• 7°C/2°C
    قامیشلی
  • 03°C/05°C
    دیاربەکر
  • 5°C/0°C
    سنە
  • 13°C/3 °C
    کەرکوک
  • 3°C/-3°C
    دهۆک
  • 8°C/0°C
    هەولێر
  • 5°C/2°C
    سلێمانی
بتەوێ گۆڕانكاری بكەیت دەبێ سەرەتا خۆت بگۆڕی
بێریڤان مەحموود
my image
هیچ كات بە هەڵچوونی بێ بەرنامە گۆڕانكاری بەرهەم نایەت، مرۆڤ دەبێ سەرەتا باوەڕ بەوە بێنێت كە هیچ سەردەمێك خراپ بە خراپ باش نابێت، بەڵكو خراپ دەبێت ئیشی بۆ بكرێت تا بەرەو باش ببرێت، بۆیە ناكرێ تۆ ئامادە نەبیت ئەو قبووڵ بكەیت و خۆیشت بە خاوەن دید و بەرنامەی نوێ بزانی، لەبەرئەوەی ئەو تۆی قبووڵ نییە. 
بیهێنە بەرچاوت و و ورد بیر بكەوە، نموونەیەكی ژیانی بەرجەستە بكە بگوازینەوە بۆ بوارەكانی تری ژیان: شۆفێرێكی خراپ دەتوانێ تا ئاستێك ئۆتۆمبێلێكی خراپ باش بكات، بەڵام بەپێچەوانەوە شۆفێرێكی ناشارەزا و خراپ دەیان ئۆتۆمبێلی باشی بدەرێ، خراپیی دەكات، باسەكە ئەوە نییە ئۆتۆمبێلەكە خراپە یان باش، كێشەی سەرەكی كەسی بەكارهێنەر و ئاراستەكەرە. 
لێرەوە تێدەگەین ئەوە پارتی یان یەكێتی نین خراپن، ئەوە بێ سیستەمی و بێ یاسایییە ئەوانی خراپ كردووە، باشە گریمان تۆی بەرهەڵست ئەوانت ڕووخاند، ئەی چی دەگۆڕێت كە تۆیش وەك ئەوان بێ سیستەم و بێ بەرنامەی؟ جارێ ئەوانەی باسی بێ سیستەمی كێبەركێكارانیان دەكەن، خۆیان خاوەنی سیستەم و پلان نین، كەوایە دڵنیابە خراپتری نەكەن باشتری ناكەن، هیچ مەبەستم نائومێدكردنی تۆی تووڕە نییە، هێندە مەبەستمە وەك تاكێكی ئەم وڵاتە وێرانە پێت بڵێم هەڵەی ئەگەر پێت وابێ هەڵە بە هەڵە چارەسەر دەكرێت بۆ ئەوەی سەركەتوو بین.  
سەرەتا دەبێت خۆمان لە گێژاوی ونبوون دەربێنین و خۆمان بدۆزینەوە لەبری رق، خۆشەویستی و راستی و دڵسۆزی وڵات بەرنامەی ژیانمان بێت و هەوڵ بدەین خۆمان خۆشباوەڕ نەبین و بە سپی بڵێین سپی و خاڵە رەشەكانیش وەك خۆی ببینین، چونكە خۆشباوەڕیی و ناهۆشیاری بەرامبەر پرسەكان و نیشتمان، كۆمەڵگەیەكی مێگەلئاسا و بێ پرسیار بەرهەم دێنێت، لە كاتێكدا دەزانین مرۆڤی سەركەتوو ئەو كەسەیە بیر دەكاتەوە و ئەزموون لە هەڵەكانی وەردەگرێت، ئەگەرچی ئێمە لە هەموو بوارەكانی ژیاندا بێ ئەزموونین و هەوڵیشمان نەداوە لە تێپەڕاندنی ئەو هەموو ساڵەی بەڕێوەبردنی خۆماڵیدا هەر ساڵێك دوو رستەی نوێ بخەینە ناو فەلسەفەی بەڕێوەبردنەوە.
