لەگەڵ ئەوەی هەموو رێكار و ڕێوشوێنە تەناهییەكان گیرانەبەر، كەچی حكوومەتی عێراق شكستی هێناوە لە كۆتاییهێنان. خۆپێشاندەرانیش دەڵێن باوەڕ بە بەڵێنەكانی عەبادی ناكەین و دروشمی بڕووخێ گەندەڵكاران و سیستەمی دەسەڵات دووپات دەكەنەوە.
دوو هەفتە بەسەر دەستپێكردنی خۆپێشاندانەكانی شاری بەسڕە تێدەپەڕی كە هەموو پارێزگاكانی باشووری گرتووەتەوە و گەیشت بە بەغدای پایتەختیش، هەوڵەكانی حكوومەتی ماوەبەسەرچووی عەبادی هەموو رێكارێكی گرتەبەر، كەچی تا ئێستە شكستی هێناوە و لەگەڵ زیاتر بەكارهێنانی توندوتیژی دژ بە خۆپێشاندەران بۆ بڵاوە پێكردنیان، خۆپێشاندەران موكڕتر دەبن لەسەر داواكارییەكانیان و بە بەرد وەڵامی هێرشی هێزە تەناهییە هاوبەشەكانیش دەدەنەوە، ئەمەش چاودێران وای بۆ دەچن خۆپێشاندانەكە بە ئاراستەی شۆڕش هەنگاو هەڵگرێت.
نووسەرێك لە چەند خاڵێكدا كۆمەڵێك پرس دەستنیشان دەكا و پێی وایە دەبێت ئەمانە داواكاری خۆپێشاندەران بن، بەو پێیەی دواجار خۆپێشاندان هەر كۆتایی دێت.
لە خاڵی یەكەمدا باس لەوە دەكات كە 15 ساڵی رابردوو سەلماندی حكوومەتی مەزەوی و پشك پشكێنە شكستی هێناوە، دەبێت حكوومەتی هاووڵاتی بە سیستەمێكی تەواو دیموكراسی پێك بهێنرێت. ئەمە باشترە لەوەی خۆپێشاندەران ئەو هەموو داواكارییەیان هەیە كە هیچ حكوومەتێك لە دنیادا ناتوانێت لە ماوەیەكی كورتدا جێبەجێیان بكات.
سەیار جەمیل نووسەری وتارەكە لە "
عەرەبی جەدید" باسی لەوە دەكات پێویستە خۆپێشاندەران داوای هەڵگرتنی دەستی ئێران بە تەواوەتی لەسەر عێراق بكەن، هەروەها جۆری پێوەندییە بازرگانی و دیپلۆماتییەكانیشی لەگەڵ دەستنیشان بكرێت، چونكە ئێران دۆخی عێراقی قۆستووەتەوە و ئاو و كارەبای لەسەر بڕین كە ساڵانە داهاتیان 900 ملیۆن دۆلارە. بۆیە تا ئەو بژاردە سیاسییە لەسەر حوكم بن، ئەوا عێراق بووكەڵەی دەستی ئێران دەبێت.
لە خاڵێكی تر، نووسەر دەڵێ دەبێت عێراقییەكان یەك روو بن بەرانبەر بە حكوومەت، بۆ ئەوەی ئەمەریكا تێ بگات كە چەندە هەڵە بووە لە دەستنیشانكردنی بژاردەكانی بۆ حوكمڕانی عێراق، نەك بەسڕە یان هەر شارێكی تر تەنیا جێ بهێڵن بۆ توندڕۆكانی بەناو هێزی تەناهی هاوبەش تا سەركەوتنی خۆپێشاندەران بكەن، جگە لەمەش پێویستە شارەكانی ناوەڕاست و باكوری بەغدا خۆپێشاندان بكەن تا هەموو دنیا بزانێت گەلانی عێراق هەر هەموویان دژی ئەو سیستەمە گەندەڵ و شكستخواردووەن.
لەگەڵ ئەمانەشدا پێویستە عێراقییەكان بە بەڵێنی هەنگوینی و قسەی خۆی هەڵنەخەڵەتێن و گۆڕەپانەكانیان بۆ چۆڵ بكەن، چونكە ئەو سیاسییە درۆزنانە شارەزای بەڵێنی لە خشتەبەرن، بۆیە دەبێت بەردەوام بن تا دەیانگەیەنن بە دادگای باڵای تاوانەكان.
سەیار جەمیلی نووسەر، پێی وایە قۆناغەكە دەخوازێت سەركردەی نوێ لەناو هاووڵاتییان هەڵكەوێت تا سەركردایەتی شۆڕشی خۆپێشاندەران و ئۆپۆزسیۆن بكات بۆ قۆناغی دوای شۆڕش. لە خاڵی شەشەمی وتارەكەیدا، داوا لە رۆشنبیران و فەرمانبەران و كرێكاران و مامۆستایانی زانكۆ و راگەیاندكاران و سەندیكاكان دەكات بچنە پاڵ خۆپێشاندەران و بەگژ دز و گەندەڵ و بەرژەوەندپەرستەكان و سەركردەی عەشایەر و پیاوە ئاینییە عەمامە بەسەرەكان بوەستنەوە و ئەو خۆپێشاندانەی هەیە بكەن بە شۆڕش بۆ گەیشتن بە ئامانجەكانی، چونكە هەر كەوتنێكی ئەو جووڵانەوە جەماوەرییە دەبێتە هۆی مانەوەی چینی دەسەڵات بەدەست لە دەسەڵاتدا و لە دواییدا زیاتر ویستی خۆی بەسەر عێراقییەكان دەسەپێنێت.
