ئەمڕۆ لە شارۆكەی خانەقین گۆڕێكی
بەكۆمەڵ دۆزرایەوە و لە سنووری شارەدێی قەرەتەپەی سەربە هەمان شارۆكە، لە دوو كات و
شوێنی جیادا دوو تەقینەوە روویان دا و یەكێك لەتەقینەوەكان برینداربوونی دوو جووتیاری
لێكەوتەوە.
هێرش فەتاح، بەڕێوەبەری بەرێوەبەرایەتی
شەهیدان و ئەنفالكراوانی خانەقین، بە "وشە"ی راگەیاند ، ئەمڕۆ لە
دۆزینەوەی گۆڕێكی بەكۆمەڵ لەسنووری خانەقین ئاگادار کرانەوە کە، كەمیژووەكەی بۆ راپەڕێنی
1991 دەگەڕێتەوە. ئەو گوتیشی، دوو رۆژی تر دەست بەهەڵدانەوەی گۆڕەکە دەکەن.
هاوكات هەر ئەمڕۆ لە شارەدێی قەرەتەپەی
سەر بە شارۆكەی خانەقین لە دووكات و شوێنی جیاوازدا دوو تەقینەوە رووی دا.
رەحیم عەزیز، سەرۆكی ئەنجوومەنی شارەوانی قەرەتەپە،
بە"وشە"ی راگەیاند، بەرەبەیانی ئەمڕۆ
دوو برای بەنەتەوە توركمان لەكاتی چوونیان بۆ سەر كێڵگە كشتوكاڵییەكان لەسنووری قەرەتەپە،
بۆمبێكی چێنراویان پێدا تەقیەوە و هەردووکیان بریندار بوون.
نێوەڕۆی ئەمڕۆش لەناو جەرگەی بازاڕی
شارەدێی قەرەتەپە، تەقینەوەیەك رووی دا بەڵام خۆشبەختانە زیانی گیانی لێ نەكەوتەوە.
گەرمیان / سەبری هۆرینی