كۆمسیۆنی باڵای سەربەخۆی هەڵبژاردن و ڕاپرسی لە هەرێمی كوردستان ئاشكرای دەكات، هاووڵاتییان دەتوانن لە ماڵەكانیان دڵنیا ببنەوە لە ناوەكانیان و ناوی خۆیان لە بنكەكان بدۆزنەوە.
ئەمڕۆ شەموو 28ـی تەمووز/ یۆلیۆ، شۆڕش حەسەن بەڕێوەبەری ڕاگەیاندن و پێوەندییەكان لە كۆمسیۆنی باڵای سەربەخۆی هەڵبژاردن و ڕاپرسی لە هەرێمی كوردستان بە "وشە"ـی ڕاگەیاند، بەشی تەكنیكی كۆمسیۆنی باڵای سەربەخۆی هەڵبژاردن و ڕاپرسی لاپەڕەیەكی تایبەتی كردووەتەوە بە دۆزینەوەی ناوی هاووڵاتییان.
بەڕێوەبەری ڕاگەیاندن و پێوەندییەكان گوتی، لەو لاپەڕەیە هاووڵاتییان دەتوانن لە ڕێی ژمارەی فۆڕمی خۆراك و ناو و ساڵی لە دایكبوون، ناوەكانیان بدۆزنەوە لە چ بنكەیەك ناویان هەیە بۆ ڕۆژی دەنگدان.
ئاماژەی دا، هەر هاووڵاتییەك ناوی نەبوو، دەبێت سەردانی بنكەكانی نوێكردنەوەی تۆماری دەنگدەران بكات بۆ ئەوەی تۆمار بكرێتەوە.
ڕۆژی هەشتی ئایار/مایۆ، سەرۆك وەزیرانی هەرێمی كوردستان بە مەرسوومێك ڕۆژی 30 ئەیلوول/سێپتێمبەری بۆ ئەنجامدانی خولی پێنجەمی هەڵبژاردنی پەرلەمانی كوردستان دیاری كرد و كۆمیسیۆنیش دەستی بە ئامادەكارییەكان بۆ ئەنجامدانی هەڵبژاردنەكە كردووە، پەرلەمانی كوردستان لە 111 كورسی پێك دێ، 11 كورسی بۆ پێكهاتە نەتەوەیییەكانی كوردستان دیاری كراوە و لە 19ی ئایار/مایۆی 1992 هەڵبژاردنی خولی یەكەم ئەنجام درا، لە 2005 و 2009 و 2013 خولی دووەم و سێیەم و چوارەمی پەرلەمان هاتنە هەڵبژاردن.