زیانه‌كانی بۆردمانی شه‌وی رابردووی فڕۆكه‌ توركییه‌كان

شه‌وى رابردوو فرۆكه‌ جه‌نگییه‌كانى توركیا چه‌ند ناوچه‌یه‌كى شارۆكه‌ی مێرگه‌سووریان بۆردمان کرد کە زیانی زۆری  بە ژینگەی ناوچەکە گەیاندووە.

سه‌رچاوه‌یه‌ك له‌ به‌رگرى شارستانی مێرگه‌سۆر به‌ "وشه‌"ى گوت شه‌وى رابردوو فرۆكه‌ جه‌نگییه‌كانى توركیا  شاره‌دێى شێروانى مه‌زن و ده‌وروبه‌رى چه‌ند گوندێكى  شارۆچكه‌ى مێرگه‌سوور و گونده‌كانى مێروز و تویێ و پێندرو و هویه‌یان بۆردومان کرد.

ئەو روونی کردەوە کە هیچ زیانێکی گیانی بەدواوە نەبووە, بەڵام زیانی مادی بەدواوە بووە و پوش و پاوانی خەڵک سووتاوە.

هاوکات حوسێن ساڵح به‌ڕێوه‌به‌رى دارستان و پاوانى شارۆكه‌ى مێرگه‌سوور بۆ‌ "وشه‌" گوتی له‌ ئه‌نجامى بۆردومانى فرۆكه‌ جەنگییەکانی توركیا ژماره‌یه‌ك له‌ ئاژەڵە كێوییه‌كانى ده‌ڤه‌رى بارزان بو شوێنه‌كانى تر رۆیشتوون و ئەگەر بۆرومانەکان بەردەوام بن زیانێکی زۆر بە ژینگەی بارزان دەگات.

جێگەى باسه‌ له‌ دوو رۆژى رابرودوودا فرۆكه‌ جه‌نگییه‌كانى توركیا بەمەبەستی لێدانی بنکە و بارەگاکانی پەکەکە چەند ناوچەیەکی باشووری کوردستانیان بۆردومان کرد.

دوای ئاگربه‌ستێكی درێژخایه‌ن, شه‌وی 24 له‌سه‌ر 25ی ته‌مووز/یۆلیۆ فڕۆكه‌ جه‌نگییه‌كانی توركیا بۆردمانی بنكه‌ و باره‌گاكانی په‌كه‌كه‌یان له‌ ناوچه‌كانی پارێزگه‌ی دهۆك و هه‌ولێر كرد, رۆژی 25ی هه‌مان مانگ په‌كه‌كه‌ له‌ راگه‌یه‌ندراوێكدا كۆتایی "ئاگربه‌ست"ی راگه‌یاند. دوای ئه‌وه‌ی سێ رۆژ پێشتر كوشتنی دوو پۆلیسی توركی خسته‌ ئه‌ستۆی خۆی.

وشه‌ / ده‌ڤه‌رى بارزان - نه‌وزاد هلورى



PM:01:44:27/07/2015




ئه‌م بابه‌ته 357 جار خوێنراوه‌ته‌وه‌‌

زیاتر ...