پرسیار ئەوەیە، ئێمە وەك خەڵكی باشووری كوردستان توانای ئەو بیركردنەوە ژیرانەمان هەیە؟ ئایا هیچ كات بووە بە فەوزای بێ بەرنامە ستەم لەناو بچێت ئەگەر ستەمێك بوونی هەبێت؟ كەوایە وەك ئەركێكی ئەخلاقی و ویژدانی لەسەر هەر كەسێكی هۆشیار پێویستە بڵێ گەنجۆ، مام حاجی، دایە، داپیرە، خەڵكی برسی و كرێكاری بێكار، ئایا پرسیارت لە خۆت كردووە كە بەرژەوەندی ویستەكان بۆ مەرامی سیاسیی خۆیان، من و تۆی هاووڵاتی دەكەنە ئامراز، لەم تێگەیشتنەوەیە دەبێت بە ویژدانەوە ڕاستییەكان ڕوون بكەینەوە و پێیان بڵێین، دڵنیابە بە كارت دێنن و ئەوەی تۆ هان دەدات، سبەی خۆی نانی پێوە دەخوات، من هیچ كات هانی تۆ نادەم، هەروەك رێگە بە خۆیشم نادەم و هەرگیز دڵساردت ناكەمەوە داوای مافی خۆت بكەی، چونكە كۆمەڵگەی پێشكەوتوو كاری سەرەكییان داواكردنی مافی خۆیانە تا بەدەستی دێنن، بەڵام مەرجە پێش هەركەس بۆ خۆت بژی نەك تۆ رەنج بدەیت و سیاسییەكی دەوڵەمەند بیخوات و بەرژەوەندی خۆی پێ بەهێز بكات.
هەنووكە تۆ لە دۆخێكی خراپدای كە رەنگە ئەوەش هۆی خۆی هەبێت، لەلایەك دوژمنانی كورد لە پلاندان بۆ لەناوبردنی كوردستانی پێگەیشتوو و نزیك لە دەوڵەت، لەلایەكی ترەوە داعش شەڕێكی بێ ڕادە دڵڕەقانەی بەرامبەر گەلەكەمان راگەیاندووە كە هیچ جۆرێكی قوربانی نییە لە رابردوودا نەماندابێت، بۆیە كورد دەبێت بەرپرسیارتر بێت لە هەر گەلێكی تر لە خوێندنەوەی رووداوەكاندا، ئەگەر تۆی هاووڵاتیش  دەتەوێ بیگۆڕێت، دەبێت بپرسین چ دەگۆڕین و بەچی دەیگۆڕین؟ دەبێت بپرسین ئەوانەی بانگەشەی گۆڕین دەكەن چ جۆرە پلانێكیان هەیە؟ ئایا گۆڕین پرۆسەیەكە هەوڵ بدرێت خراپ بۆ خراپتر ئاراستە بكەین؟ نەخێر.
لەم پەیامە كورتەدا وتەیەكی كۆنفۆشیۆس دەكەمە كۆتای كە دەڵێت: "چاك نەكردنی هەڵەی خۆت هەڵەیەكی ترە"، تۆی هاووڵاتی ئەگەر پەندت لە رووداوەكانی ١٧ی شوبات و ئەزموونەكانی تر وەرنەگرت كە حزبەكان بەرهەمەكەیان خوارد، دەكەویتە ژێر پرسیارەوە كە بۆچی چەند بارە بەكار دەهێنرێیتەوە. بەڵام كاتێك دەستی حزب بڕی لە پشتەوە و خۆت داوای مافی خۆتت كرد و راستەوخۆ لەگەڵ حكوومەت كەوتیتە گفتوگۆ، ئیتر تۆ هیوای بۆ داهاتوویەكی گەشی كۆمەڵایەتی.

بێریڤان مەحموود

ئه‌م بابه‌ته 2642 جار خوێنراوه‌ته‌وه‌‌
PM:02:54:08/10/2016