی تر كه‌وتوونه‌ته‌ به‌ر هێرشی كیمیایی و له‌ ١٦/٣/١٩٨٨ پتر  زیانیان به‌ركه‌وتووه‌. چۆن؟ ئێسته‌ دێمه‌ سه‌ری.

ئه‌م كۆنسێرته‌ به‌پێی دروشمه‌كه‌ی له‌پێناوی سه‌ركه‌وتنه‌كانی پێشمه‌رگه‌ دژی تیرۆرستانی داگیركه‌ری داعش ئاماده‌ و پێشكه‌ش كراوه‌، یه‌كێك له‌و كه‌سانه‌ی ته‌قینه‌وه‌كه‌ی له‌ هۆڵی كۆنسێرته‌كه‌دا ئه‌نجام داوه‌، گه‌نجێكی ١٨ ساڵان بووه‌، ئه‌مه‌ زه‌نگێكی مه‌ترسیداره‌، ئه‌و كه‌سه‌ی توانیویه‌تی به‌و كرده‌وه‌ تێكده‌رانه‌یه‌ ئارامی هۆڵه‌كه‌ تێك بدا، ته‌نیا نه‌بووه‌. له‌ پاسه‌وانه‌كانی به‌رده‌رگه‌، بگره‌ تا چه‌ند كه‌سێك له‌وانه‌ی ناو هۆڵه‌كه‌، ده‌كرێ هاوكاری ئه‌و تێكده‌ره‌یان كردبێ. شێواندنی ئارامی ئه‌و كۆنسێرته‌ به‌ واتای دژایه‌تیكردنی خه‌باتی پێشمه‌رگه‌ و هاوسۆزی له‌گه‌ڵ داعش دێته‌ ئه‌ژمار. 

هه‌ڵه‌بجه‌ ساڵی ١٩٨٨ له‌لایه‌ن رێژیمی به‌عسه‌وه‌ به‌ چه‌كی كیمیایی شه‌هید كرا، به‌ڵام دواتر هه‌ستایه‌وه‌ و ژیانی تێ كه‌وته‌وه‌، كه‌چی ئه‌مڕۆ له‌گه‌ڵ ئه‌وه‌ی له‌ شارۆكه‌وه‌ كراوه‌ به‌ پارێزگا و ده‌سه‌ڵاتی كارگێڕی و سیاسیی فره‌وانتر بووه‌، به‌ڵام خه‌ڵكه‌كه‌ی كراون به‌ قوربانی و كۆیله‌ی كولتوورێكی دواكه‌وتوو، به‌ جۆرێك دژی جوانترین نموونه‌ی شارستانیی كه‌ گۆرانی و موزیكه‌، ده‌وه‌ستێته‌وه‌. به‌و دژكرده‌وه‌یه‌ دوو په‌یام ده‌دا به‌ گوێی ده‌وروبه‌ردا. 

١ـ له‌گه‌ڵ داعش هاوده‌نگ ده‌بێ و دژی موزیك و شادی ده‌وه‌ستێته‌وه‌ و به‌ ئاشكرا ده‌خوازێ خه‌ڵك له‌ باتی گوێگرتن له‌ موزیك و گۆرانی، پێڕه‌وی ئه‌و كولتووره‌ دزێوه‌ دوور له‌ مرۆڤایه‌تییه‌ی داعش بكه‌ن كه‌ بریتییه‌ له‌ مرۆڤ سه‌ربڕین و كۆیله‌كردنی دنیای مرۆڤایه‌تی و سڕینه‌وه‌ی ناسنامه‌ی كورد. 
٢ـ چاوی به‌ سه‌ركه‌وتنی پێشمه‌رگه‌ له‌ به‌ره‌نگاربوونه‌وه‌ی له‌ دژی داعش و تیرۆر هه‌ڵنایه‌ت و به‌ كرده‌وه‌ دژی ده‌وه‌ستێته‌وه‌.

زه‌نگه‌ مه‌ترسیداره‌كه‌ ئه‌مه‌یه‌ كه‌ خه‌ڵكی هه‌ڵه‌بجه‌ی شه‌هید جارێكی تر به‌ ناوی راكێشانی بۆ ژێر سێبه‌ری ئاین، به‌و شێوه‌یه‌ ده‌كرێته‌ ئامرازێك بۆ درێژه‌دان به‌ سیاسه‌تی پاكتاوی ره‌گه‌زی و كولتوور و فه‌رهه‌نگی كورد. چه‌كه‌كه‌ش ئه‌م جاره‌ ئاینه‌.

ئه‌و شاره‌ كه‌ له‌ ساڵه‌كانی سه‌ره‌تای ١٩٠٠ی سه‌ده‌ی رابردوو، كه‌سایه‌تییه‌كی ناوداری وه‌ك "عادیله‌خانم"ـی هه‌بووه‌ و مێژوونووسانی كورد و بیانی باسیان له‌ شێوه‌ی ده‌سه‌ڵاتداری و ره‌وشتبه‌رزیی ئه‌و خاتوونه‌ كردووه‌، كه‌چی ئه‌و رۆژه‌ی كۆنسێرته‌كه‌ (سێشه‌م ٤/٧/٢٠١٧) و نزیكه‌ی 117 ساڵ دوای ده‌سه‌ڵاتداری ئه‌و خانمه‌، نه‌ ته‌نیا یه‌ك ژنی بێ له‌چك له‌و هۆڵه‌دا به‌دی نه‌كرا، به‌ڵكو له‌ناو شه‌قامه‌كانی ئه‌و شاره‌ی عادیله‌خانمیشدا، به‌رچاو نه‌كه‌وت. 

