"پارێزەرانی ڕۆژهەڵاتی كوردستان" ناسنامه‌ی خۆیان ئاشكرا كرد
وشە / وارهێڵ-
گرووپێك بە ناوی "پارێزەرانی رۆژهەڵاتی كوردستان" بەرپرسیارییەتی چەند چالاكییەكی چەكداریی لە رۆژهەڵاتی كوردستان، خستە ئەستۆی خۆی. ئەو گرووپە لە روونكردنەوەیەكدا ناسنامەی خۆیان ئاشكرا كردووە.
لە بەشێكی روونكردنەوەكەدا مەبەستی چالاكی سیاسی و سەربازیی ئەو گرووپە ئاشكرا كراوە و داوا لە دانیشتووانی رۆژهەڵاتی كوردستان دەكرێ كە یارمەتیان بدەن. لە بەشێكی تریشدا دووپات لەوە كراوەتەوە كە ئەو گرووپە هەموو هێزە كوردستانییەكان بە پاڵپشتی خۆی دەزانێ و بەتایبەت ئاماژە بە ناوی حزبی دیموكراتی كوردستان كراوە.
ئەوە دەقی روونكردنەوەكەیە:
ڕوونكردنەوەیەك لە "پارێزەرانی ڕۆژهەڵاتی كوردستان"ەوە
ئێمە لە ئامێزی نەتەوەكەی خۆمان هەڵقووڵاوین.كچ و كوڕە تێكۆشەر و ئازادیخوازەكانی ڕۆژهەڵاتی كوردستانین كە وەك پارێزەر و بەرگریكاری خەڵكی ڕۆژهەڵاتی كوردستان هاتووینە مەیدان.
بۆ دوو هه‌فته‌ ده‌بێ زنجیرەیەك چالاكی و تێكۆشان لە ناوچە جۆراوجۆرەكانی ڕۆژهەڵاتی كوردستان لە لایەن ئێمەوە دەستی پێكردوە. دەنگدانەوەی چالاكییەكانمان لە میدیاكاندا بە تایبەتی تێكشكاندنی دوو كەمینی هێزە چەكدارەكانی كۆماری ئیسلامی لە ناوچەكانی سەردەشت و مەریوان لە لایەن هاوڕێیانمانەوە ، بووە بە هۆی ئەوە لێكدانەوە و خوێندنەوەی جۆراوجۆر لە بارەی كار و تێكۆشانی ئێمە بڵاو بێتەوە.
بۆ ڕەواندنەوەی هەر چەشنە گومان و لێكدانەوەیەكی ناڕاست، بە پێویستی دەزانین بۆ بیروڕای گشتی و میدیاكان و بە تایبەتی خەڵكە نیشتمانپەروەرەكەمان روونی بكەینەوە كە ئێمە لە ئامێزی نەتەوەكەی خۆمان هەڵقووڵاوین. كچ و كوڕە تێكۆشەر و ئازادیخوازەكانی ڕۆژهەڵاتی كوردستانین كە وەك پارێزەر و بەرگریكاری خەڵكی ڕۆژهەڵاتی كوردستان هاتووینە مەیدان. ئێمە هەوڵ دەدەین لە گرووپ و تیمی جیاوازدا لە هەر ناوچەیەك بە پیویستی بزانین، ئاماده‌ییمان هەبێ. دەمانەوێ بە كۆماری ئیسلامیی ئێران كە دەستی بە سەر هەموو مافەكانی نەتەوەكەمان داگرتوە،ڕابگەیەنین كە سەركوت و تاوانەكانی لە دژی خەڵكی ڕۆژهەڵاتی كوردستان بێ وەڵام ناهێڵینەوە. بە سیخوڕ و هاودەستەكانی دەزگا تاوانكاره‌كانی ئەو ڕێژیمە دەڵێین ئەگەر واز لە خەیانەت و خۆفرۆشی نەیەنن،دەستی بە هێزی شۆڕشگێڕانی كوردستان پێتان دەگا. بە ئینسانكوژ و تاڵانچییە چەكدارەكانی سەر بە كۆماری ئیسلامی رادەگەیەنین