كارەبای نیشتمانی كەم دەبێتەوە و نرخی موەلیدەش گران دەبێ
بەهۆی لەكاركەوتنی چەند وێستگەیەكی كارەبای نیشتمانی و دابین نەكردنی سووتەمەنی بۆ چەند وێستگەیەكی كارەبا و زیادبوونی خواست لەسەر كارەبا لە وەرزی زستاندا، پێشبینی گرانبوونی نرخی مۆلیدە ناحكوومییەكان دەكرێت و كارەبای نیشتمانیش كەم دەبێتەوە .

ئاكۆ مەعرووف، سەرۆكی ئەنجوومەنی موەلیدە ئەهلییەكان بە "وشە"ی ڕاگەیاند،  لەكاتی كەمبوونەوەی كارەبای نیشتمانی، موەلیدە ئەهلییەكان قەرەبووی ئەو كاتە دەكەنەوە، بەڵام ئەوە لەسەر هاووڵاتییان گران دەكەوێت و رەنگە نەتوانن ئەو بڕە پارەیە دابین بكەن.

زیاتر روونی كردەوە، لە ئێستەدا بۆ ئەمپێرێك كارەبا لە هەر سەعاتێكدا بڕی 1350 دینارمان دیاری كردووە، ئەگەر 10 بۆ 12 سەعات كارەبای موەلیدە بدەین هەر ئەمپێرێك بە 16 هەزار دینار لەسەر خەڵك دەكەوێت.

ئومێد محەمەد بەڕێوەبەری كۆنتڕۆڵی كارەبای هەرێم لە لێدوانێكدا بۆ "وشە" ئاشكرای دەكات، چاوەڕوانی چاككردنەوەی ئەم وێستگانەین كە لەكار كەوتوون، بەڵام بەم شێوەی ئێستە بێت پێشبینی دەكرێت لەوەرزی زستاندا 10 بۆ 11 سەعات كارەبا بە هاووڵاتییان بدرێت.

بە گوێرەی زانیارییەكانی "وشە"، لە ئێستەدا 10 وێستگەی بەرهەمهێنانی كارەبا وەستاون و پێویستی بە سووتەمەنییە كە بۆ هەر مانگێك بە گوژمەی 10 ملیۆن دۆلار سووتەمەنی پێویستە.

ئێستە لە هەرێمی كوردستان نزیكەی 2800 مێگاوات كارەبا بەرهەم دەهێنرێت و بە بڕی 1000 مێگاوات كارەبای وێستگەكان بەهۆی نەبوونی سووتەمەنی وەستاون.

ئاكۆ مەعرووف ئاماژە بەوە دەدات، بڕی یەك بەرمیل گازوایل بە 110 هەزار دینار لە بازاڕی ڕەش دەكڕدرێت، چونكە وەرگرتنی لە حكوومەت زیاتر لەسەر خاوەن موەلیدە ئەهلییەكان دەكەوێت، بۆیە لە ئەگەری بەرزبوونەوەی ئەم نرخە، پێشبینی دەكرێت نرخی ئەمپێری كارەباش بەرز بێتەوە.

عارف حەسەن خاوەنی مۆلیدەی گەڕەكی نەورۆز بۆ "وشە" دەڵی، ئەگەر وەك ساڵی رابردوو كارەبای حكوومی كەم بێتەوە، پێشبینی دەكرێت بۆ هەر چوار ئەمپێرێك كارەبا 70 هەزار دینار وەربگرین، كە ئەمە ئەنجوومەنی موەلیدە ئەهلییەكان و پارێزگای هەولێر دیاریی دەكەن.

ساڵی رابردو بەرزترین نرخ بۆ هەر ئەمپێرێك كارەبا گەیشتە 12 هەزار دینار و ئەمەیش بووە هۆی ناڕەزایی زۆربەی هاووڵاتییانی كوردستان.

وشە/هەولێر- رامیار جەواد
پێداچوونەوە: ه. ج


AM:11:31:09/10/2016




ئه‌م بابه‌ته 2821 جار خوێنراوه‌ته‌وه‌‌

زیاتر ...