له‌م رۆژانه‌دا كه‌ باسی ریفراندۆم گه‌رمه‌ و هه‌ندێ نه‌یار له‌ملاولای هه‌رێمی باشووری كوردستان و ده‌ره‌وه‌ به‌ بیانووی جۆراوجۆر دژی ده‌وه‌ستنه‌وه‌، ئه‌گه‌ر دڵسۆزی كوردن و داكۆكی له‌ مافی نه‌ته‌وه‌كه‌یان ده‌كه‌ن با له‌ جیاتی دژایه‌تی ریفراندۆم، بیرێك له‌م كێشه‌یه‌ بكه‌نه‌وه‌، ئه‌مه‌ زۆر مه‌ترسیداره‌. ئه‌گه‌ر ریفراندۆم به‌ قسه‌ی دژبه‌ره‌كانی ده‌بێته‌ هۆی سه‌رخستنی بنه‌ماڵه‌یه‌ك، له‌ كۆتادا رۆڵه‌كانی داهاتووی ئه‌و گه‌له‌ ده‌توانن به‌شێوه‌یه‌ك جێی ئه‌و بنه‌ماڵه‌یه‌ بگرنه‌وه‌، چونكه‌ كورده‌ و "میراتی كوردیش به‌ كورد ره‌وایه‌"، به‌ڵام سپاردنی تاكی كورد به‌ كولتوورێكی دواكه‌وتوو له‌ جۆری داعشی ئه‌بوبه‌كر به‌غدادی و كۆماری ئیسلامیی ئێران، نه‌ك ده‌وری بنه‌ماڵه‌ش وه‌ك كورد ناهێڵێ، به‌ڵكو قه‌ت رێگه‌ به‌ كورد نادات وه‌ك میراتگری راسته‌قینه‌ بگات به‌و مافانه‌ی كه‌ كوردایه‌تی و ئاشتی و ئازادیییه‌.

ده‌بێ دژبه‌رانی ریفراندۆم به‌ ناوی ئازادی ده‌ربڕینه‌وه‌، درك به‌م مه‌ترسییه‌ بكه‌ن و له‌ باتی درێژه‌دان به‌و هه‌ڵه‌یه‌، دژی ئه‌م كولتووره‌ بوه‌ستنه‌وه‌. داعش ئه‌گه‌ر له‌ ره‌قه‌ و مووسڵیش ده‌ربكرێ، له‌ كوردستان به‌ ته‌واویی ریشه‌كێش ناكرێ، چونكه‌ به‌ ئاشكرا له‌ناو كۆمه‌ڵگه‌ی ئێمه‌دا بوونی هه‌یه‌ و رۆژانه‌ ده‌رده‌كه‌وێ. خه‌ستكردنه‌وه‌ی مانگی ره‌مه‌زان و به‌ڕێوه‌بردنی رێوڕه‌سمی عاشوورا و بۆنه‌ ئاینییه‌كانی تر له‌ ناوچه‌ی رۆژهه‌ڵاتی ناوه‌ڕاست له‌لایه‌ك و په‌ره‌پێدان به‌ كولتووری داعش و جوندیلئیسلام له‌ كوردستان و تێكۆشانی ئاشكرای سه‌له‌فی و ئیخوان و لق و پۆپه‌كانی ئه‌و تاریكخانه‌یه‌ له‌لایه‌كی تره‌وه‌، هۆی په‌ره‌گرتنی ئه‌و جۆره‌ باوه‌ڕه‌ پڕ مه‌ترسیداره‌یه‌.

بۆیه‌ له‌گه‌ڵ سه‌ردانه‌واندن بۆ تێكۆشانی هونه‌ری هه‌موو هونه‌رمه‌ندانی كوردستان به‌ گشتی و نواندنی هونه‌ری موزیك و گۆرانی كچ و كوڕانی گرووپی لوڕ به‌ تایبه‌تی، جارێكی تر به‌ دووپاتكردنه‌وه‌ له‌ كوردبوون و خۆگرێدانه‌وه‌ی تاكی كورد به‌ كولتووری پێشكه‌وتنخوازی سه‌رده‌م، داوا له‌ ده‌سه‌ڵاتی كوردی ده‌كه‌م مشوورێك بۆ به‌ره‌نگاربوونه‌وه‌ و لابردنی ئه‌و كۆسپه‌ بخۆن كه‌ به‌رۆكی كوردی به‌ تایبه‌ت له‌ باشووری كوردستان گرتووه‌. سنوورێك بۆ ده‌ربڕینی دوعا و نزای ئاسایی خه‌ڵك له‌گه‌ڵ خودای خۆیان دابنێن و ئه‌و باوه‌ڕه‌ له‌ كولتووری په‌روه‌رده‌ی تیرۆر و تۆقاندن جیا بكه‌نه‌وه‌. 
داوا له‌ هونه‌رمه‌ندان و رووناكبیران و تاكی خاوه‌نهه‌ڵوێستی كورد ده‌كه‌م به‌هه‌ر شێوه‌یه‌ك بۆیان ده‌لوێ دژی ئه‌م دیارده‌ دواكه‌وتووه‌ تۆقێنه‌ره‌ هه‌ڵوێست بنوێنن و بێده‌نگی بشكێنن.

قادر ئه‌لیاسی

PM:04:47:09/07/2017




ئه‌م بابه‌ته 19255 جار خوێنراوه‌ته‌وه‌‌