رێڤهبهریا گشتی یا باژێڕڤانیان ل پارێزگهها دهۆكێ، دههیڤا بوری و قهدهغهیا هاتن و چوونێ دا، 155 زێدهگاڤی ل سهر مولكێن گشتی لاداینه، ههردیسان پتری 863 هزار لیترێن دهرمانێ دژه ڤایرۆس ل بازاڕ و جاده و جهێن گشتی ڕهشاندنه وهك پێرابوونهكا ساخلهمیی بۆ پاراستنا وهلاتیان ژ ڤایرۆسا كۆرۆنایێ
دیار بهحری رهسوول رێڤهبهرێ گشتیێ باژێڕڤانیان ل پارێزگهها دهۆكێ بۆ "وشه" گۆت، ل رێكهفتی 11ێ نیسانا 2020 ههتا رێكهفتی 18 ئایارا 2020، ئانكو ددهما ههیڤا بوری و قهدهغهیا هاتن و چوونێ دا ل سنوورێ پارێزگهها دهۆكێ 155 زێدهگاڤی ل سهر مولكێن گشتی و حكوومهتێ هاتینه لادان.
زێدهتر گۆت "پشكهك ژ وان زێدهگاڤیان قهدهغهیا هاتن و چوونێ وهك دهلیڤهیهك هاتیه دیتن، بهلێ سوپاس بو خودێ ستافێن باژێڕڤانیان ل گهل پولیسان نههێلایه چوو زێدهگاڤی ل سنوورێ باژێرڤانیان بهێنهكرن"
ناڤبری دیاركر ژی كو ههر ل ههیڤا بوری ل سنوورێ پارێزگهها دههۆكێ 36 تۆن و 725 كیلوگرامێن گلێشی ژلایێ باژێڕڤانیان (ژبلی سهنتهرێ باژێڕێ دهۆكێ) هاتینه كومكرن و ڤهگوهاستن بۆ كارگههێن جوداكرنا گلێشی و جهێن تایبهت ب كومكرنا وانڤه و زێدهتر گۆت "ل ههمان رێكهفت دا، 863 هزار و 251 لیترێن دهرمانێ دژه ڤایرۆس ل بازاڕ و جاده و فهرمانگه و جهێن گشتی هاتینه رهشاندن وهك پێرابوونهكا ساخلهمیێ بۆ پاراستنا گیانێ وهلاتیان و رێگرتن ل بهلاڤ نهبوونا ڤایرۆسا كۆرۆنایێ"
ل دوماهیێ گۆت "بو زێدهكرنا رێژا كهسكاتی و پاراستنا ژینگههێ و جوانكرنا سهر و سیمایێ باژێڕ و باژێڕكێن سنوورێ پارێزگهها دهۆكێ، ههشت هزار و 480 گول و دار هاتینه چاندن ژلایێ باژێڕڤانێین سهر ب رێڤهبهرییا گشتی یا باژێڕڤانیان ل پارێزگهها دهۆكێ، ئهڤه زێدهباری كاركرنا رۆژانه ل پارك و باخچهیێن بهری نوكه هاتینه چێكرن، داكو ههر ب پاراستی و جوان بمینن"
ل سنوورێ پارێزگهها دهۆكێ 49 باژێڕڤانی ههنه، دوو ژ وان باژێڕڤانیان دكهڤنه باژێڕێ و 47 ژی دكهڤنه دهرڤهیێ سهنتهرێ پارێزگهها دهۆكێ و سهر ب رێڤهبهریا گشتی یا باژێڕڤانیانن.