كە لە ئاست كوشتن و تالانی كۆڵبەران و كاسبكارانی زەحمەتكێش و بێدەرەتان بێدەنگ نابین. هاتووینە مەیدان تا بە مەوادفرۆشەكان و بازرگانانی ماددە سڕكەرەكان ڕابگەیەنین چی دیكە ڕێگاتان پێ نادەین كچان و كوڕانی خەڵكی كوردستان گیرۆدەی ماددە سڕكەرەكان بكەن و ژیان و داهاتوویان بەرباد دەن. هاتووینە مەیدان تا وەبیر خەڵكی كوردستان بێنینەوە كە بزووتنەوەی كوردستان و هێزی پێشمەرگە و تێكۆشەرانی نەتەوەكەمان ‌پێویستیان بە هاوكاری و پشتیوانیی دارایی ئەوان هەیە، بۆ ئەوەی بتوانن لە سەر پێی خۆیان ڕابوەستن و بۆ چالاككردنەوەی خەبات و تێكۆشانی خۆیان لە ڕۆژهەڵاتی نیشتمانەكەمان دا، پشتی پێ ببەستن.
ئێمە سەرجەم هێزە خەباتكارەكانی ڕۆژهەڵاتی كوردستان بە تایبەتی حیزبی دیموكراتی كوردستان بە پشتیوانی خۆمان و خۆمان بە پشتیوانی ئەوان دەزانین. سوپاسی خەڵكی ڕۆژهەڵاتی كوردستانیش دەكەین كە پشتیوانی و پێشوازییان لە تێكۆشان و چالاكییەكانمان كردوە. ئەگەرچی ئامانجی تێكۆشانی ئێمە كاری سیاسی و ڕوونكردنەوە و وریاییدانە،بەڵام هەر دەستێك بیەوێ بە چەك بەرەوڕوومان بێتەوە،بەرگری لە خۆمان دەكەین و بە توندی بەرەنگاری دەبینەوە.
خەڵكی ستەملێكراوی كوردستان!
چاوەڕوانیمان لە ئیوە بە گشتی‌و هەموو مرۆڤێكی شەرافەتمەند‌و نیشتمانپەروەری ڕۆژهەڵاتی كوردستان ئەوەیە بە هەمووتواناتانەوە‌و لە هەر ڕێگایەكەوە بۆتان دەكرێ پشتیوانی ڕۆلەكانی خۆتان بن. پیلان‌و جموجۆڵی هێزەكانی دۆژمنمان پێ ڕابگەیەنن. خەیانەتكاران‌و خۆفرۆشانمان پێ بناسێنن، لە تاقیگە‌و ئاشپەزخانەی بازرگانانی ماددە سڕكەرەكان، ئاگادارمان بكەنەوە. یارمەتی‌و هاوكاریی ماڵیی خۆتان بۆ بزووتنەوەی ئەوەی بتوانین باشتر درێژە بە ئەركەكانمان بدەین.
ئێمە "پارێزەرانی ڕۆژهەڵاتی كوردستان" بۆ بڵاوكردنەوەی بەیاننامە و ئاگاداری و بۆ ڕاگەیاندنی هەواڵی چالاكی و تێكۆشانمان پەیج و ماڵپەڕی تایبەت بە خۆمان هەیە.بەو هۆیەوە كە توانای راگەیاندنی ئێمە سنووردارە داوا لە میدیاكان دەكەین لە بڵاوكردنەوەی دەنگ و پەیامی ئێمە و هەواڵی چالاكییەكانمان، درێغی نەكەن.
سەركەوتن بۆ ئیرادەی ڕۆڵە نیشتمانپارێزەكانی ڕۆژهەڵاتی كوردستان،
سەرشۆڕی و شكان بۆ دۆژمنانی ڕزگاریی نەتەوەكەمان.
بەرپرسی میدیایی
پارێزەرانی ڕۆژهەڵاتی كوردستان
٢٩ی خەرمانانی ١٣٩٣
٢٠ی سێپتەمبری ٢٠١٤



PM:12:46:21/09/2014




ئه‌م بابه‌ته 390 جار خوێنراوه‌ته‌وه‌‌

زیاتر ...