پێوەند بەو باسە رۆژنامەی "
عەرەب" لە راپۆرتێكیدا باس لە دروشمی خۆپێشاندەران دەكات لە ماوەی دوو هەفتەی رابردوو كە بەگژ حزبە ئاینییە دەسەڵات بەدەستەكانی سەر بە ئێران و ئێران خۆی چوونەتەوە و داوا دەكەن دەست لە عێراق هەڵگرێت.
بەپێی بەدواداچوونێكی رۆژنامەكە، دروشمی دژ بە ئێران لە هەموو پارێزگاكانی خۆپێشاندانی تێدا ئەنجام دەدرێت كە بەردەوامی هەیە و زۆرینەی رەهاشی شیعە مەزەون، بەرز كراوەتەوە، ئەمەش تووڕەیی خەڵك دژ بە دەستوەردانی ئێران لە بڕیاری سیاسیی عێراق و دۆخی ئابووری و كۆمەڵایەتی و تەناهی دەردەخات.
بەردەوامی خۆپێشاندانەكان و بەگژداچوونەوەیان لەلایەن هێزە تەناهییە هاوبەشەكان، سەرپەرشتیارانی خۆپێشاندانی پارێزگاكانی وا لێ كردووە دەستبەرداری هەموو داواكارییەكانیان ببن و كۆدەنگ بن لەسەر یەك داواكاری، ئەویش "كەوتنی گەندەڵەكان".
جێی باسە لە ماوەی دوو هەفتەی خۆپێشانداندا، ژمارەی كوژراو و برینداران بۆ سەتان بەرز بووەتەوە و گیراوانیش لەلایەن هێزە تەناهی پارێزەكان بۆ سەرووی 500 كەس بەرز بووەتەوە.
خۆپێشاندەران كە بۆ دابینكردنی هەلی كار و خزمەتگوزارییە سەرەتایییەكان هاتنە سەر شەقامەكان، ئێستە دروشمەكانیان گۆڕانكاری زۆری بەسەردا هاتووە و هیچ لە دروشمی سەرەتاكانی ناچێتەوە.
چاودێران دەڵێن لە بڕینی كارەبا لەسەر بەسڕە، ئێران دەریخست كە جگە لەوەی عێراقێكی دەوێت دەستەمۆی خۆی بێت هیچ عێراقێكی تری لا گرنگ نییە، ئەمەش هۆكاری بڕینی كارەبا بووە. وەزارەتی كارەبای عێراقیش ئاشكرای كرد كە كوێت ئامادەیە كارەبا بە عێراق بدات.
هەوڵەكانی حكوومەتی عەبادی بۆ هێوركردنەوەی شەقام و خۆپێشاندەران بەردەوامی هەیە و رۆژانە دەیان بەڵێنی "هەنگوین"ی بە خۆپێشاندەران دەدات.
چالاكانی سەرپەرشتیاری خۆپێشاندەكانیش دەڵێن بەردەوامی بە خۆپێشاندان دەدەین و هیچ باوەڕ بە بەڵێنەكانی حكوومەتی عەبادی ناكەین و ئەمە دوا هەوڵی تووڕەیی شەقامە بە ئامانجی گۆڕانكارییەكی ئەرێنی لە عێراقدا.
غانم شێخ یەكێك لە چالاكانی سەرپەرشتیاری خۆپێشاندانەكانی بەسڕە قسەی بۆ "
عەرەبی جەدید" كردووە، ئاشكرای دەكات هەموو پارێزگاكان بە بەغداوەش، كۆكن ئێوارەی ئەمڕۆ یەكشەم 22ی تەمووز/ یۆلیۆ خۆپێشاندان لەیەك كاتدا ئەنجام بدەن و دروشمەكانیش دژ گەندەڵكارانی دەسەڵات بەدەست بەرز بكرێتەوە.
چالاكێكی تری سەرپەرشتیاری خۆپێشاندانەكان لە موسەنا، دەڵێ ئەو شاندەی شەوی رابردوو لەگەڵ عەبادی كۆ بوونەوە، نوێنەرایەتی خۆپێشاندەران ناكەن و بەڵێنەكانی عەبادیش رای گەیاندن بەشێكن لە داواكارییەكانمان، بۆیە پێویستە لە بڕی دروشمی گەورە گەورە، ئەوا هەنگاو هەڵگرێت.
زیاتر گوتی "داوا لە عەبادی دەكەین كە هێزی تەناهی هاوبەش، نزیك نەكەوێتەوە لە خۆپێشاندەران و گازی فرمێسكڕێژ و فیشەكی پلاستیكی دژ بە خۆپێشاندەران بەكار نەهێنن، چونكە خۆپێشاندانەكە هەر دەكرێت ئەگەر 100% رووبەڕووی بەریەككەوتنیش ببین لەگەڵ هێزە تەناهییەكان".